Fa’amanino Kovana suiga o le Tulafono mo le Faletupe fou a le malo

ausage@samoanews.com

O le taeao nei lea ua fa’amoemoe e amata aloaia ai taualumaga o le Fono Faapitoa a le Kovana lea ua valaauina mo le Fono Faitulafono, e talanoaina ai mataupu taua e lua e talitonu le ali’i Kovana e aoga mo le atunu’u.

 

O ia mataupu e aofia ai le fa’amaoniaina o le tofiga o le Fa’amasino Lagolago mo le afioga i le ali’i Senatoa ia Paepae Iosefa Faiai, atoa ai ma le suiga i le tulafono sa fa’avae ai le Faletupe a le malo (TBAS).

 

O le fonotaga a le Kapeneta i le vaiaso na te’a nei na fa’amanino ai e Lolo suiga o le tulafono mo le Faletupe, ae o le fonotaga ma tusitala i le aso Faraile na te’a nei, na ia toe fa’amanino atili ai loa le autu o le suiga e pei ona fuafuaina mo le tulafono na fa’avae ai le Faletupe.

 

Saunoa Lolo e fa’apea, o le suiga e pei ona fuafuaina mo le tulafono na fa’avae ai le Faletupe a le malo, o le upu i le gagana peretania o le “hold company” o lo o taua i le gagana o le tulafono.

 

O le fa’aupuga lea e pei ona saunoa Lolo i le feiloaiga ma tusitala, e le talafeagai ona fa’aaogaina i le faletupe a le malo, ona o le faletupe o le TBAS, o le faletupe a le malo o Amerika Samoa, ma, talu ai le tulaga fa’avaomalo i le va feagai ai ma le malo tele o Amerika, lea e pei ona fa’aigoaina ai o le teritori e le o lelei ona fa’atulaga lelei lana faigamalo, o le mafua’aga lea e le agava’a ai ona fa’aaoga le faaupuga lea mo le faletupe o le TBAS.

 

Saunoa atili Lolo e fa’apea, o le fa’aupuga e pei ona fuafua e faia i ai le suiga i le tulafono, o lo o fa’aaogaina lava mo faletupe i totonu o setete ma teritori uma a le malo tele, se’i vagana ai lava Amerika Samoa e le agava’a ai, ona o lona tulaga fa’avaomalo ma le malo tele.

 

O le fonotaga ma sui o le Feterale o lo o pulea tulaga tau faletupe a le malo tele i le amataga o le masina nei, na taua ai e le ali’i Kovana le fautuaina o le malo o Amerika Samoa ina ia faia lea suiga, ona faigofie ai loa lea ona aloaia le talosaga mo se numera e mafai ai ona agava’a teugatupe i totonu o le Faletupe e puipuia i lalo o tulafono o Inisiua a le Feterale.

 

O i latou ia ua tofia e fa’auluulu i ai lea lala a le malo feterale mo auaunaga tau faletupe, e le i leva ona fa’amaonia i latou e le Konekeresi a le malo tele, talu ona filifilia i latou e le peresetene a le malo tele ia Donald Trump.

 

Na taua e Lolo le mae’a lea ona ia fa’amanino i ta’ita’i o le Fono Faitulafono le aano atoa ua mafua ai ona ia valaauina lenei Fono Faapitoa, ma ua sauni le faigamalo e galulue fa’atasi ma le Fono Faitulafono i auala e fa’aleleia atili ai le teutauga o le tulafono.

 

O le itula e 10:00 o le taeao nei lea ua fa’atulaga e nofoia ai tauaofiaga a maota e lua a le Fono Faitulafono, ma amata fa’atulaga ai loa iloiloga mo le talanoaina o mataupu e 2 o le Fono Faapitoa a le Kovana.

Comment Here