Ads by Google Ads by Google

Fa’atauto fa’amasino lagolago fou a le Fa’amasinoga Maualuga


Fa’amasino Lagolago, Paepae Iosefa Faiai [ata: Faiai family]
fili@samoanews.com

Ua i ai nei se fa’amasino lagolago fou i le Fa’amasinoga Maualuga Amerika Samoa, le tofa ia Paepae Iosefa Faiai, lea sa avea muamua ma Senetoa o le Itumalo o Alataua.

 

O le aso Lua o le vaiaso lenei sa fa’atauaia ai le sauniga mo le fa’atautoina o Paepae, i lona tofiga fou o le Fa’amasino Lagolago. O lea sauniga sa fa’afoeina e le afioga i le Fa’amasino Sili, Michael Kruse, ma sa auai ai foi isi Fa’amasinoga Lagolago i lea sauniga, ae maise aiga ma uo a Paepae.

 

I se pepa o fa’amatalaga mai le Fa’amasinoga Maualuga i le aso Lulu o le vaiaso lenei, sa fa’alauiloa aloaia ai le fa’atautoina o Paepae, ma ua avea nei o ia ma Fa’amasino Lagolago. Ma o le avea o Paepae ma fa’amasino lagolago, ua taunu’u tonu lava i le taimi fita i le vaega o fa’amasinoga ona o nisi o afioga i fa’amasino lagolago o lo’o i ai nei o lo’o faamoemoe e tuua Amerika Samoa mo le Atu Mikolonesia mo aoaoga faapitoa i tulaga tau fa’amasinioga i lalo o le polokalama a le Pacific Judicial Council.

 

I lalo o tulafono a le malo o Amerika Samoa, o le Fa’amasino Sili na te tuuina atu se fautuaga i le kovana sili, mo se tasi e avea ma fa’amasino lagolago, ae o le kovana e tuuina atu i le Senate lana tofiga mo le faamaonia e afioga i senetoa.

 

O le aso 30 o Novema 2017 sa fa’amaonia ai e le Senate le tofia o Paepae e avea ma fa’amasino lagolago, e ala mai i se fautuaga a le Fa’amasino Sili. Ua ma’ea ona fa’amavae Paepae mai lona tofi senatoa.

 

A o le i filifilia Paepae e avea ma Senatoa o le Fono Faitulafono, sa fa’aalia i sana tusi i le Fa’amasino lona naunau e fia tautua i le Vaega o Fa’amasinoga, e ala i le tofiga o le Fa’amasino le tumau. Ona o lea tulaga, ua taua ai e Kruse lona taliaina o le talosaga a Paepae, ina ia tatala atu ai le avanoa e auauna ai i lea vaega o le faigamalo, ma aloaia ai lona fa’amavae mai i lona tofiga o le Senatoa i le Fono Faitulafono.

 

Na taua fo’i e Kruse lona agaga fiafia ina ua talia ma le agaga atoa e Paepae le filifilia o ia e avea ma Fa’amasino.

 

Na amata mai le soifuaga aoaoina o Paepae i le aoga maulauga a Leone, ma fa’auu mai ai i le tausaga e 1981, lea fo’i na avea ai o ia o se tasi na fa’auluulu i ai le vasega fa’au’u. Na ulufale o ia i le US Army ma tautua ai mo tausaga e 21, ma malolo litaea mai ai i le tausaga e 2002 i le tulaga o le Chief Warrant Officer III, ma toe taliu mai o ia ma tautua i lona aiga, nu’u ma le malo.

 

O ni isi o ona agava’a na avea ai o ia o se pailate fa’auuina a le vaega o le FAA. Sa avea fo’i o ia ma pailate sinia mo kamupani va’alele fa’amautu i le atu Samoa, mo tausaga e 7, amata mai i le 2002 e oo mai i le 2009, sosoo ai loa ma le avea o ia ma pailate mo le va’alele a le malo, le Segaula mo tausaga e 3.

 

O ia o se Tiakono i le Ekalesia EFKAS i Nua ma Seetaga, o ia o le teutupe a le pulega a ali’i ma faipule o le afioga, o lo o avea o ia ma Ta’ita’ifono a le Ekalesia, o ia fo’i o se totino o le Komiti o Tupe a le Ekalesia Aoao.

 

O Paepae o se tasi e fa’aaloalogia i lona aiga, nu’u ma le Ekalesia, o ona agava’a fo’i ua mafai ai ona ia ausia tulaga maualuluga i lona soifua galue i le malo.