Fa’ataua fale’aiga McDonalds tautua a tagata faigaluega


Se vaaiga i laufofoga fiafia o se vaega to’atele o tagata faigaluega a le fale’aiga a le McDonalds i Fagatogo, i le polokalame e fa’atauaina ai tagata faigaluega, lea na fa’ataunu’uina i le malae o le Su’iga’ula a le Atuvasa i Utulei i le aso ananafi. [ata AF]

Ta’ita’i o le Fale’aiga a le McDonalds i le taimi o le polokalame e fa’atauaina ai tagata faigaluega, lea na fa’atautaia i le malae o le Su’iga’ula a le Atuvasa i Utulei i le taeao ananafi. (l-r) Sala Malia Sililo, Teofilo Magalo ma Tupea Sofara. [ata AF]

Ni isi o vaega sa vaevaeina i ai tagata faigaluega a le fale’aiga a le McDonald’s i Fagatogo, i le polokalame e fa’atauaina ai tagata faigaluega, e pei ona fa’ataunu’uina i le malae o le Su’iga’ula a le Atuvasa i Utulei i le taeao ananafi. [ata AF]
ausage@samoanews.com

O le aso Lua ma le aso Lulu o le vaiaso nei na molimauina ai e uo ma aiga fa’apea ni isi o le atunu’u, se polokalame fa’apitoa na mafai ona tu’u fa’atasia e le Pulega a le Fale’aiga a le McDonald’s Family Restaurant, e fa’atauaina ai le tautua a tagata faigaluega.

 

O le aso Lua na fa’ataunuuina ai polokalame mo le lala a le McDonalds i Tafuna, e pei ona fa’atinoina ai ta’aloga ma fiafia i le Paka Liona i Tafuna, ae o le lala i Fagatogo na fa’ataunu’uina la latou aso faapitoa i le taeao ananafi i le malae o le Su’iga’ula a le Atuvasa i Utulei.

 

Na taua e se tasi Ta’ita’i le taua o lenei polokalame, e le gata e malolo mai ai le aufaigaluega mai le fa’atinoina o tiute masani i totonu o le fale’aiga, ae o se avanoa lelei fo’i lea e mafai ai ona mafuta fa’atasi ai tagata faigaluega e ala i ta’aloga ma fiafiaga eseese, ae fa’ai’u ai i se taumafataga.

 

Na molimauina le fiafia o tagata faigaluega e mafuta fa’atasi ma isi fo’i uo i le galuega, e ala i le auai fa’atasi i ta’aloga eseese na mafai ona fa’atulaga e le Komiti sa fuafuaina lea fa’amoemoe taua.

 

Na taua e se tasi o ali’i faigaluega mai le lala i Tafuna le taua o avanoa fa’aauro fa’apenei e ofo fua mai e le kamupani mo tagata faigaluega, e mafuta fa’atasi ai i latou ma iloa atili ai e le isi le tasi.

 

“E le o kamupani uma i le atunu’u latou te fa’atinoina lenei polokalame i a latou tagata faigaluega, o le mafua’aga lea ua lagona ai le fiafia o le loto, i le fa’aauau pea lea ona amanaia e le pulega a le McDonald’s Family Restaurant le sao a i matou nei o tagata faigaluega”, o le saunoaga lea a se tasi o ali’i faigaluega mai le lala i Tafuna.

 

Ae na taua e se tama’ita’i mai le lala i Fagatogo le aoga o mafutaga fa’apenei, e le gata e malolo mai ai le mafaufau mai le fa’atinoina o galuega masani i totonu o le fale’aiga, ae o se avanoa fo’i lea e mafuta fa’atasi ai tagata faigaluega ma a latou Ta’ita’i, ma fiafia fa’atasi.

Comment Here