Ads by Google Ads by Google

Fa’ataua auaunaga o turisi & fa’ateline ai tupe maua mai ai


O le fesili ua tula'i mai, aisea e taua ai fa'amaumauga? Ina ia fuafua ai le lumana'i o lau pisinisi, fuafua ai ala e maketi ai lau pisinisi, ia fa'amautu au fuafuaga, fa'atusatusa ai lau taumafaiga i si malo i totonu o le alamoana ma ia fa'amautu atili le aofai o turisi e asia i tatou ma le aga'i i luma o tautua o lo'o feagai ma i latou pe a fa'ato'ai mai. [ata: Leua Aiono Frost]

O le fa'alauiloaga lea o Upega Tafailagi e mafai ona e feso'ota'i ai i le Ofisa o Turisi ma maua ai sau so'otaga ma isi lala uma e aofia ai le SPTO ma nisi pisinisi o lo'o tou galulue fa'atasi i auaunaga mo turisi i le atunu'u. [ata: Leua Aiono Frost]

Na toe fa'atautaia le fonotaga fa'alea'oa'oga a le vasega o pisinisi e feso'ota'i ma le tautuaina o tagata maimoa ma asiasi mai fafo i le atunu'u. O lea fonotaga faaleaoaoga sa mafai ona fetufa'i ai vasega o e faigaluega i le South Pacific Tourism Office i Suva Fiti, lea e aofia ai Amerika Samoa o se totino, i ala e mafai ona fa'aleleia atili pisinisi, fesosoani mai fo'i i latou i au taumafaiga ina ia maua le tamaoaiga e faalautele atili ai lau pisinisi ma ala e maketi ai lau pisinisi i fafo ina ia asiasi mai tagata.

 

E le fou i le to'atele o le aufaipisinisi nei ala uma sa talanoaina, peita'i, sa fou i le iloa ma le mautinoa, e ao ina latou fa'aaogaina tatau le avea ai o Amerika Samoa ma totino o le SPTO ina ia maketi vave ai fo'i i latou i kamupani o va'a meli tetele o lo'o asia i tatou ma le anoanoa'i o pasese, lua e ao ina tutu fa'atasi uma le aufaipisinisi fa'a-turisi a le atunuu.

 

O i latou na auai e aofia ai le vasega o e fai Faletalimalo, pisinisi o matafaga e maimoa ai turisi ma le au faipisinisi tau maimoaga lea e matele ina fa'aaogaina pasi ma ta'avale laiti, o le vasega o pisinisi tusi pasese, ma faleoloa o galuega alofilima a le atunu'u fa'atasi ai ma le vasega o afio'aga ma aiga o lo'o faia latou fa'afiafiaga fa'asamoa i taimi e taula mai ai meli la'u pasese tetele.

 

O le tama'ita'i o Christina Leala Gale mai Samoa, o ia lea sa nafa ma le folasaga e fa'alauiloa ai le aoga tele o le SPTO mo i tatou malo o lo ua fa'ato'a mafuli atu e tau'ave le mau, "O le Turisi o le atina'e sili ona taua i le lumana'i o malo, pe afai e galulue fa'atasi fa'apa'aga ma isi atumotu o lo'o latou aofia fa'atasi i le latou Alamoana! O le taumafaiga lea, ua mafua ai ona vave tula'i mai fo'i taumafaiga a Samoa latou i le tulaga ua i ai nei.

 

“E tatau ona mautalitonuina e malo uma ua so'ofa'atasi i lenei taumafaiga, ia taofia fo'i le tele o isi aiaiga fa'alemalo, e ono fa'aitiitia atili ai avanoa matala e femalaga'i mai ai tagata asiasi mai fafo." O nisi ia o saunoaga sa fa'ailo e Leala-Gale.

 

"Ina ia una'ia malosi le taumafaiga a le aufaipisinisi e fa'aleleia atili le auaunaga mo Turisi ina ia fa'ateleina le aotelega o le seleni e toe maua mai ai e i latou ma lo tatou malo, e ao ina mua'i fa'ava'aia i latou i le fua o galuega ua mae'a faia! Ona mafai lea ona galue malosi le tagata faipisinisi e faalautele lana auaunaga ma ia faia i le agaga ua aga'i i ai le taumafaiga i fonotaga fa'apenei, ma avea ma auau fa'atasi o le au faipisinisi atoa ua i le atunu'u." O le isi lea mau taua tele na fa'ailo, o le galulue fa'atasi uma o i latou ua aotelega le auaunaga mo le tautuaina o turisi i Amerika Samoa.

 

Peita'i i le ata na fa'asalalauina fa'alaua'itele mai sui na auai i lenei fonotaga, e le'i to'atele faletalimalo na auai ni o latou sui, e le'i to'atele fo'i le vasega o pisinisi fa'atau galuega taulima ma measina a le atunu'u na auai, e le'i to'atele fo'i ni au fai ta'avale la'u pasese sa auai, e o'o lava i le vasega fo'i o faipisinisi tau Matafaga ma falesamoa fa'atalia pasese, ma le au fa'afiafia.

 

I le vasega o aiaiga fa'alemalo e mafai ona taofiofia le ulufale mai o tagata maimoa i le atunu'u, sa o'o ane ai folasaga i le tulaga o Femalaga'iga ma latou tulafono tau pemita e ulufale mai ai tagata maimoa ma tagata fia fa'atau i le tatou malo.

 

"O le taimi nei ua fa'amalosia ai le tulafono e ao le $20 mai so'o se tagata e fia ulufale mai i Amerika Samoa ae o lo'o tau'avea le tusi folau Niu Sila ma Ausetalia. O le taimi muamua sa matala e leai se taofi po'o se tupe e totogia i le malae vaalele pe a ulufale mai. O lea ua tete'i i matou ua totogi nei tupe, ae lei i ai se tala ua fa'ailoa atu ia i latou le 'au faipisinisi e fa'ailoa ia matou tagata ulufale mai, e ao ina totogia nei tupe, fa'ailoa mai ma le ala e fa'aaogaina ai nei tupe?,” o se tala lea a se tasi o le au faipisinisi na aofia i lea fonotaga.

 

I le taimi nei ua tele fo'i aiaiga o pemita mo tagata o atumotu e le o aofia i le lisi o atunu'u e 38 lea e ulufale mai e leai ni pemita, ae na'o se tinoitupe e totogia i le malae va'alele pe ulufale mai. O le fesili a nisi, sa mua'i pasia mai e le fono faitulafono nei pili totogi ma suiga o pemita e ulufale mai ai tagata mai fafo i le tatou malo?

 

"Ua iloga mai, e le o mau talitonuina e le Malo o Amerika Samoa, o le Turisi e avea ma se tasi o ala e matua fa'ateleina ai le tamaoaiga o le tou malo. Ua i ai mea e matua fia maimoaina e tagata i le tou atunu'u, ae tatau ona galulue fa'atasi le Malo ma outou le aufaipisinisi e tautuaina tagata turisi i so'o se ala, ina ia fia ulufale mai pea, ma ia toe fo'i fa'afia mai, ma fai atu fo'i i latou i nisi e asiasi mai i le tatou nei malo,” o se tala lea a Leala-Gale.

 

Ina ia maua le tulaga fa'aauau pea ona fa'aleleia auaunaga o turisi, ma ia le so'ona vaivai ai ma le tulaga o le ava fatafata ma nisi o agaifanua a le atunu'u, e tatau ona va'ai toto'a le aufaipisinisi nei i ala e maua ai le paleni lea. Aua ne'i sopoloa le tautua i tu ma aga e le talafeagai ai ma le aganu'u a Samoa. Ia tausia lelei fo'i o tatou apitagalu ma le va'aiga lautele i o tatou laufanua ma fa'amama tatou matafaga ia fa'atutu ai ni faleuia e le mamalu o e maimoa mai, ma ia tausia lelei tulaga uma o le soifua maloloina ma fa'amatagofie atili i togala'au ma la'au paolo e malolo i ai e tafafao mai ma i tatou fo'i.