O le si’itaga i le tau fa’ae’e e ave ai ta’avale afi a tagata lautele i le va o Tutuila ma Manu’a ua tulai mai ai ma se fa’agaulemalie o nisi o tagata Manu’a, ona ua atili ai ona alu i luga le tau o le soifuaga mo Manu’atele.

I se tusitusiga fa’alauaitele i le aso 13 o Tesema, 2017, mai ia Taimalelagi Dr. Claire Poumele, Fa’atonusili o le Matagaluega o Uafu ma Malae Va’alele, o lo’o taua ai e fa’apea o Ianuari 2, 2018 e si’i ai le tau pe a ave se ta’avale afi i le va o Tutuila ma uafu i Manu’a.

O lona uiga afai e ave se ta’avale afi mai Tutuila i Ta’u, o le tau fa’ae’e o le a si’i mai i le $135 i le $200. O le tau fa’ae’e fo’i lea pe afai o se ta’avale mai Ta’u aumai i Tutuila nei.

Taua e Taimalelagi e faapea o le mafuaga o lenei si’itaga ona o le mana’omia tele e fa’aleleia le tautua i le va o Tutuila ma Manu’a ae maise o le tele o tagata malaga fa’apea foi ma malaga a le va’a o le MV Sili.

Ina ua ma’ea le iloiloina totoa o lenei mataupu i le si’itaga ua faia ai loa le fa’aiuga ina ia fa’atulaga loa lenei si’itaga fou.

Ae sa fa’aalia i le Samoa News le le fiafia o nisi o tagata Manu’a i lenei si’itaga, ae maise se tina sa ia fa’ailoa e faapea ua le talafeagaiga lenei si’itaga i lenei vaitau. Sa talosagaina e le tina se manautu o le afioga i le Sui Fofoga Fetalai, Fetu Fetui Jr., i lenei mataupu.

Ina ua fesiligia e le Samoa News, sa tali mai Fetui e fa’apea e le’i iloa e ia lenei si’itaga ae o le a feso’otai ia Taimalelagi. Peitai sa ia saunoa e faapea, ua ma’ea ona taoto i le Matagaluega se talosaga i le tausaga ua te’a ina ia taga’i totoa i le tau fa’ae’i i oloa o lo’o auina atu i Manu’a ona o le taugata o le soifuaga i le Manu’atele.

“E fa’aluaina pe fa’atoluina le tau o se oloa o lo’o fa’atau i faleoloa i Manu’a pe a fa’atusatusa i le tau o lo’o fa’atauina ai i Tutuila nei,” o se saunoga lea a Fetui, ma lona loto momoi i le tulaga o lo’o i ai tagata o lona itumalo i le tele o tau fa’ae’e.

Ina ua toe fesiligia Taimalelagi i lenei si’itaga, sa fa’ailoa mai ai e le tamaitai fa’atonusili e faapea, o le tau fa’ae’e mo ta’avale e ave i luga o le MV Sili i le tausaga e 2012, e $250 i le ala e tasi (one-way), pe $500 i le malaga ta’amilo (roundtrip). O lea vaitau ae le’i tula’i mai le faigamalo o lo’o i ai nei, a Lolo ma Lemanu.

O lona uiga o le tau fa’ae’e i le taimi lenei o lo’o maualalo pe a fa’atusatusa i le 2012.

Sa fa’aminio foi e Taimalelagi e tele taimi e leai ni malaga mo Manu’a ona o le fa’aletonu o le MV Sili, ma mafua ai ona togipau e le Matagaluega le va’a o le Fotu o Samoa mai le malo Tutoatasi o Samoa. Ma o le tau o le malaga e tasi a le Fotu o Samoa i le malaga e tasi e $27,000.

Ua le gata i lea, sa tele fo’i taimi e manaomia ai le toe fa’alelei o le MV Sili ae e le o lava se tupe e maua mai i malaga.

Sa toe fa’amanatu e Taimalelagi i le mamalu o le Manu’atele, i le taimi na tulai mai ai le faigamalo a Lolo ma Lemanu i le 2013, sa tofia ai le totogina o oloa e la’u i Manu’a, ina ia fesoasoani i le atina’eina o le tamaoaiga o lea vaega o le teritori.

Taua e le tamaitai fa’atonu e na o le $250,000 o lo’o i le tupe fa’asoasoa mo malaga i Manu’a, ae le taitai lava, ae maise lava pe a manaomia le tele o mea toe fa’aleleia mo le MV Sili.

E na o le 9 ta’avale afi e mafai ona ave i le malaga e tasi a le MV Sili, ae le mafai ona kava ai le tele o mea e tatau ona totogi mo le malaga e tasi.

Ae ui i le tele o le tupe fa’aalu mo le malaga e tasi, ae o lo’o tumau pea le tau o pasese mo le mamalu o le atun’u e malaga i le va o Tutuila ma le Manu’atele.

O le aso ananafi sa faia ai se iloiloga a le Maota o Sui ona o le tau fa’ae’e o oloa a ave i luga o le MV Sili.