Ads by Google Ads by Google

Fa’asea faipule i suiga ua faia e le Komesina o Leoleo

ausage@samoanews.com

Ua fa’aalia e ni isi o Faipule lagona faasea i le suiga ua faia e le Komesina o Leoleo, e ala i le tofia o alii Fuimu e leoleoina pagota i totonu o le toese.

 

I le fia malamalama ai o afioga i Faipule i le mafua’aga o lea fa’aiuga mai ia Le’i S. Thompson, ua talosagaina ai loa se iloiloga e fesiligia ai lenei mataupu.

 

O le afioga i le ali’i faipule mai Fofo ia Fagaoatua D. Salavea na ia lagoina lenei mataupu, ma ia fesiligia ai le mafua’aga ua aveese mai ai le Vaega Fuimu mai le Fale Leoleo i Leone, ae auina atu i le Ofisa o Leoleo i Tafuna.

 

Saunoa Fagaoatua e fa’apea, o le suiga ua faia e le Komesina o Leoleo, e le gata ua aafia ai lona itumalo ae faapea ai fo’i itumalo o loo faalagolago i le fesoasoani mai le Fale Leoleo i Leone mo taimi o fa’alavelave tutupu e aofia ai mu.

 

Na taua atili e Fagaoatua e fa’apea, ua fa’ailoa atu e ni isi o lona itumalo e galulue i le Vaega a le Fuimu lagona faanoanoa, i le tofia lea o i latou e leoleo alii pagota o loo tuuaia i le sosola soo ese mai i le toese.

 

I lona talitonuga, e le tatau ona tofia ni alii Fuimu e o e leoleo pagota sosola, aua e lei aoaoina alii Fuimu e leoleo pagota. O le galuega o le leoleoina o pagota e talafeagai mo leoleo ua uma ona aoaoina i lea matata.

 

Na maua e le Samoa News se telefoni mai se Tama o se alii Fuimu o loo galue e leoleo pagota sosola i le toese, lea na ia taua ai lona le fiafia i le faaiuga ua faia e le Komesina, e tofi ai lona atalii ma isi Fuimu e galulue i le leoleoina o pagota sosola i le toese.

 

Na taua e le Tama lea e fa’apea, e le talafeagai le tofia o ni tagata e leai se tomai e leoleo pagota, ina ne’i tutupu mai ai ni faaletonu ona le iloa lea poo ai e tuuaia i lea fa’aletonu.

 

“E lei aoga lo’u atali’i i le leoleoina o pagota, sa aoaoina o ia ia iloa fui le mu pe a tula’i mai. Afai la e le agava’a lo’u atali’i i le leoleoina o pagota, e le tatau la ona fa’a faigaluegaina o ia i le falepuipui i Tafunaa”, o le talitonuga lea o le Tama.

 

Sa ia taua fo’i e fa’apea, o le saogalemu a lona atalii le isi mataupu o loo sili ona mamafa i lona loto, ina ne’i alia’e mai se faalavelave e pei o le sosola i tua o pagota, ona le iloa lea poo ai e tuuaia i lea fa’aletonu.

 

Na lagolagoina e le afioga i le ali’i faipule mai Saole lenei mataupu, afioga Kitara Vaiau. Na taua e Kitara e fa’apea, ua mae’a fo’i ona talanoa atu ni isi o lona itumalo o loo galulue i le vaega o le Fuimu i le Ofisa o Leoleo i Fagaitua, ma faaleo atu le lagona faasea lava lea e tasi, o le leai lea o se latou agava’a i le fa’atinoina o le galuega leoleo pagota, ae o loo tofia ai lava i latou.

 

Saunoa atili Kitara e fa’apea, e tusa ai o le fa’amatalaga a alii Fuimu mai lona itumalo, ua mafua ona tofia i latou e leoleo pagota, ona ua tau leai ni leoleo i le taimi nei, ona o le to’atele o Leoleo lea ua galulue i le polokalame fesoasoani a le FEMA, e lelei e maua ai a latou ova taimi.

 

E talitonu Kitara, e le tatau i le Komesina ona ia faia se fa’aiuga e aafia ai le saogalemu o tagata faigaluega a le malo.