Ads by Google Ads by Google

Fa’amavae aloia Puleleiite mai tofi Faipule Itumalo Sua #1

Le afioga i le ali’i faipule ia Puleleiite Li’matua Tufele, lea ua fa’amavae aloaia mai i le nofoa o le itumalo o Sua #1.  [ata AF]
tusia Ausage Fausia

I le tuana’i ai o le 3 masina talu ona tofia le afioga a Puleleiite Tufele Li’amatua e avea ma Pulesili o le Ofisa o Fesootaiga a Amerika Samoa (ASTCA), o le taeao ananafi na aloaia ai i luma o le maota o sui lana fa’amavaega mai nofoa a lona itumalo o Sua #1, e pei ona toe filifilia ai o ia mo le isi 2 tausaga.

E fa nofoaiga sosoo sa avea ai Puleleiite ma faipule o le itumalo o Sua #1, lea sa tautua ai i le tele o komiti a le maota, e aofia ai le avea ma taitaiffono o le komiti o Fesootaiga a le maota o sui.

I le taimi o folafolaga a le maota o sui i le taeao ananafi, na fa’ailoa aloaia ai e le afioga i le Fofoga Fetalai i afioga i Faipule, lona tauaao aloaia lea o le tusi fa’amavae mai ia Puleleiite.

“E fa’ailoa aloaia atu i le paia o le maota, o lea ua ou taulimaina tusitusiga mai le afioga ia Puleleiite, ua fa’amavae mai o ia i le tofi o le itumalo o Sua #1, pau lena o le tulaga o lea ua oo mai i le taimi nei, ae o ni isi tulaga i tua atu, o le a tatou toe fetufaa’i ai i le vaiaso fou,” o le saunoaga lea a Savali Talavou Ale.

E na o le tasi lava le aso na oo atu ai le afioga Puleleiite i le tauaofiaga a le maota o sui, e na o le aso Gafua, Aokusu 21, le aso na toe a’e mai ai Fono Faitulafono mai lana malologa e 4 vaiaso.

O le aso lea na fesiligia ai o ia e le sui fofoga fetalai ia Fetui Fetu Jr sa ta’ita’ia galuega a le maota, poo i ai se mataupu o ia fia saunoa ai, ona ua tele aso fono e le o nofoia le nofoa o lona itumalo i totonu o le maota.

E leai se mataupu faapitoa na saunoa i ai Puleleiite ina ua tula’i e fa’aaoga lona avanoa, se’i vagana ai lona valaauliaina o afioga i Faipule, ina ia latou auai atu i le fale’aiga i Nu’uuli mo se taumafataga o le aoauli, ma latou talatalanoa ai i ni isi o mataupu e le tatau ona fa’alauiloaina fa’alaua’itele i luma o le maota ona o lo o filogia i le au fa’asalalau.

E le i finagalo le afioga a Puleleiite e tu’uina mai ni fa’amatalaga se tele e fa’atatau i sana fuafuaga e fa’amavae mai le tofi Faipule o le itumalo, ina ua fesiligia o ia e le Samoa News i le aso lava lea i fafo o le maota fono.

Sa ia taua e fa’apea, e le o i ai sana fuafuaga mautu e fa’atatau i le tofi o le itumalo, ona o lo o tau fa’amautu ni isi o fuafuaga mo le galuega fou ua tofia i ai o ia.

Na toe fesili le Samoa News ia Puleleiite i le aso lava lea, pe sa i ai sona finagalo e oo mai i luma o le maota o sui e fa’amanino le mataupu e pei ona fesiligia e se tasi o Faipule, i le suiga ua ia faia ua mafua ai ona fa’amuta auaunaga a ni isi o tagta faigaluega ua tele tausaga o galulue i le ASTCA.

Ae na saunoa Puleleiite e fa’apea, e le i o o atu ia te ia se fa’amatalaga e uiga i se mataupu o lo o fesiligia ai o ia e le maota.

“Ae afai e i ai isi fa’amatalaga e fa’atatau i le tofi o le itumalo ma le maota, o le a ou fa’ailoa atu i le taimi e mautu ai se fa’aiuga,” o lana saunoaga lea.

I le toe tauaofia ai o le Fono Faitulafono mo lana tauaofiaga lona 2 lenei i le masina o Iulai na te’a nei, na talosagaina ai e le afioga i le ali’i faipule ia Sataua Dr. Samuelu Mataese se avanoa e valaau ai se iloiloga ma le Pulesili fou o le ASTCA ia Puleleiite, se’i fa’amanino le mataupu e fa’atatau i suiga fou ua faia, lea ua a’afia ai galuega a ni isi o tagata o le atunu’u e aofia ai ma tagata o lona itumalo.

Saunoa Sataua e fa’apea, o se tasi o fesili o lo o tu’u fesili ai le to’atele o le atunu’u, pe tala feagai suiga fou ua faia e le Pulesili a le ASTCA.

E fa’alua ona tula’i le afioga a Sataua mo le talosagaina o lenei iloiloga, peita’i e o o mai lava i le taeao ananafi na aloaia ai le fa’amavaega a Puleleiite, e le i fa’ataunu’uina lava lea iloiloga.

O le fa’aiuga e pei ona faia e Puleleiite e fa’amavae mai le nofoa a lona itumalo, e talitonu ni isi o afioga i Faipule, o se fa’aiuga lea ua leva na tatau ona ia faia ina ua fa’atoa tofia o ia e avea ma Pulesili o le ASTCA.

Na taua e ni isi o afioga i Faipule lo latou fa’aaloalogia o le tulaga fa’ata’ita’i i totonu o le Fono ma le faigamalo a Amerika Samoa, ae a o o mai loa i tulaga o le usitaia o le tulafono, e tatau i tagata uma ona tausisi ma mulimulita’i i le tulafono.

“E fa’afetai i le fa’aiuga ua faia e le ali’i faipule, ae o se fa’aiuga ua leva na tatau ona ia faia i le taimi na fa’atoa tofia ai o ia i lona tulaga fou ua i ai nei. Aua o le fa’afitauli sa tula’i mai, i le taimi na ia faia ai fa’aiuga mo le Ofisa o Fesootaiga a le malo, o le taimi lea o lo o avea ai o ia ma sui filifilia o le itumalo o Sua i le Fono Faitulafono,” o le saunoaga lea a se tasi o Faipule.

Na taua atili e lea faipule e fa’apea, “Afai o matou o ta’ita’i ua filifilia e itumalo e fai ma o latou sui, e tatau ona matou faia fa’ata’ita’iga lelei ina ia mulimuli ai tupulaga o le lumana’i, aua afai o ituaiga fa’ata’ita’iga nei e faia e i matou nei o ta’it’a’i, o le fai mai o le Fa’avae Toe Teuteu a le atunu’u, e le tatau ona galue se tasi i galuega a le malo ae toe avea fo’i ma faipule poo se senatoa, ae tau solomua ta’ita’i ona le tausisi i le Fa’avae.”