Ads by Google Ads by Google

Fa’asea Komesina i le leai o ni tala lelei e fa’asalalau fa’asaga i Leoleo

ausage@samoanews.com

Na fa’aalia e le Komesina o Leoleo ia Le’i Sonny Thompson i le taimi o le Iloiloga a le Komiti o le Puipuiga o le Saogalemu Lautele a le Maota o Sui i le vaiaso na te’a nei, lona lagona le fiafia i le Samoa News, i le leai lea o ni tala lelei latou te fa’asalalauina fa’asaga i le auaunaga a ali’i ma tama’ita’i Leoleo.

 

E le gata i lea, sa ia tu’uaia fo’i le Samoa News i le le ripotia o le tele o saunoaga mananaia a afioga i Faipule sa tuuina atu i le taimi o le iloiloga, e fa’atatau i le siitia maualuga ua i ai le auaunaga a le Ofisa o Leoleo i le atunu’u.

 

O le aso Tofi o le vaiaso na te’a nei na faia ai se iloiloga a le Komiti o le Puipuiga o le Saogalemu Lautele a le maota o sui, e talanoaina ai le tele o mataupu e fa’atatau i le tautua a le Ofisa o Leoleo, e pei o le aveese mai o le Vaega Fuimu mai le Ofisa o Leoleo i Leone, tofia o Fuimu e leoleo pagota sosola, siitaga o totogi o Leoleo, atoa ai ma tu’uaiga i le sauaina o pagota i le falepuipui.

 

O molimau na valaauina i le iloiloga e aofia ai le Komesina o Leoleo ia Le’i, o sui komesina e to’alua ia Vaimaga Maiava ma Falana’ipupu Taase Sagapolutele, o le Pule o le Vaega Fuimu, atoa ai ma le pule o le toese ia Tauese Vaaomala Sunia.

 

E tele isi mataupu na fesiligia e afioga i Faipule i le amataga o le iloiloga, lea e toeititi lava atoa le 2 itula o fa’agasolo, lea fo’i sa maua ai le avnaoa o molimau e fa’amanino ai ni isi o mataupu sa fesiligia e afioga i Faipule.

 

E ui i le to’atele o Faipule sa latou fesiligia le mataupu i le sauaina o pagota i le toese i luma o le maota, e leai ma se isi na fesiligia le Komesina i le taimi o le iloiloga, se’i vagana ai lava le Ta’ita’i Komiti, afioga i le Faipule ia Manumaua W. Wilson, lea na ia fesiligia Le’i ina ua latalata lava i le fa’aiuga o le iloiloga, mo sana saunoaga e tusa ai o le mataupu i le sauaina o pagota i le falepuipui.

 

Na amata le tali a Le’i i lana saunoaga e fa’apea, o ia e ala usupo lava i taeao uma e faitau le nusipepa a le Samoa News, e vaai poo i ai ni tala o sau ai e fa’atatau i le Ofisa o Leoleo na te le o silafia, ina ia mafai ai ona aofia i le latou talanoaga ma Ta’ita’i o le Ofisa mataupu ia i taimi e faia ai a latou fonotaga pupu’u i taeao ta’itasi.

 

Na mae’a lana saunoaga lea, ona ia fa’afetaia lea o le Fofoga Fetalai o le maota, tofa Savali Talavou Ale ona o lana saunoaga sa fa’asalalau i le Samoa News, e tali atu ai i le saunoaga a le afioga i le ali’i Faipule ia Toeaina Faufano Autele.

 

Sa ia taua e fa’apea, ua fai lava si matuia ma mamafa o tusitusiga sa lomia i le Samoa News e faatatau i saunoaga a Toeaina, e ui o Toeaina o lona uso fa’aletulafono (brother-in-law).

 

“E leai lava ma se mea manaia sa tusia mai i le nusipepa, e oo fo’i i talanoaga ma afioga i Faipule i le fa’amalieina o outou i le tautua a le Ofisa, e leai lava ma se mea o sau ai, ae le afaina, aua o tala le lelei faapea e vave ai ona taulia le nusipepa”, o le saunoaga lea a Le’i.

 

O le saunoaga a le Fofoga Fetalai e pei ona taua e Le’i, o le saunoaga e faailoa ai lona le lagolagoina o le finagalo o Toeaina, i lona manatu lea e ave sana tusi i le Fa’amasinoga Feterale e faailoa i ai le mataupu i pagota o loo sauaina i le toese, pe afai e le faia i ai se gaioiga a le Komesina ma le Ofisa o Leoleo.

 

Ae na taua e Le’i e fa’apea, ua uma ona ia poloaina le faia o se suesuega faasaga i ripoti i pagota o loo fasi e Leoleo. Na ta’utino Le’i i luma o Faipule e fa’apea, e le o taumafai e natia ni fa’aletonu o loo tutupu i le matagaluega, ae o loo ia faamanatu pea i ai ina ia usita’i ma mulimuli i le tulafono.