Fa’ataua Togafitiga Ma’i Tau Le Mafaufau
Na poto fa’atasi matagaluega ma vaega eseese o le malo o lo’o nafa ma le tausia lelei, taumafai e saili togafitiga ma vaifofo i so’o se ituaiga gasegase ma a’afiaga ua fesoua’ina ai le tino ma le mafaufau o i latou ua matauina ma fa’amaonia i sailiga, ua i ai afaina tumau i le mafaufau, i le potu fono o le Malumalu LDS i Malaeimi Center mo le latou fonotaga fa’apitoa e fetufa’i ai lagona o i latou o a’afia, ina ia latou taumafai e mataituina i taimi uma e latou te mo’omia ai ni fesoasoani.
Sa auai fo’i i le fonotaga i latou ua alagatatau i ai lea auaunaga, ma sa tofu sao fo’i le to’atele o nei sui, e afua atu i foma’i fa’apitoa o le mafaufau, se’ia o’o ia i latou o lo’o feagai ma le tausiga o i latou ma fa’atino galuega e aga atu i le tautuaina o lea vaega fa’apitoa o le atunu’u.
Na aofia le Ofisa o A’oga, le vasega o Faia’oga o le SPED, le ASCDVS, o le Public Health, DHSS Child Care, le Behavioral & Mental Health a le LBJ e sapasapaia fa’atasi lenei taumafaiga.
“Po’o le a lava le afuaga o nei tiga, ae tatau ona tatou alofagia i latou, ma avea i latou o nisi e taua i le tatou nonofo fa’atasi ma soifua fa’atasi i totonu o le atunu’u. Pe afai loa e mafai ona saunoa mai i latou, ua malie fo’i o latou loto ina ia fa’asoa mai o latou o’otiaga tuga i totonu o latou loto, o se mea sili lea e mafai ona fa’ailoa mai ia i tatou uma e aofia ai foma’i, sui faufautua ma latou aiga, ina ia latou gafatia ona alofaina pea o latou vaivaiga,” o se faamatalaga lea a Fa’aalu Iuli mai le ASDVSC.
Na vaaia le fiafia o nei sui, aua sa maua fo’i le avanoa e fesiligia ai ali’i ma tama’ita’i Foma’i fa’apitoa o le mafaufau, ae maise o latou faufautua i auaunaga eseese ua ofoina atu mo i latou e vaega eseese o le malo ae maise fa’alapotopotoga tumaoti.
Na fesiligia e Gwen, se tasi o tina o a’afia, sa ia fa’ailoa ai lona popolega, “O le a se mea e mafai ona fai mo le sui a’afia le mafaufau pe afai ua oso nei lona ma’i, ae avatu i le falema’i e leai se foma’i o le mafaufau o iinei? Ua tupu lena mea, ae na i’u ina ave ai i le vaega o Leoleo, ma i’u ane i le TCF, ma toe fa’asolo atu ai i le fa’amasinoga, ae emo ane le ata, ua toe aumai e le Fa’amasinoga i le mea na amata mai ai le sailiga a le sui ua a’afia lona mafaufau, le Falema’i i le Behavioral & Mental Health?”
Na gugu le aofia, ae na tali le sui o le matagaluega o Leoleo, “Afai ua faigata ona fa’amalolo le sui ua a’afia, ua vala’auina fo’i le matou Ofisa ina ia puipuia le mamalu lautele, ma ia le a’afia fo’i le sui a’afia i ni moliga tau soligatulafono ua fa’atino i lea taimi e oso ai lona gasegase. E pau lava le mea e fai a le matou Ofisa o fa’amaumauga, ona fa’auia lea o le TCF ina ia taofia ai e fa’atali ai le taimi e tula’i ai i le fa’amasinoga, o iina fo’i e fa’ato’a fa’atonuina mai ai le isi la’asaga e faia e le matou Matagaluega, pe toe fa’ao’o i le Behavioral and Mental Health, pe o le tulia loa o le fa’asalaga e pei lava o se tasi e le o a’afia lona mafaufau.”
Ua fa’ailoa mai fo’i nisi fita i le vasega o le aufaigaluega, aua e le mafai fo’i ona fa’alauiloaina fa’amaumauga i faila o nei gasegase i so’o se isi, ae maise le vaega fa’amalosi tulafono a le malo.
“Ona o aia tatau e le mafai ai e foma’i po’o tausima’i ona fa’alauiloa fa’amaumauga tau togafitiga ma a’afiaga tau fuala’au fa’asaina ma le ‘ava o’ona o lo’o a’afia ai so’o se gasegase, ua le mafai ai ona faia e ali’i foma’i se fa’aiuga e ave sa’o ai lea tagata gasegase i nofoaga nei, ae toe fa’auia fo’i i ali’i leoleo mo a latou sailiga ma fa’amaumauga e faia fo’i e i latou le fa’aiuga tonu e tusa o latou fa’amaumauga ua maua,” se fa’amatalaga lea a le tama’ita’i foma’i na saunoa e tusa o faila ma fa’amaumauga a le falena’i i faila o tagata mamai.
E i ai le fa’ailoga sa saunia fa’apitoa e le OPAD mo le sui ua iloga ona aoga ia te ia le tele o fautuaga, tima’iga ma galuega tau vaifofo sa fa’atautaia e ali’i foma’i, faufautua fa’apitoa ma matagaluega uma sa asa mai ai lea sui.
O lea tina o Elisapeta Mailo, ma sa fiafia lava o ia e maua lona fa’ailoga mai le OPAD fa’apea ma le ato fa’ameaalofa na tapena e le So’oula Ala i le Tautua, o se fa’alapotopotoga a tina ma tama matutua ua latou gaosia oloa taulima Samoa ma fa’atau atu i le atunuu ma turisi.
Na tula’i le tama’ita’i Foma’i o Eta Lomialagi Seumanutafa ina ia fa’ailoa i tagata uma, a’afiaga tau le mafaufau e ono lamatia ai mafaufau ma’ale’ale o le fanau mai le itiiti se’ia o’o ina matutua. Na faailoa le vaega o le mafaufau e sili ona faigofie ona a’afia, ma e amata mai lava a’o pepe meamea le tamaitiiti ona fa’aeteete gata lea vaega o lona mafaufau.
Sa i ai fo’i se vaega taua o folasaga sa fa’atulaga, ma saunoa ai se tasi o sui o le Ofisa o le Saogalemu lea e mafai ona maua ai le vaega tupe e tausia ai le tamaititi ua fa’amaonia le i ai o ona a’afiaga tau le mafaufau, a’o le’i atoa le 22 tausaga o lona soifua.
“O i latou na e mafai ona talosagaina le maua fo’i o sana siaki e tausia ai o ia, pe a o’o ina tali le saogalemu a lona tama poo lona tina. Afai fo’i e maliu le matua lea, e fa’aauau pea lava ona maua e lea alo e i ai a’afiaga tau le mafaufau ona maua lana lea tupe.”
Na fa’ailoa fo’i, afai e fa’afalepuipuia se matua ua tali lana saogalemu, ma ua fa’amaonia lona moliaga e ao ina nofosala i le falepuipui, e le toe maua e ia sana siaki saogalemu, se’i vagana ua maea tulia lona fa’asalaga ma ua tasi le masina talu ona tatala i tua. Peita’i, o le fanau e a’afia i gasegase tau le mafaufau sa maua latou siaki mai le tama ona o lona saogalemu, e fa’aauau lava siaki a le fanau ma le tina, pe afai ae loka le tama i le falepuipui.”
O nisi na o mea iloga ona aoga sa fefa’asoa’i i lea fonotaga, ma ua iloga ai, le aoga ona malamalama lelei o tagata uma, e tusa o ala manuia, togafitiga ma vaifofo ae maise o auaunaga e mafai ona maua e i latou ua a’afia o latou mafaufau i gasegase tumau.