Ads by Google Ads by Google

Fa’asala i le falepuiui se ali’i mai Fagasa

ausage@samoanews.com

O le ali’i mai Fagasa e to’atolu ona alo lea na ulufale fa’amalosi i totonu o le fale o se aiga o le nu’u i le po, ma ia taumafai ai e faia ni uiga mataga i se teineititi laititi o lo o moe, ua taofia nei o ia i le toese i Tafuna mo le 28 masina, o se tasi lea o tuutuuga o lana fa’asalaga fa’anofovaavaaia e 7 tausaga na tu’uina mai e le fa’amasinoga maualuga i le aso Faraile o le vaiaso na te’a nei.

 

Ae talu ai o le talosaga a si ona faletua sa tu’uina atu i ali’i fa’amasino mo se avanoa e toe tatala atu ai i tua le ua molia e alu e faigaluega, ona e na o ia e fa’alagolago i ai le tausiga o le la fanau laiti e to’atolu, na manatu ai loa afioga i ali’i fa’amasino o le a loka pea o ia i le falepuipui, ae o le a mafai ona tatala o ia i tua e alu e faigaluega a o tuli ai lana fa’asalaga, pe afai e fa’amaonia atu e le ua molia i le fa’amasinoga le maua o sana galuega e mafai ai ona galue ma maua sona totogi e fesoasoani ai i le tausiga o lona aiga.

 

O se fa’alavelave na tula’i mai i le masina o Aperila na te’a nei i Fagasa, ina ua ulufale fa’amalosi le ali’i o Tanu Iosefa i totonu o le fale o se aiga o le nu’u ma ia faia ai uiga mataga i le teineititi na a’afia, na mafua ai loa ona ta’usala o ia e le fa’amasinoga maualuga i moliaga mamafa o le talepe fale i le tulaga lua, o se solitulafono e mafai ona fa’asala ai o ia i le toese mo le umi e le silia i le 7 tausaga, pe fa’asala foi i le salatupe e le silia i le $5,000, fa’apea ai ma lona tagofia o itutinosa o se teineitiiti e laititi i lalo o le tulafono, o se solitulafono e mafai ona fa’asala ai o ia i le toese mo le umi e le silia i le 5 tausaga, po o le fa’asala i le salatupe e le silia i le $5,000.

 

Na fa’atoese Iosefa i le fa’amasinoga e tusa ai o lana solitulafono sa fai, ma ia taua ai lona salamo moni mai lana mea sese sa faia. Sa ia talosagaina le fa’amasinoga mo se avanoa e toe fo’i atu ai i tua e tausi lona to’alua ma lana fanau, fa’apea ai lona aiga ma ona matua, ma fa’aauau lana tautua i le nu’u ma le Ekalesia.

 

Sa ia taua fo’i e fa’apea, e na o ia lava o lona aiga e faigaluega e maua mai ai se tupe e tausi ai si ana fanau laiti. Na molimau le to’alua a le ua molia ma ia fa’amaonia i le fa’amasinoga le tulaga lea, e na o lona to’alua lava e faigaluega e maua mai ai se tupe e tausi ai le la aiga.

 

Na vaaia le mafatia o le Tina i luga o le nofoa molimau, a o ia augani i ali’i fa’amasino mo se avanoa e toe tatala atu ai lona to’alua i tua, sa vaaia fo’i le mafatia o le ali’i ua molia ao ia fa’alogo ma le toto’a i upu o le molimau a lona faletua lea sa tu’uina atu i luma o ali’i fa’amasino.

 

Sa ia taua fo’i e fa’apea, talu mai le taimi na taofia ai lona to’alua i le falepuipui, sa faigata ia te ia ona saili mai se tupe e tausi ai si ana fanau laiti. O le matutua o le fanau e aofia ai le 6 tausaga, 2 tausaga ma le pepe e 7 masina.

 

Na ia fa’ailoa fo’i i le fa’amasinoga e fa’apea, e i ai le tuutuuga a le latou afioga e faia i mataupu fa’apenei, afai e fa’asala e le pulega a ali’i ma faipule o le nu’u se tagata mai sana mea sese sa faia i totonu o le nu’u, e le tatau ona toe tu’uina atu lea mataupu i le tulafono, peita’i o lona to’alua le ulua’i tagata o le nu’u ua le mafai ona fa’atinoina ai lea aiaiga a le nu’u, ona o lea ua mae’a ona totogi le sala a lona to’alua i le nu’u, ao lea lava ua fa’aauau le mataupu i le tulafono ma mafua ai loa ona loka lona to’alua.

 

O le fia malamalama atili o ali’i fa’amasino i le fa’asalaga a le nu’u, na mafua ai ona fesili le afioga i le fa’amasino sili ia Michael Kruse i le Tina, e ta’u atu le fa’asalaga a le nu’u sa faia i lona to’alua, ae na taua e le Tina e fa’apea, o le sala i le nu’u e aofia ai le tupe e $3,000, fafaga uma le nu’u, ta’i le sua a le nu’u, ta’i ma le sua a le aiga o le teineititi na ‘aafia, fa’apea ai ma le ie toga tele o le fa’amagaloga.

 

Na fa’ailoa e Kruse i le Tina e fa’apea, “O lea la ua uma ona fafaga e la outou aiga le nu’u, ae o lea ua sauni le fa’amasinoga e fa’asala lou to’alua e tusa ai o lona soli o le tulafono”.

 

Na talosaga le ali’i loia sa tula’i mo Iosefa ia Michael White i le fa’amasinoga mo se avanoa e fa’amama ai se fa’asalaga mo le ali’i ua molia, ae tu’u atu le avanoa e fo’i ai i lona aiga e saili sana galuega e tausi ai lana fanau, ma toe fa’asa’o mea ua sese i lona olaga, peita’i na matua finau le loia a le malo ia Bob Pickett i le fa’amasinoga ina ia fa’asala le ua molia i se fa’asalaga pito sili ona mamafa, talu ai le matuia o lana gaioiga sa faia.

 

Na taua atili e Pickett e fa’apea, e le galo i le mafaufau o le teineititi na ‘aafia gaioiga ma uiga sa fa’aalia e le ua molia i le po na alu atu ai i lo latou fale ma tago atu ia te ia a’o moe, ma o aso uma e ola ai o ia i lenei olaga, o le a pei o se ata fa’asolo i lona mafaufau le fa’alavelave sa tupu, ma atonu o le a fa’a faigata ai fo’i ona maua sana moe i le po.

 

Na talia e Kruse fa’afinauga ina ia avea le fa’asalaga a le nu’u ua mae’a ona fa’atinoina e le ua molia ma lona aiga, o se tasi lea o itu e fa’amama ai se fa’asalaga a le fa’amasinoga.

 

E 7 tausaga na manatu le fa’amasinoga e loka ai Iosefa i le falepuipui, peita’i ua fa’amalumalu lona tuliina o lea fa’asalaga, ae ua fa’anofovaavaaia nei o ia mo le 7 tausaga i lalo o poloaiga e ao ona ia usita’i i ai.

 

O ni isi o ia poloaiga e aofia ai lona tuliina o masina e 28 i le toese i Tafuna, ia su’esu’eina lona tino po o i ai se siama o le fa’ama’i o le HIV, lesitala lona igoa i le lisi o tagata ua ta’usala e le fa’amasinoga i moliaga o le faia lea o uiga mataga i fanau laiti, ma ia aua ne’i ona toe taumafai e fa’afeso’ota’i le teineititi na a’afia i lana solitulafono.