Fa’amanino Kruse mafua’aga filifilia Fa’amasino Lagolago fa’aopoopo


Le afioga i le senetoa ia Paepae Iosefa Faia i le taeao ananafi i le iloiloga a le komiti o le Senate mo le tofiga o le fa’amasino lagolago. [ata: FS]
ausage@samoanews.com

I le tusi a le afioga i le Fa’amasino Sili sa tu’uina atu i le Kovana i le aso 25 Oketopa, o lo o fa’amanino ai e Michael Kruse ia Lolo Matalasi Moliga le mafua’aga autu ua ia finagalo ai e tofia se isi Fa’amasino Lagolago se to’atasi e fesoasoani i galuega a ali’i Fa’amasino o le Fa’amasinoga Maualuga a Amerika Samoa.

 

Na taua e Kruse i lana tusi e fa’apea, o le fa’aiuga ina ia filifilia se Fa’amasino Lagolago fa’aopoopo, na afua mai ina ua toe aga’i atu le afioga i le Matua ia Togiola T. A Tulafono lea sa avea ma Kovana o le malo, e toe fa’aauau lona tulaga o se Loia i totonu o le Asosi Loia a Amerika Samoa, mo le tauaveina o mataupu eseese i luma o le Fa’amasinoga.

 

Ae pei ona silafia, o Fa’amasino Lagolago e to’afa o lo o galulue i le Fa’amasinoga i le taimi nei, o i latou uma ia na tofia e Togiola i le taimi a o avea o ia ma Kovana. Na taua e Kruse le talia leleia o le toe ulufale atu o Togiola i lona tulaga o se Loia, peita’i, o taimi uma lava e aga’i atu ai o ia i luma o le Fa’amasinoga, e avea ai ma fa’afitauli lona tula’i i luma o Fa’amasino Lagolago sa ia filifilia i le taimi a o avea ma Kovana o le malo.

 

E ese mai i le afioga a Mamea lea na tofia e Kovana Sunia, ma le afioga a Tunupopo na tofia e Lolo, o isi Fa’amasino Lagolago uma o lo o i ai na tofia uma e Togiola.

 

O se tasi o itu na taua e Kruse, o le fa’amasinoga i le suafa Leiato e pei ona fa’agasolo pea i luma o le Fa’amasinoga i le taimi nei, e le gata o lo o aofia ai Togiola i se tasi o itu talosaga ae o ia fo’i o se sui tauva mo le suafa.

 

O le afioga i le ali’i Fa’amasino Sili lagolago le tumau ia Elvis P. Patea o lo o ia taulimaina le fa’amasinoga i le suafa Leiato, e sui tulaga ai i le afioga i le ali’i Fa’amasino Sili lagolago ia Lyle L. Richmond o lo o gasegase.

 

E ui o Patea sa tofia mai e le Initeria na te tauaveina mo se taimi le tumau le tulaga o Richmond, ae o lona lava tulaga o lo o i ai i le taimi nei, o ia o le Fa’amasino o le Fa’amasinoga Fa’aitumalo, o ia foi sa filifilia e Togiola.

 

I lalo o le tulafono e pei ona fa’amanino e Kruse, e le mafai e se Fa’amasino Lagolago na tofia e se tasi sa avea ma Kovana, ona avea ma Fa’amasino i le iloiloina o ni mataupu e aofia ai le sa avea ma Kovana. E mafai lea tulaga pe afai ua leai lava se Fa’amasino e avanoa.

 

Ona o ia tulaga, na taua ai loa e Kruse ia Lolo lona filifilia o le afioga i le ali’i Senatoa ia Paepae Iosefa Faiai e avea ma Fa’amasino Lagolago, e fa’aopoopo i Fa’amasino o lo o i ai i le taimi nei.

 

A o le i filifilia Paepae e avea ma Senatoa o le Fono Faitulafono, sa fa’aalia i sana tusi i le Fa’amasino lona naunau e fia tautua i le Vaega o Fa’amasinoga, e ala i le tofiga o le Fa’amasino le tumau. Ona o lea tulaga, ua taua ai e Kruse lona taliaina o le talosaga a Paepae, ina ia tatala atu ai le avanoa e auauna ai i lea vaega o le faigamalo, ma aloaia ai lona fa’amavae mai i lona tofiga o le Senatoa i le Fono Faitulafono.

 

Na taua fo’i e Kruse lona agaga fiafia ina ua talia ma le agaga atoa e Paepae le filifilia o ia e avea ma Fa’amasino.

 

Na amata mai le soifuaga aoaoina o Paepae i le aoga maulauga a Leone, ma fa’auu mai ai i le tausaga e 1981, lea fo’i na avea ai o ia o se tasi na fa’auluulu i ai le vasega fa’au’u. Na ulufale o ia i le US Army ma tautua ai mo tausaga e 21, ma malolo litaea mai ai i le tausaga e 2002 i le tulaga o le Chief Warrant Officer III, ma toe taliu mai o ia ma tautua i lona aiga, nu’u ma le malo.

 

O ni isi o ona agava’a na avea ai o ia o se pailate fa’auuina a le vaega o le FAA. Sa avea fo’i o ia ma pailate sinia mo kamupani va’alele fa’amautu i le atu Samoa, mo tausaga e 7, amata mai i le 2002 e oo mai i le 2009, sosoo ai loa ma le avea o ia ma pailate mo le va’alele a le malo, le Segaula mo tausaga e 3.

 

O ia o se Tiakono i le Ekalesia EFKAS i Nua ma Seetaga, o ia o le teutupe a le pulega a ali’i ma faipule o le afioga, o lo o avea o ia ma Ta’ita’ifono a le Ekalesia, o ia fo’i o se totino o le Komiti o Tupe a le Ekalesia Aoao.

 

O Paepae o se tasi e fa’aaloalogia i lona aiga, nu’u ma le Ekalesia, o ona agava’a fo’i ua mafai ai ona ia ausia tulaga maualuluga i lona soifua galue i le malo.

Comment Here