Fa’ataua Tama ma Tina matutua taumafa ma le aganu’u a Samoa


Se vaaiga i le taimi o fa’agaioiga a Tama ma Tina matutua i le malae i Utulei i le taeao ananafi, o ni isi nei o vaega o le latou vaiaso faapitoa o loo fa’agasolo, lea ua fa’amoemoe e faamuta i le aso Faraile nei. [ata AF]

Le taimi na tauaao atu ai le vaisalo i tagata matutua i le taimi o a latou fa’agaioiga i le malae i Utulei i le taeao ananafi. [ata AF]

Ni isi o le atunu’u sa saunia taumafa mo le aso o tagata matutua i Utulei i le taeao ananafi. [ata AF]
ausage@samoanews.com

A o fa’agasolo ai le fa’amanatuina o le vaiaso e fa’apitoa mo Tagata Matutua i le atunu’u, o le taeao ananafi na fa’atinoina ai ni isi o fa’agaioiga mo Tama ma Tina matutua i le malae o le Su’iga’ula a le Atuvasa i Utulei, mo le fa’atauaina o taumafa Samoa aemaise ai tu ma aganu’u a Samoa.

 

O le taeao ananafi e pei ona taua e le Fa’atonusili o le Ofisa o Tagata Matutua (TAOA) ia Evelyn Satele i le Samoa News, sa fa’atauaina ai taumafa eseese a le atunu’u, atoa ai ma ni isi o fa’agaioiga e fa’apitoa mo Tama ma Tina matutua, e aofia ai ma polokalame fa’amalosi tino.

 

“O le agaga atoa o le Ofisa a le TAOA, ia mae’a lenei vaiaso ua maua fo’i e Tama ma Tina matutua le fiafia i le fa’amanatuina o le vaiaso fa’apitoa lenei mo i latou”, o le saunoaga lea a Satele.

 

Na mafai ona asia e le Samoa News le malae i Utulei ma molimauina ai le fiafia o Tama ma Tina matutua i le fa’atinoina o a latou polokalame, atoa ai ma le tele o taumafa Samoa sa mafai ona maua ai mo le fofoga taumafa.

 

Na taua e ni isi o Tama ma Tina matutua i le Samoa News lo latou agaga fiafia ina ua mafai ona aloaia e le malo lenei vaiaso fa’apitoa mo i latou, aemaise ai le tele o polokalame eseese ua mafai ona fa’atinoina mo i latou uma.

 

“Pau lava lea o ituaiga polokalame e fiafia i ai tagata matutua, o le siva ma fa’afiafia ae taualuga i sina taumafa Samoa”, o le saunoaga lea a le Tama matua ia Ulu Finau o Utulei.

 

Ae na taua e le Tina matua ia Loreta Galo o Aua e fa’apea, o le taua o mafutaga fa’apenei e le gata e maua ai le fiafia ae maua ai fo’i ma le malosi mo tagata matutua.

 

“O le isi lea vailaau aoga e umi ai le soifua o le tagata, o le laufofoga fiafia ma toaga e fa’amalosi tino, lea la ua molimauina i lenei aso, ma o se tulaga e lagona ai le fiafia ina ua amanaia e le malo lenei vaiaso e fa’apitoa i tagata matutua”, o le saunoaga lea a le Tina matua o Galo.

 

O ni isi o taumafa Samoa sa molimauina i le taimi o le polokalame a tagata matutua e aofia ai le umu ulu, taro, fa’i ma luau. Sa i ai fo’i taumafa e pei o le vaisalo, fa’ausi, koko Samoa, fa’apapa, atoa ai ma le supoesi.

 

E le gata sa tatala le avanoa i Tagata matutua mo le la’uina atu o a latou fale’aiga o taumafa vela e fa’atau i le taimi o le polokalame, ae sa tatala fo’i le avanoa i soo se tasi o le atunu’u e fia fa’atau lana fale’aiga vela i le taimi o le polokalame.

 

O le taeao nei lea ua fa’amoemoe e fa’agasolo ai isi polokalame i le malae lava i Utulei i tulaga o galuega taulima ma isi fo’i atina’e sa galulue i ai tagata matutua, a o lumana’i ai loa le aso Faraile lea ua fa’atulaga e taualuga ai le fa’amoemoe i le solo tele atoa ai ma le tufatufaina o fa’ailoga taualoa mo tagata matutua.

Comment Here