O le vaiaso lenei o lo o fa’agasolo ai polokalame mo le fa’atauaina o le tautua a Tausima’i i totonu o le atunu’u, e pei ona fa’amanatuina ai i tausaga ta’itasi.

I le fa’aautuina ai o le Vaiaso mo Tausima’i i lenei masina i le autu: “O le paleni o le mafaufau, tina ma le agaga”, na fa’atauaina ai le sauniga lotu sa fa’atautaia i le aso Sa na te’a nei e tatala aloaia ai le Vaiaso faapitoa, le taua o le fesootaiga i le mafaufau, tina ma le agaga o le Tausima’i e fa’atino ai lana galuega.

O le sauniga lotu na atama aloaia ai le fa’atauaina o le Vaiaso mo Tausima’i, na fa’ataunu’uina lea i le malumalu a le Falema’i o le LBJ i Faga’alu, lea sa fa’atumulia i Tausima’i ma o latou aiga, fa’apea ai Ta’ita’i o le Falema’i, Soifua Maloloina fa’apea ai le atunu’u.

E pei ona masani ai i tausaga ta’itasi uma lava e fa’amanatuina ai le Vaiaso o Tausima’i, e fa’atulaga ai fo’i ma le sauniga e tauaao aloaia ai meaalofa fa’apitoa mo i latou ua ausia agava’a eseese o tautua.

Na fa’amaonia mai e le Peresetene o le Asosi a Tausima’i i Amerika Samoa ia Tofiga Tufele i le Samoa News, le avea o le aso Tofi o le vaiaso nei ma aso e fa’ataunu’uina ai lenei sauniga fa’apitoa i le malumalu o le LBJ i Faga’alu, lea fo’i o le a tauaaoina ai fa’ailoga mo i latou uma ua ausia tulaga maualuluga fa’apea ai tautua masani.

“O le agaga atoa o lenei fa’amoemoe, ia mafai ona fa’atauaina le tautua a Tausima’i i le atunu’u, ina ia lagona ai fo’i e i latou le fa’atauaina e le Asosi faapea le malo o le latou sao i le tausiaina lea o le soifua maloloina i le atunu’u”, o le saunoaga lea a Tufele.

Ina ua fesiligia po o i ai ni lu’itau o fetaia’i ma le Vaega o Tausima’i i le atunu’u i le taimi nei, na saunoa ai Tufele e faapea, pau le lu’itau o lo o fetaia’i pea ma Tausima’i i tausaga ta’itasi, o le le lava lea o Tausima’i e fa’atinoina le galuega.

Sa ia taua e fa’apea, o se tasi lenei o matata e tatau ona fiafia fanau aoga e galulue ai, aua o loo maua ai ma le avanoa e ofo atu ai ma le tautua i le tausiaina o matua fa’apea soo se tasi o le atunu’u e a’afia i gasegase o le tino.

O le vaiaso na te’a nei na sainia ai e le afioga i le ali’i kovana ia Lolo Matalasi Moliga sana poloaiga fa’alaua’itele, e fa’ailoa atu ai i le atunu’u le tatau lea ona tatou lagolagoina fa’atasi le fa’atauaina o le Vaiaso o Tausima’i, atoa ai ma lona filifilia o le vaiaso lenei o Me e avea ma vaiaso e fa’atauaina ai le tautua ma le sao a Tausima’i i le atunu’u.

Saunoa Lolo e fa’apea, talu ai le lata i le 3.1 miliona le aofa’i o Tausima’i ua mafai ona lesitalaina i totonu o le Iunaite Setete o Amerika, ae pe tusa ma le 150 Tausima’i ua mae’a ona laiseneina i totonu o Amerika Samoa, lea o lo o latou fa’atinoina le tautua o le tausiaina lea o le soifua maloloina o le atunu’u.

Na taua e le ali’i kovana i lana poloaiga le taua tele o le sao a Tausima’i i le atunu’u, e le gata i le tausiaina o le soifua maloloina o tagata mama’i, ae o le fa’alauteleina o le tomai i tulaga tau aoaoga, lea e pei ona galulue ai le to’atele i le Kolisi Tu’ufa’atasi i le taimi nei.

“Ou te talosaga atu ai i le atunu’u atoa ina ia tatou o mai fa’atasi e lagolago ma fa’amanatu le sao o Tausima’i i totonu o le atunu’u i le vaiaso lenei o le masina o Me, amata mai i le aso 8 e oo atu i le aso 12, ma ia tatou auai uma fo’i i soo se polokalame fa’agasolo e fa’amanatu ma fa’ataua ai la latou auaunaga i le atunu’u”, o se vaega lea o le poloaiga fa’alaua’itele a le ali’i kovana.

O ni isi o polokalame fa’agasolo a le Asosi o Tausima’i i le atunu’u e aofia ai ta’aloga ua fa’atulaga e faia i le malae o le Su’iga’ula a le Atuvasa i Utulei i le vaiaso lenei.