Fa’asea to’atele soona fa’aaoga le tatau meatotino malo Ofu, Manu’a

ausage@samoanews.com

E to’atele ni isi o tagatanu’u o Ofu, Manu’a ua fa’aalia lo latou fa’asea i le soona faaaoga le tatau e tagata faigaluega a le malo o meatotino a le malo e aofia ai kesi ma mea faufale.

 

Ona o nei mau fa’asea na maua e le Samoa News talu mai le vaiaso na te’a nei, na maua ai loa le avanoa e fesiligia ai le Pule o le Ofisa o Galuega Lautele a le malo i Ofu e tusa ai o lenei mataupu, na teena ai e le susuga Pita Ili tu’uaiga e faapea o lo o tufa fua kalone kesi a le malo e utu fua ai ta’avale a tagata tua fa’apea ai ma va’a alia a i latou o lo o i ai va’a fagota, aemaise ai o le la’uina lea o mea faufale na totoe mai le fausiaina o le Ofisa Tutotonu a le malo i Ofu, le EOB e fa’amae’a ai le galuega o lona fale o lo o fausia i le taimi nei.

 

“E leai se mea fa’apena o tupu i Ofu, Manu’a nei, e le o tufa fuaina ni kalone kesi i tagata tua o le itumalo, e le o i ai fo’i ni mea faufale o ave e fau ai lo’u fale”, o le saunoaga manino lea a le susuga a Pita i se talanoaga ma le Samoa News i luga o le telefoni i le taeao ananafi.

 

Na taua e ni isi o le itumalo na valaau mai i le Samoa News e fa’apea, o uta o kalone kesi a le malo o lo o avatu i Tutuila nei mo Ofu, Manu’a, o le afa o ia kalone kesi o lo o utu i totonu o le pamu kesi a le malo, ae o le isi afa e teu i totonu o le Ofisa, mo le fa’amoemoe e utu ai ta’avale ma va’a fagota a tagata tua ae maua ai tupe a le aufaigaluega a le Ofisa o Galuega Lautele a le malo.

 

Na taua e se tasi o molimau e fa’apea, i le taimi na le lava ai le fa’asoa o le kesi i Ofu, o le to’atele o ta’avale a tagata o le itumalo na tutu uma ua le toe feoa’i, ona ua leai se kesi e utu ai, se’i vagana ai lava ta’avale a tagata faigaluega a le Ofisa o Galuega Lautele a le malo fa’apea ai ma tagata o le nu’u o lo o latou fai paaga na mafai ona feoa’i, ona o lo o utu fua i kalone kesi sa teu i totonu o le Ofisa.

 

“Ou te ofo pe fa’apefea ona fa’apeleni le tupe o lo o maua ma le aofa’i o kalone kesi na aumai i Tutuila, pe afai o le afa o kalone kesi o lo o fai ai gaioiga fa’aalatua a le aufaigaluega”, o le tomumu lea a se tasi o molimau mai Ofu, Manu’a.

 

Sa ia taua fo’i i le Samoa News lona vaai tino lava i le taimi na utu ai ta’avale a tagata o le itumalo i kalone kesi sa teu i totonu o le Ofisa.

 

Na taua e ni isi o molimau e fa’apea, ua mae’a ona ia logoina le Ofisa o le Kovana fa’apea ai ma le Ofisa o le Fa’atonusili o Galuega Lautele a le malo, ae foliga mai e le o amanaia la latou fa’asea.

 

Na ioeina e Pita i le Samoa News le i ai o isi kalone kesi o lo o teu i totonu o le Ofisa, e fa’aagaga lea e totogi ai va’a alia o lo o fa’aaoga e le Ofisa e aumai ai a latou meli mai Ta’u.

 

“O le taimi lava e alu ai le va’a alia e piki mai le meli a le Ofisa mai Ta’u, ona ave fua lea i ai o le kalone kesi e totogi ai le va’a, ona e leai se tupe e totogi ai le va’a, ae $300 le totogi o le va’a alia e alu ai i Ta’u ma toe fo’i mai i Ofu, o gaioiga uma nei o lo o tusia i totonu o la’u ripoti o lo o tu’uina atu i le matou Ofisa i Tutuila, e fa’apaleni ai kalone kesi o lo o auina mai i Ofu, ma fa’ailoa ai le auala o lo o fa’aaogaina ai kesi a le malo o lo o auina mai iinei”, o le saunoaga lea a Pita.

 

Ina ua fesiligia le susuga a Pita po o anafea na amata mai ai lea gaioiga, ae na tali le ali’i Pule, “E le fou le gaioiga lea, o le mea lava ua leva ona sau ai le Ofisa mai le tele o tausaga ua mavae”.

 

I tulaga o laupapa o lo o fausia ai lona fale, na ioeina e le ali’i Pule lona fa’aaoga o fasi laupapa na totoe mai le fausiaina o le fale a le malo, le EOB ua le toe aoga, e fa’aaoga i le fa’amae’aina o se vaega o lona fale.

 

“Sa ou fai i le aufaigaluega, afai e i ai se tasi e mana’o i fasi laupapa na totoe ua le toe aoga, ona ave lea, ae talu ai e leai ma se isi na mana’o i ai, o le mafua’aga lea na ou manatu ai loa e ave fasi laupapa ia e fa’aaoga ma a’u, ae le fa’apea o ni laupapa fou”, o le isi lea saunoaga a Pita.

 

Sa ia taua fo’i le mae’a lea ona fesiligia o ia e le Sui Fa’atonusili e tusa ai o lenei mataupu, ma ua mae’a fo’i ona ia fa’amaninoina i ai tulaga uma e pei ona ia fa’aalia i le Samoa News.

 

E le i manuia taumafaiga a le Samoa News i le tau sailia o se finagalo mai le Tama’ita’i Fa’atonusili e tusa ai o lenei mataupu.

Comment Here