Fa’asea ni isi aufai pisinisi fa’aiuga a le Fa’atonusili o Fa’atoaga

ausage@samoanews.com

Ua fa’aalia e ni isi o le aufai pisinisi o lo o latou sapalaiaina mai le taro mai Samoa, lo latou fa’atuiese i le fa’aiuga lea ua saunoa ia i le Fa’atonusili o Fa’atoaga a le malo, e taofia ai i latou mai lo latou toe aumaia o le taro mai Samoa, ae tu’u tasi lava i le aufai fa’atoaga a Samoa.

 

Na taua e le susuga ai Viliamu Amituana’i, o se tasi o ali’i faipisinisi o lo o ia aumaia oloa eseese mai Samoa e aofia ai ma le taro e fa’apea, e le tatau i le Fa’atonusili ona ia faia se fa’aiuga e a’afia ai le aufai pisinisi, e aunoa ma le logoina atu o i latou mo se feiloaiga e talanoaina ai le tulaga tonu o le a oo i ai le latou sapalai o le taro mai Samoa.

 

“E leai lava se eseesega o i matou ma isi tagata faipisinisi i le atunu’u, o lo o i ai la matou sao i le faigamalo, o lo o matou mulimulita’i fo’i i tulafono uma a le malo, e le tatau la ona fa’aselemutu lenei fesoasoani e aunoa ma le fa’ailoaina mai o se mafua’aga ua faia ai lea fa’aiuga,” o le saunoaga lea a Amituana’i.

 

Saunoa Amituana’i e fa’apea, ua silia i le 5 tausaga o ia sapalaiaina mai le taro atoa ai ma isi oloa eseese mai Samoa mo le teritori, e le o i ai fo’i se tulaga o fa’aletonu ai lana auaunaga i le atunu’u.

 

Ina ua fesiligia e le Samoa News fa’asea mai ni isi o le aufai fa’atoaga, i lo latou si’i maualuga lea o le tau o le taro pe a latou aumaia i le atunu’u, ina ia maua ai sa latou tupe fa’asili, na saunoa Amituana’i e fa’apea, “E leai lava se tagata faipisinisi e le naunau mo se tupe fa’asili, ae le fa’apea fo’i ua sili atu le taugata o le tau o lo o matou fa’atau atu ai le taro i le atunu’u, ae o lo o fetaui lava ma talafeagai.”

 

O se tasi o Tina o lo o ia aumaia le taro mai Samoa, Margret Maposua, sa ia fa’aalia fo’i lagona le fiafia i le fa’aiuga ua faia e taofia ai le toe aumaia e tagata faipisinisi e pei o ia o le taro mai Samoa, se’i vagana ai lava le tagata fai fa’atoaga.

 

Na taua e lenei Tina e fa’apea, e leai ma se tulaga o lo o fa’aletonu ai lana taro o lo o sapalai mai Samoa, e le gata o lo o mama, mapo ma lelei i le fofoga taumafa, ae o lo o taugofie fo’i.

 

“O ni isi o le aufai fa’atoaga mai Samoa e faigata ona malaga mai latou iinei e kiliva mai a latou meamata, ae o le auala lea o lo o o’u faia o le fa’atau o le taro mai sapalai mai iinei, e faigofie atu lea mo le atunu’u,” o le saunoaga lea a Mapusua.

 

Ina ua fesiligia o ia i sona finagalo, i le mataupu e pei ona fesiligia e ni isi o le aufai fa’atoaga a le atunu’u, i le faigofie atu lea ona fesiligia ma saili le fai fa’atoaga mai Samoa pe a fa’aletonu lana taro, nai lo le fiu e tau su’e le tagata faipisinisi o lo o ia sapalaiaina mai le taro i le atunu’u, na soisoi Maposua ma ia saunoa e fa’apea, “A i ai se fa’aletonu i le taro o lo o sapalai mai e Maposua, e maua lava a’u i Amerika Samoa.”

 

Na taua e le Fa’atonusili o le Ofisa o Fa’atoaga a le malo, susuga Rev. Filifa’atali Michael Fuiava e fa’apea, afai ae toe talia le auina mai o le taro mai Samoa, o le a faia loa le fa’aiuga e taofia ai le aufai pisinisi, poo i latou o lo o fa’aigoaina e le to’atele o “middle man” ona latou toe aumaia le taro i Amerika Samoa, sei vagana ai lava le tagata fai fa’atoaga moni lava mai Samoa.

 

O le mafua’aga o lenei fa’aiuga e pei ona saunoa Rev. Filifa’atali, e faigofie ai ona saili le faifa’atoaga pe a tula’i mai se fa’aletonu i ana taro o lo o aumai, nai lo le fiu e tau saili poo ai le tagata faipisinisi sa ia sapalaiaina mai le taro ua fa’aletonu. O lea fa’aiuga ua lagolagoina fo’i e se vaega to’atele o le aufai fa’atoaga a le atunu’u.

Comment Here