Fa’ataua tagata fesoasoani ma tautua i le atunu’u

Ua fa’atautaia e le a’oga tulaga muamua a Lupelele le polokalama ua fa’aigoaina: “Fa’ataua Tautua Tagata Fesoasoani i le Atunuu” ma e faia mo le vaiaso atoa lenei.

 

O le polokalama, ua fa’ailoa mai e le vasega o faia’oga mai le Level K5 se’ia oo i le Vasega 2, ma e to’a 12 faia’oga ua aofia ai i le fa’atautaiga o lenei polokalama fa’apitoa.

 

“O le kuata lona lua lenei o le tausaga a’oga, ma ua fa’atulaga ai a’oa’oga o le fanau ina ia latou iloa auaunaga fesoasoani mo i latou i taimi o fa’alavelave fa’afuase’i i totonu o aiga. O lea ua mae’a a’oa’o i totonu o potu a’oga ituaiga fesoasoani eseese, peita’i, e tatau ona va’ai patino i latou i e o lo’o fa’atinoa fesaosoani eseese ma latou fa’amatala mai latou galuega e fai i aso ta’itasi,” o se fa’amatalaga lea a le tama’ita’i faia’oga o lo’o fa’auluulu i ai lenei polokalama aoga i Lupelele Elementary, Osana McKenzie.

 

Ina ua fesiligia ituaiga fesoasoani o le a latou tu’u avanoa i ai mo latou folasaga, sa fa’ailoa mai, “Sa matou avatu tusi vala’aulia mo se fa’atinoga o tiute i vasega a le fanau, ona tuu atu lea, poo ai a tali mai e talia le talosaga, lea la ua mae’a fo’i ona tali leleia mai e le Matagaluega o le Puipuiga o Saogalemu Lautele ma le Tinei Afi [DPS & FIRE], ma ua mae’a le latou aso ananafi.”

 

O isi tautua ua tali, e aofia ai le Matagaluega o le Puipuiga o le Vaomatua ma le Gataifale [DMWR] e auai mai i le itula e 9:00 - 10:00 i le taeao o le aso Lulu. Aso Tofi ua fa’atulaga ai le EMS mai le falema’i i Faga’alu, ae o le aso Faraile o le Polokalama a le 4H a le ASCC Land Grant.

 

“I lenei taumafaiga, ua le tatau ai ona fa’aitiitia le polokalama ae matua fa’alautele ina ia nofouta le fanau i mea e ao ina faia, pe a va’aia e i latou ua a’afia le lotoifale o le latou aiga i se fa’alavelave fa’afuase’i. Poo se ma’i oso o se tagala matua, ae o lo’o i ai o ia, e ono fa’atinoa se galuega lavea’i mo lea tagata matua o le latou aiga,” o a McKenzie lea.

 

“O le auai mai fo’i o sui mai nei matagaluega, o le a le fefe pe manatu le tamaititi e le tatau ia te ia ona vala’au i le Ofisa o Leoleo mo se fesaosoani aua e la’ititi lava o ia. Ae o le a fa’amalosi’au fo’i nei sui o le a oo mai i le potu a’oga, ina ia tima’i le fanauiti, e tatau ia te ia ona fa’atino se tiute lavea’i, ua le maumau ai se sui o pagatia, ae fa’aolaina o ia.”

 

O folasaga filifilia ua mae’a fa’atulaga, ua fa’afiafiaina ai le vasega o faia’oga ae maise le Pule Aoga i Lupelele Elementary, Fa’auliuli Julie Meleisea, e fa’atino lenei polokalama aoga tele. Ua fa’ailoa i nei o fisa ituaiga a’oa’oga e ao ina folasia, fa’amalamalama ma fa’ailoa i le fanau, le ala e fa’atino ai latou tautua mo le mamalu lautele o le atunu’u, ina ia mautinoa ai lo latou saogalemu.

 

“Ua mae’a fa’ailoa i matagaluega uma nei, ‘E taua la outou galuega mo tagata uma’ ae ao ina fa’ailoa i le fanau iti, e le mafai ona vave oo mai lea fesoasoani i o latou aiga, pe afai e leai se tasi e fa’afeso’ota’ia i matou, ua tupu se mea i le tou aiga.”

 

O faia’oga o lo’o aofia fa’atasi i lenei taumafaiga e aofia ai: Nofo Falefia, Fialupe Maugaotega, Anna Lotulelei, Ainoama Tavita, Savali Vaega Uikirifi, Me Iosefo, Tau Tinei Sopi, Poto Matuu, Lila Tuilagi, Harriette Manase, Noanette Taufao ma Osana McKenzie.

Comment Here