Fa’amaonia moliaga o le gaoi fa’asaga i se ali’i 19 tausaga

ausage@samoanews.com

O le ali’i e 19 tausaga le matua lea na tu’uaia e le malo fa’atasi ma ni ali’i se to’alua e talavou i lalo o le tulafono, i lo latou talepeina lea o le Faleaoga a le Aoga Maualuga a Tafuna i le fa’aiuga o le tausaga na te’a nei atoa ai ma le amataga o le tausaga lenei 2016, ua ta’usala nei o ia e le fa’amasinoga maualuga i le moliaga o le gaoi, ina ua talia e le fa’amasinoga se maliliega sa latou sainia ma le malo.

 

O lo o taofia pea i le toese i Tafuna le ali’i o Matthew Barja, e fa’atali ai le aso 13 Ianuari 2017 lea ua fa’atulaga e lau ai lona fa’asalaga.

 

E 7 moliaga mamafa o lo o tu’uaia ai e le malo le ali’i o Matthew Barja, o ia moliaga e aofia ai moliaga e 3 o le talepe fale i le tulaga muamua, ma moliaga e 4 o le gaoi, ae i lalo o le maliliega lea ua mae’a ona sainia e le malo ma Barja, lea fo’i ua talia e le fa’amasinoga maualuga, ua tali ioe ai nei Barja i le moliaga o le gaoi.

 

I le taliaina ai e le fa’amasinoga o le maliliega na sainia e itu e lua, na toe talosaga ai loa le malo ina ia solofua isi moliaga o lo o totoe ai i le pepa o tagi sa latou fa’aulu fa’asaga ia Barja, lea fo’i na talia e le fa’amasinoga.

 

E pei ona taua i fa’amaumauga o le maliliega a Barja ma le malo, ua ta’utino ai le ua molia e fa’apea, i le va o le aso 30 Novema e oo atu i le aso 7 ma le 8 o Tesema 2015, fa’apea ai ma le aso 1 ma le 2 o Ianuari 2016, sa latou aga’i atu ai ma ni ali’i se to’alua e laiti i lalo o le tulafono ma talepe le nofoaga o le aoga maualuga a Tafuna, ma latou gaoia ai ni meaaoga mai totonu o le Ofisa a le aoga, e pei o se ato sa i ai iPad e 45, fa’apea ai ma se laptop sa i totonu o le Ofisa o le vaega a le JROTC.

 

Na ta’utino atili Barja i totonu o le maliliega e fa’apea, sa alu ma le isi iPad e tasi na latou gaoia mai, lea e silia i le $100 lona tau pe a fa’atupeina.

 

Na ta’utino atili fo’i Barja e fa’apea, o le gaioiga sa ia faia i lea aso, sa faia lea e aunoa ma se fa’atanaga mai le aoga, ae sa fa’atinoina lava ona o le manatu ina ia ave fa’agaoi meatotino a le aoga, ina ia le mafai ai e le aoga ona latou toe mauaina ia mea totino.

 

O se tasi o itu na naunau le fa’amasinoga e fia malamalama atili i ai, a o fa’agasolo le fesiligiaina o Barja e tusa ai o tuutuuga o le latou maliliega ma le malo, o le tau o le iPad e tasi, ina ia fuafua i ai se fa’aiuga a le fa’amasinoga i le ituaiga fa’asalaga e tatau ona tu’uina atu i le ua molia.

 

Na fesili le fa’amasinoga i le itu a le malo poo le a le gaioiga a le malo ua faia i ali’i e to’alua e laiti i lalo o le tulafono lea o lo o taua na auai ma Barja i le osofaiga o le faleaoga a Tafuna, ae na taua e le loia a le malo ia Jerard Murphy, o lo o molia fo’i i laua i moliaga o lo o faia fa’asaga i fanau e laiti i lalo o le tulafono.

 

Na toe fesili le ali’i fa’amasino sili ia Michael Kruse i le itu a le malo, poo le a se tala e fa’atatau i iPad sa gaoia, ae na tali Murphy e fa’apea, e tusa ai ma ripoti ua tu’uina atu i lona Ofisa, ua mae’a ona toe fa’afo’i i le aoga mea totino sa gaoia.

 

Saunoa atili Kruse e fa’apea, o le popolega o le fa’amasinoga, i mao sasalu le fa’amasinoga ua uma ona toe fa’afo’i iPad sa gaoia, ae emo ane le ata o lo o “nofo nofo” ai lava i le potu e teu ai mea molimau a Leoleo, ma i’u ina leiloloa ese atu ai.

 

Ina ua fesiligia e Kruse ia Barja po o fea ua ave i ai meatotino sa ia gaoia na tali le ua molia, e 8 iPads sa ia fa’atauina, e 2 na alu ma ia, ae o isi iPads na toe fa’afo’i uma i Leoleo.

Comment Here