E 30 tausaga o se ali’i ua fa’amaonia nei e le Fa’amasinoga Maualuga moliaga mamafa o le gaoi fa’asaga ia te ia, i le mae’a ai lea ona talia e le fa’amasinoga o se maliliega na sainia e lea ali’i ma le malo i le taeao ananafi.

I le tali ioe ai la o le ali’i o Daniel Taufua i moliaga mamafa e 3 o le gaoi, sa ia ta’utino ai i le fa’amasinoga lona osofaia o ni faleoloa se tolu i le va o le masina o Tesema 2016 e o o mai i le masina o Fepuari 2017, ae ave fa’agaoi ai se vaega tupe e silia i le $3,000.

E 2 mataupu tau solitulafono mamafa na faila e le malo fa’asaga ia Taufua. I le mataupu muamua, o lo o tu’uaia ai o ia i moliaga mamafa e 2 o le talepe fale i le tulaga muamua fa’apea ai ma le gaoi. I le mataupu lona lua, o lo o tu’uaia ai o ia i moliaga mamafa e 6, lea e aofia ai moliaga e 3 o le gaoi, moliaga e tasi o le faomea i le tulaga muamua, moliaga o le talepe fale i le tulaga muamua, atoa ai ma le moliaga e tasi o lona fesoasoani lea i se isi tagata e fa’atino le solitulafono o le gaoi.

I lalo o le maliliega ua sainia e Taufua ma le malo ma ua talia fo’i e le fa’amasinoga, ua tali ioe ai o ia i moliaga mamafa e 3 o le gaoi o lo o i le tagi lona 2 sa fa’aulu e le malo, i lalo o tuutuuga e solofua e le malo moliaga o loo totoe i le tagi lona 2 sa latou fa’aulu, atoa ai ma le solofua o moliaga e 2 o loo i le tagi muamua sa latou fa’aulu fa’asaga ia te ia.

I le tali ioe ai o Taufua i le moliaga o le gaoi, sa ia ta’utino ai e fa’apea, i se taimi o le aso 1 Fepuari, 2017 i Tafuna, sa ia gaoia mai ai se tinoitupe e tusa ma le $120 mai le Fale Tamea (Laundromat).

I le isi moliaga o le gaoi, na ta’utino ai Taufua e fa’apea, i se taimi o le aso 1 Fepuari 2017, sa ia ulufale fa’amalosi ai i totonu o se kamupani i Fagaima ma gaoia ai se masini tupe atoa ai ma se tinoitupe e tusa ma le $3,000.

I le moliaga lona tolu o le gaoi e pei ona ia tali ioe i ai, sa ia ta’utino ai e fa’apea, i se taimi o le masina o Tesema 2016, sa ia ulufale fa’amalosi ai i totonu o se faleoloa ma le fa’amoemoe e fa’atino ai le moliaga o le gaoi.

A o i ai o ia i totonu o le faleoloa i Nu’uuli, sa ia gaoiina ai se masini tupe atoa ai ma se tinoitupe e $160.

E pei ona manino i fa’amaumauga a le fa’amasinoga, e to’alua i si ali’i o lo o tuu’aia fa’atasi e le malo ma Taufua i lenei mataupu, o i laua ia o Aki Lee Jungblut ma Nassan Tupuola, o i laua ia o lo o tu’uaia i lo la fesoasoani i gaioiga fa’asolitulafono sa faia e le ua molia, ma ua mae’a fo’i ona sainia ni maliliega i le va o ia ali’i ma le malo.

O ni isi o tuutuuga o le maliliega a le malo ma Taufua, e aofia ai le toe totogi atu e Taufua ma i laua o loo tu’uaia fa’atasi i latou i lenei mataupu, tupe i tagata sa aafia i lenei solitulafono, ua manatu fo’i le malo e finau i le fa’amasinoga mo se fa’asalaga mama, peita’i ua malamalama Taufua, tusa lava pe finau loia mo se fa’asalaga mama, e pule le fa’amasinoga i le ituaiga fa’asalaga e fa’asala atu ai o ia, fuafua lava i le mamafa o lana solitulafono sa faia.

O le moliaga o le gaoi, o le vaega C lea i le fa’atulagaina o solitulafono mamafa, lea e mafai ona fa’asala ai se tasi i le toese mo le umi e le silia i le 7 tausaga, po o le fa’asala fo’i i le salatupe e le silia i le $5,000, po o le fa’asala fo’i i fa’asalaga uma ia e lua.

O lo o taofia pea Taufua i le toese i Tafuna e fa’atali ai le aso 6 Iulai lea ua fa’atulaga e lau ai lana fa’asalaga.