Ads by Google Ads by Google

Fa’amanuiaga aso Fa’afetai mai le afioga Kovana mo tagata uma AS

ausage@samoanews.com

E ui o le aso ananafi lea na fa’atauaina ai e le atunu’u le Aso Fa’afetai o lenei tausaga, peita’i na taua i le feau fa’amanuia mai le afioga i le Kovana o le atunu’u, le tofa i le Tootoo ia Lolo Matalasi Moliga le taua tele o lenei aso fa’amanatu mo tagata o le atunu’u, latou te silafia ai le taua o le loto fa’afetai i galuega lelei sa faia e se tasi mo le isi.

 

Na taua e Lolo e fa’apea, a o tu’u fesili ai le to’atele i le taua o lenei aso fa’amanatu, e to’atele i latou e le o manatunatu i le tele o fa’amanuiaga ua sasa’a mai e le Atua mo Samoa ma aiga ta’itasi, peita’i e tatau i soo se Kerisiano ona ia fa’afetaia le Atua ona ia fa’amanuiaga e tele.

 

E le gata e tatau ona fa’afetai i manuia tele ua tatou maua mai le Atua, ae tatau fo’i ona fa’afetai i lana tausiga alofa i soo se aiga o le atunu’u, ina ua mafai ona sopo mai le folauga e aulia mai ai lenei aso fa’amanatu i lenei tausaga.

 

“A o tatou saogalemu pea e ala i le fa’aaogaina o le poto fa’aonaponei, ua tele ai lava ina tatou le maitauina fa’afitauli o lo o tafiesea ai mafutaga ma so’otaga vava lalata i lo tatou va fa’afeagai ai, atoa ai ma le le lava o avanoa e feso’ota’i ai ma atina’e lagona o le agaga fa’afetai i fa’amanuiaga ua tatou maua”, o se vaega lea o le feau fa’amanuia a le ali’i kovana mo tagata uma o Amerika Samoa.

 

Na taua atili e le ali’i kovana le tele ma faula’i o mafua’aga e ao ai i le tagata ona ia fa’afetaia le alofa o le Atua, ona e foliga mai ua fa’apito le foa’i a le Atua i tagata o Amerika Samoa, pe a fa’atusatusa atu i faigata ma fa’afitauli o lo o feagai ma isi atunu’u o le lalolagi, lea ua leai ai se fia ‘ai i Tutuila ma Manu’a, ina ua tele ma faula’i ana fa’amanuiaga i soo se aiga.

 

“Mo lenei Aso Fa’afetai, ou te valaau atu ma le fa’aaloalo i le atunu’u atoa, ina ia tatou fa’atino le agaga o lenei vaitausaga fiafia e ala i lou faia os e mea lelei mo se uso a tagata. Tatou fa’atino ia se isi fa’aleleia fou i lenei Aso Fa’afetai mo tatou tuaoi, ma fa’afetaia ai pea le Atua mo le tele o ana fa’amanuiaga ua tatou talia ma maua i lenei tausaga”, o se vaega lea o le saunoaga a le ali’i kovana.

 

I le tuana’i ai o le aso Fa’afetai i le aso ananafi, na molimauina ai le to’atele o le atunu’u sa latou fa’aaoga tatau lenei aso malolo e faia ai mafutaga fiafia ma aiga, aemaise ai o ‘aiga e fa’ailoa ai le agaga o le Aso Fa’afetai.

 

O ni isi sa fai meaalofa i uo ma aiga, ae o isi sa fa’aalia lo latou agaga fa’afetai e ala i meaalofa eseese.