Ads by Google Ads by Google

Fa’ataua afioga Faipule le saogalemu o fa’atoaga i le atunu’u


Fa’atoaga aniani i le nofoaga autu a le Ofisa o Fa’atoaga i Tafuna. [ata AF]

Laau o le esi o loo toto e le Ofisa o Fa’atoaga i Tafuna. [ata AF]
ausage@samoanews.com

O le fa’atauaina o le tulaga saogalemu o fa’atoaga o loo toto e soo se fai fa’atoaga i le atunu’u, o le mataupu lea na autu i ai le tele o finagalo fa’aalia mai afioga i Faipule o le maota o sui, ina ua latou iloiloina tofiga a le kovana fa’asaga i le susuga ia Filifa’atali Michael Fuiava, lea ua aloaia nei le avea o ia e fai ma Fa’atonusili fou o le Matagaluega o Fa’atoaga a le malo mo le isi 4 tausaga.

 

O palota fulisia mai maota e lua na fa’aalia ai lo latou lagolagoina o le suafa o Filifa’atali e avea ma Fa’atonusili o lenei Matagaluega taua a le malo, ina ua mae’a ona fesiligia ona agava’a atoa ai ma lona tomai mo le fa’atinoina o le galuega.

 

O se tasi o mataupu sa fesiligia e afioga i Faipule i le taimi o le iloiloga, o le fuafuaga a le malo e fausia ai le atina’e o le aniani i Manu’a, lea ua manino i le molimau a le afioga i le Fa’atonusili, ua le manuia lenei fuafuaga a le malo mo le atina’e o le aniani i Manu’a, lea e tusa ma le $300,000 le vaega tupe sa fa’atinoina ai.

 

Na fautuaina e Faipule mai le itumalo o Manu’a le tatau lea ona toe vaavaai i le fa’aauauina o lenei atina’e, ae saili se tagatanu’u mai Manu’a e i ai lona tomai i le fa’atinoina o fa’atoaga ma atina’e fa’apea, nai lo le tau aami o se tagata mai fafo e le nofo i Manu’a e tausia le fa’atoaga.

 

Na taua e le afioga i le ali’i faipule ia Vailoata E. Amituana’i e fa’apepa, o lo o maitauina pea kapisi saina o loo fa’atau i vaega eseese o le atunu’u, a o lea ua mae’a ona tu’uina mai le fa’asilasila a le Ofisa o Fa’atoaga e fa’asa ai le toe fa’atauina atu o lenei fualaau’aina.

 

Saunoa Fuiava e fa’apea, o loo tumau pea le tapu e taofia ai le toe fa’atauina atu o lenei fualaau’aina, e mafua mai i suesuega sa faia e le Ofisa i tausaga ua mavae, lea na fa’amaonia ai le le saogalemu o auala sa totoina ai lea fo’i fualaau’aina taua mo le taumaga.

 

Ua fautuaina e le afioga a Vailoata le tatau lea ona fa’amalosia lea tulaga, ona e ui o loo fa’asa le toe fa’atauina atu i le polokalame o taumafa a Fanau Aoga, ae o loo vaaia pea lava le fa’atau solo o kapisi saina i tafatafa o le alatele fa’apea ai totonu o ni isi o faleoloa i le atunu’u.

 

Ina ua fesiligia e le afioga i le ali’i faipule ia Faimealelei Anthony Fu’e Allen le mataupu e fa’atatau i le masini e su’e ai le malosi o le vailaau o loo fana ai fualaau’aina, na saunoa ai Filifa’atali e fa’apea, o loo tumau pea le leai o se masini e mafai e le aufaigaluega ona fa’atoaga e su’e ai le malosi o le vailaau i luga o fualaau’aina, e ui o se tasi lea o tulaga taua e tatau ona ave i ai le fa’amoemoe.

 

Saunoa Faimealelei e fa’apea, e le o mafai ona vaaia i le taimi nei a’afiaga i fanau aoga ona o le malolosi o vailaau o loo fana ai fualaau’aina, ae fa’atoa mafai ona alia’e mai nei a’afiaga i le isi 20 tausaga o loo lumana’i.

 

Na talosagaina e Faimealelei ma isi faipule le tatau lea ona ave le fa’amuamua a le Ofisa o Fa’atoaga e saili mai se masini, e fa’aaoga e fua ai le malolosi o vailaau o loo afna ai tino o fualaau’aina, ona e taua tele mo le saogalemu o le atunu’u, atoa ai ma le saogalemu o fa’atoaga o loo toto e le aufai fa’atoaga a le atunu’u.

 

O le mataupu e fa’atatau i le masini e pei ona fesiligia, sa vavao ai fo’i le maota maualuga o le Senate ma le Fa’atonusili o le Ofisa o Fa’atoaga ua mavae atu, tofa Leala M. Purcell, atoa ai ma le Fa’atonusili o le Ofisa o le Puipuiga o le Siosiomaga a le malo (AS-EPA), susuga Ameko Pato, ina ua talosagaina e le afioga i le ali’i Senatoa ia LeAtualevao Asifoa le tatau lea ona i ai o se masini, ma folafola ai loa e Pato le sauni o lona Ofisa e fa’atupe le fa’atauina mai o le masini, peita’i o lea ua mae’a atu le ulua’i 4 tausaga o le nofoaiga ua mavae, o loo tumau pea le leai o se masini.

 

I le talanoaina ai o le mataupu i fa’atoaga, na fautuaina ai fo’i e ni isi o afioga i Faipule le susuga ia Filifa’atali, ina ia silasila toto’a i le polokalame e fa’atatau i tauofoga o loo faia mo le polokalame a le School Lunch, lea ua to’atele le mamalu o le aufai fa’atoaga ua fa’asea ai, i le le sa’o lea o le auala o loo fa’afoe ai lea tulaga.

 

Saunoa le afioga i le ali’i faipule mai le motu o Swains ia Su’a Alexander Eli Jennings e fa’apea, e tatau lava ona filifilia na o le aufai fa’atoaga o loo i ai a latou fa’atoaga o loo toto, latou te sapalaia fualaau’aina faapea ai ma fa’atoaga i le polokalame a le School Lunch.

 

Ae na taua e Gafatasi Afalavae fa’apea, ua mafua ona to’atele le aufai fa’atoaga ua gugulu i le auala o loo fa’afoe ai tauofoga mo le polokalame a le School Lunch, ona ua ese le Ofisa ua latou fa’afoeina lea polokalame, ae tatau lava ona taoto pea i le Ofisa o Fa’atoaga a le malo.

 

I le fa’aiuga o le iloiloga, na taua ai e le susuga a Filifa’atali lona sauni e galulue fa’atasi ma le aufai fa’atoaga a le atunu’u, mo le fa’aleleia o vaega e pei ona fautuaina ai o ia e Faipule.