Ads by Google Ads by Google

Fa’amanino Komiti o le Pone auala fa’aaoga i ai tupe sa maua

ausage@samoanews.com

O le vaiaso na te’a nei na fa’amanino ai e le Komiti o le Pone a Amerika Samoa (ASEDA) i se latou ripoti tusitusia, galuega ta’itasi uma ua mae’a ona fa’aaoga i ai vaega o tupe o le Pone sa maua mai, atoa ai ma vaega tupe e o o mai i le taimi nei e le i fa’aaogaina.

 

E pei ona taua i le ripoti mai le Komiti o le ASEDA sa mafai ona maua e le Samoa News, o lo o taua ai Pone e 3 e aofia ai le A, B ma le C na mafai ona fa’a aitalafu mai e le malo o Amerika Samoa, ma maua ai le aofaiga o le tupe e $78.9 miliona.

 

O lo o manino fo’i i totonu o le ripoti e fa’apea, e tusa ma le $45.2 miliona mai tupe o le Pone a le malo ua mae’a ona fa’aaoga e fa’atupe ai atina’e ma manaoga e pei ona taua, ae o le isi vaega o lo o totoe ai o lo o fa’agasolo malie pea lona fa’aaogaina.

 

O le atina’e o lo o pito tele le vaega tupe o le Pone o lo o fa’atupeina ai, o le Faletupe fou a le malo, le Territorial Bank of American Samoa (TBAS), lea o lo o taua i le ripoti le aofa’i e $13.5 miliona, ae na o le $3.5 miliona lea ua mae’a ona fa’aaogaina i le taimi nei.

 

E ese mai ai aitalafu e lua a le malo i le Tupe o le Litaea, lea e silia i le $11 miliona lona tu’u fa’atasiga, o isi atina’e e sosoo ane ai i le TBAS o le Gaosia lea o le Eletise e fa’aaoga i ai le savili, lea e pei ona galulue ai le Ofisa o Pulega o le Eletise ma le Suavai (ASPA) i Manu’a ma Aolofaufou i le aofa’i e $8.1 miliona, e ui e na o le $6.5 miliona le vaega tupe lea ua o o mai i le taimi nei ua mae’a.

 

Mai le $6 miliona o lo o fa’aagaga e fa’atau mai ai masini fa’ata e su’e ai oloa ma uta mai fafo i luga o le uafu, o le $3.7 miliona o lea tupe ua fa’aaoga, ma le $5 miliona ua fa’aagaga e fa’atau ai le va’a fou mo Manu’a, o le $1.5 miliona o lea vaega tupe ua mae’a ona fa’aaoga.

 

O ni isi o galuega e le i fa’aaogaina a latou vaega tupe e aofia ai le $1.5 miliona e tusia ai le ata o le Fale Fono fou, $1 miliona ua fa’amoemoe mo le Vaega Tosova’a i Satala, ma le ta’i $250,000 e fa’aleleia ai masini computer mo le Ofisa o Femalagaaiga, fa’apea ai ma le Ofisa o Tiute.

 

E pei ona taua i le ripoti a le ASEDA, o le aso 3 Novema lea ua fa’amoemoe e taunu’u mai ai isi masini fa’ata mo le su’eina ai o uta i luga o le uafu, ae o le aso 11 Novema lea ua fa’amoeoe taunu’u mai ai le va’a fou mo le itumalo o le Manu’atele i laufanua o Amerika Samoa, i le mae’a ai lea ona tuua e le va’a o le setete o Hawai’i i le aso 30 o le masina lenei o Oketopa.

 

O le aso 24-28 o Oketopa lea ua faamoemoe e tatala aloaia ai isi poloketi o lo o fausia i Manu’a i Ta’u ma Ofu, mo le fa’aaogaina lea o le saili e maua mai ai le eletise, ina ia fa’aitiitia ai le toe fa’aaogaina o le suau’u.