Fa’asala se ali’i mai Samoa i le toese faia amio mataga i se teine talavou


[ata: SN]

O le ali’i e 24 tausaga le matua mai Samoa lea na tali ioe i moliaga o le faiaiga ma se teineitiiti e 15 tausaga ua fa’asalaina e le Fa’amainoga Maualuga e tuli masina e ono i le toese i Tafuna, o se tasi lea o vaega o lana fa’asalaga fa’anofo va’avaaia mo le 5 tausaga.

 

Na ulua’i tu’uaia e le malo le ali’i o Ashley Afamasaga i moliaga mamafa e 8, ae i lalo o se maliliega na sainia e Afamasaga ma le malo i le masina o Novema 2017, lea fo’i na talia e le Fa’amasinoga Maualuga, sa tali ioe ai le ua molia i moliaga e lua, ae solofua moliaga sa totoe.

 

O moliaga mamafa e 2 lea sa tali ioe i ai Afamasaga, o moliaga o lona tagofia lea o itutinosa o se teineititi. Sa maua i fa’amaumauga a le fa’amasinoga ia Afamasaga na ulufale mai i Amerika Samoa i lalo o le pemita 30-aso ae le’i toe foi lava i lona atunu’u.

 

O le aso 22 o Tesema 2017 na lau ai le fa’asalaga o Afamasaga. Ae le’i lauina lana fa’asalaga sa fa’atoese le ua molia i le fa’amasinoga ma sa taua ai lona salamo i le solitulafono e pei ona tuuaia ai o ia.

 

Saunoa Afamasaga e faapea i le vaitaimi atoa o taofia ai i le toese, e ala o ia i taeao uma ma tilotilo atu i pa sima o le toese ae le masani ai lona olaga, i le taofia i le toese.

 

Sa ia talosaga i le fa’amasinoga ina ia fa’amagalo o ia ma ia toe talosagaina ai foi mo se avanoa e toe foi ai i lona aiga e fesoasoai ia i latou.

 

I le finauga a lana loia fautua ia Douglas Fiaui sa ia taua ai faapea o le ua molia sa malaga mai i Amerika Samoa ia Ianuari 2017 ina ia mafai ona toe feso’otai ma lona tina sa fanau mai ai, ma saili se lumanai manauia mo ia.

 

Ae peitai, saunoa Fiaui, ma taua se mea sese sa faia e le ua molia ona o lona auai i se teineitiiti e 15 tausaga le matua. Ma o le ua molia ua salamo i lana solitulafono, ma e agava’a Afamasaga i se fa’asalaga fa’anofovaavaia e aofia ai lona tuua o Amerika Samoa ae toe foi atu i lona atunu’u.

 

Mo le itu a le malo, sa saunoa le sui loia sili ia Robert Morris e faapea, e laititi tausaga o le ua molia ma e leai na fa’amaumauga sa aafia o ia i nisi solitulafono.  Na ia lagolagoina le talosaga a Fiaui mo se fa’asalaga fa’anofovaavaaia e aofia ai le fa’atonuina lea o le ua nofosala ina ia tuuina Amerika Samoa.

 

O le afioga i le ali’i Fa’amasino Sili lagolago le tumau ia Elvis P. Patea fa’atasi ai ma le lagolago a le alii fa’amasino ia Satele, sa fofogaina lenei mataupu. Saunoa Patea e faapea ua tuuina atu i le fa’amasinoga se fa’amatalaga a matua o le teineitiiti na aafia.

 

I le fa’asalaga a le fa’amasinoga, e ta’i lima tausaga i le toese mo moliaga ta’itasi e lua, ma lona uiga e 10 tausaga. Ae peitai, saunoa Patea o ia moliaga e ta’i lima tausaga e tuli fa’atasi i le taimi e tasi - o lona uiga e 5 tausasga i le toese.

 

Ae ui i lea o le a fa’amalumalu le tuliina o le 5 tausaga ae fa’anofo vaavaia Afamasaga mo le 5 tausaga, i lalo o tuutuuga e tatau ona ia usitaia. O nisi o nei tuutuuga, na te tuliina le 20 masina i le toese, ae peitai, o le a fa’amalumalu le 14 masina, ae tuli na o le ono masina, pe afai e usitaia uma tuuuuga o le fa’anofo vaavaia.

 

O le ono masina i le toese e aofia ai masina ma aso lea sa taofia ai Afamasaga i le toese e fa’atali ai lana mataupu a’o fa’agasolo i luma o le fa’amasinoga. Ma a maea ona tuli le ono masina ona ia tuua lea o Amerika Samoa, ae toe foi atu i lona atunu’u, ma ia auai i fafo atu o Amerika Samoa i le lima tausaga o le fa’anofo vaavaia.

 

E pei ona talosagaina i lalo o le tulafono a Amerika Samoa, ua fa’atonuina Afamasaga ina ia faia suesuega o le fa’ama’i o le HIV ma ia lesitala lona suafa i le Ofisa o le Loia Sili i le lisi o i latou ua fa’asalaina ona o le faia o feusuaiga fa’asaga i le fanau laiti.

 

Ua fa’asaina foi ona ia taumafai e fa’afesoota’i le teineitiiti na aafia ma a maea ona tuli le ono masina i le toese, ona tatala lea o ia i tua i le Ofisa Fa’anofo Vaavaia mo le faafoi o Afamasaga i lona atunu’u.

 

Sa fa’atonuina foi e le faamasinoga le loia a le malo ina ia tuuina atu se kopi o le faaiuga lenei a le fa’amasinioga i le Immigration Office ina ia mafai ai ona tuu le suafa o Afamasaga i le “Look-out-List” a le immigration.

 

I le taimi na tali ioe ai Afamasaga i le masina o Novema 2017 i moliaga e pei ona tuuaia ai o ia, sa ia ta’utino ai e fa’apea, i se taimi o le aso 24 Mati e oo atu i le aso 24 Aokuso o le tausaga e 2017, sa ia faia ai ni uiga mataga i se teineititi e 15 tausaga le matua. O ia uiga mataga e aofia ai lona tagofia o ona itutinosa, pule i lona tino, atoa ai ma le feusua’i ma ia i se auala fa’asolitulafono.

Comment Here