O le vaiaso lenei o lo o fa’agasolo ai polokalame eseese mo le fa’atauaina o le sao taua a ali’i ma tama’ita’i Leoleo i totonu o Amerika Samoa. E le gata i Leoleo, ae fa’apea fo’i i isi vaega o lo o i lalo o le fa’amalu a le Matagaluega o Leoleo a le malo, e aofia ai le Vaega Fuimu, Toese i Tafuna ma tagata faigaluega uma a le Matagaluega.

E le na o Amerika Samoa o lo o fa’atinoina ai lenei polokalame, ae o lo o aofia uma ai Setete ma Teritori uma o Amerika, i le fa’atauaina lea o le tautua matavela a ali’i ma tama’ita’i Leoleo.

O le Aso Sa na te’a nei na tatala aloaia ai le vaiaso faapitoa mo Leoleo i lenei tausaga, i se sauniga lotu sa fa’ataunu’uina i le malumalu o le Ekalesia EFKAS i Fagaalu, sosoo ai loa ma le asiasia o le tula’i fa’aaloalo a ali’i ma tama’ita’i leoleo i le Malae i Fagatogo e le afioga i le Lutena Kovana ia Lemanu Palepoi Sialega Mauga.

Na auai uma i lenei sauniga faapitoa ali’i ma tama’ita’i Leoleo, sui o le Vaega Fuimu, atoa ai ma tagata faigaluega a le Matagaluega o Leoleo, i lalo o le ta’ita’iga a le afioga i le ali’i Komesina o Leoleo, tofa Le’i S. Thompson.

O le Fa’atonusili o le Ofisa e Puipuia Solitulafono ma Auaunaga (CJPA), tofa Leseiau Laumoli, lea fo’i sa avea ma Sui Komesina o Leoleo mo le tele o tausaga na auai i le molimauina o lenei sauniga taua.

I le saunoaga a Lemanu, sa ia faafetaia ai ali’i ma tama’ita’i Leoleo e tusa ai o la latou auaunaga taua mo le atunu’u. Sa ia fa’afetaia le Komesina o Leoleo faapea ai Ta’ita’i o vaega ta’itasi a le Matagaluega, i lo latou tutu fa’atasi e lagolago le auaunaga o loo faatinoina e ali’i ma tama’ita’i Leoleo.

“E le faigofie la outou auaunaga o loo faatinoina nei mo le atunu’u, e faigata la outou galuega, e tele fo’i lu’itau, ae mana’omia pea lo outou onosa’i ma fa’atino le galuega i le loto maualalo ma le alofa”, o le saunoaga lea a Lemanu.

E le i fa’atinoina e Lemanu lana saunoaga faapitoa mo Leoleo i luga o le pulela’a, ae na aga’i atu o ia i lalo i le malae i le vaega o loo laulaututu ai ali’i ma tama’ita’i Leoleo, ma fa’aleo i ai lana saunoaga.

“Ua ou filifili ou te fa’alatalata atu ia te outou, ina ia outou lagonaina lo’u leo ma outou fa’alogo mai ma le manino”, o le saunoaga lea a Lemanu ao fa’ata’ali’oli’o o ia e Leoleo, Fuimu ma tagata faigaluega a le Ofisa o Leoleo.

“Fa’afetai mo la outou auaunaga. O la outou galuega, o le puipuiina lea o le saogalemu o tagata uma o le atunu’u. Tou te galulue i le ao ma le po e puipui le saogalemu o tagata uma, ae o loo tatalo mai fo’i ta’ita’i o le atunu’u mo outou”.

Na faailoa e Lemanu i Leoleo e fa’apea, o le sini autu e mafai ai ona manuia la latou galuega, o le fa’afesaga’i ma le atunu’u ma fa’asoa i ai manaoga e tatau ona fa’aleleia.

“Ua outou faalogo i le tele o faasea ma faitioaga mai le atunuu e fa’atatau ia te outou ma la outou auaunaga. Aua tou te amanaia upu ma tala, a ia fa’atino la outou galuega ma le fa’aaloalo, loto maualalo ma le alofa”.

“Ia outou alolofa i a outou aiga, ta’ito’alua ma fanau aemaise ai matua. O i latou ia o loo tu’i maia le mulipapaga ma tapuaia o outou faiva i le ao ma le po”.

Na faailoa e Lemanu i Leoleo le faafetaia e le Kovana ma le malo atoa o la latou tautua. O le latou tautua e le gata i le puipuia o le saogalemu ae faamalosia foi tulafono i soo vaega o le atunu’u.

I le poloaiga faalaua’itele a le Peresetene o Amerika ia Donald J. Trump na tuuina mai i le vaiaso na te’a nei, sa ia faalauiloa aloaia ai le avea o le aso 15 Me o lenei tausaga, o le aso lea e faataua ai le sao o Leoleo i totonu o setete ma teritori. Ae o le aso 13-19 o Me, o le a faapitoa lea mo polokalame eseese e faalauiloa atili atu ai le tautua a leoleo i tagata lautele.

Saunoa Trump e fa’apea, e tele naua soifua o ali’i ma tama’ita’i leoleo ua ma’imau ao faatinoina ai la latou tautua i le tausaga na te’a nei. Sa ia talosagaina tagata lautele uma o le Iunaite Setete i ona setete ma teritori ina ia tutu faatasi e lagolago le sao o Leoleo.

O polokalame faataoto a le matagaluega o Leoleo mo lenei vaiaso, e aofia ai a latou faleie ua faamoemoe e faalauiloa ai a latou auaunaga eseese mo le atunu’u. O le aso Faraile lea ua faatulaga e faia ai le aso faapitoa mo Aiga uma o Leoleo i le taelega i Utulei, ae o le po o le aso Toonai lea ua faatulaga e faia ai le Fiafia tele mo Leoleo uma lava, Fuimu, o tagata faigaluega ma a latou aiga.