Ads by Google Ads by Google

Fa’amanino i Faipule le mafua’aga o le tuai ona fa’aaoga tupe Medicaid


Le Pule o le Ofisa o le Medicaid ma le Medicare a Amerika Samoa, susuga Sandra King-Young. [ata AF]
ausage@samoanews.com

Na fa’amanino e le Pulesili o le Ofisa o loo pulea alaga tupe mai le polokalame o le Medicare ma le Medicaid a le malo, susuga Sandra King-Young i luma o le maota o sui i le masina na te’a nei, mafua’aga o loo tuai ai ona fa’aaoga e Amerika Samoa vaega tupe na fa’amatu’u mai mo Amerika Samoa, i lalo o le tulafono fetarale o le ‘American Recovery & Reinvestment Act’ (ARRA).

 

O ni isi o ia mafua’aga e pei ona saunoa King-Young, e aofia ai le le lava lea o Ofisa o loo tu’uina atu a latou pili i lalo o le polokalame a le Medicare, mai tautua ma auaunaga sa latou fa’atinoina, ona mafai lea ona toe fa’atumu mai e le polokalame a le Medicare vaega tupe sa fa’aalu.

 

O le taimi nei mai le tele o tausaga ua mavae, e na o le falema’i lava o le LBJ o loo mafai ona latou tuuina atu ripoti i tautua ma auaunaga sa latou fa’atinoina i tagata lautele, ma mafai ai ona fa’amatu’u mai e le polokalame a le Medicare vaega tupe mo le falema’i.

 

Na taua e le afioga i le ali’i faipule ia Vesi Talalelei Fautanu Jr, o ia fo’i lea o le ta’ita’ifono o le Komiti o le Sofiaua Maloloina/LBJ a le maota o sui e fa’apea, ua galulue nei le Komiti ma le Ofisa o le Medicaid a le malo, mo le fa’atulagaina lea o se alafua e mafai ai ona aofia ai ma le Matagaluega o le Soifua Maloloina i vaega e mafai ona tuu atu a latou pili e toe totogi mai e le medicare, ina ia televave ai le fa’aaogaina e Amerika Samoa o vaega tupe ua mae’a ona tatala mai mo le atunu’u.

 

“E tusa ai o le ripoti sa tu’uina mai i le Ofisa o le medicare a le tatou malo, mai le aofaiga atoa o le tupe ua fa’aagaga mai i lalo o le ARRA Funding mo Amerika Samoa e $189 miliona, o loo totoe ai pea le aofaiga e $151 miliona e lei fa’aaogaina, e mafua mai i le leai o ni isi ofisa e ese mai i le LBJ e mafai ona tu’u atu a latou pili i le polokalame a le medicare, ma le fa’amoemoe e toe maua mai ai tupe sa fa’aalu i a latou tautua, afai loa ae tu’u i ai ma le Soifua Maloloina, ona tau feololo mai ai loa lea o se vaega tupe e fa’amatu’u mai mo Amerika Samoa”, o le saunoaga lea a Vesi i se talanoaga ma le Samoa News i le taeao ananafi.

 

(O le vaiaso ua te’a sa fa’ailoa ai e le kovana, e faapea, ua talia nei i le polokalame tautua e faia e le Soifua Maloloina.)

 

O se tasi o lu’itau o loo fetaia’i ma le malo i tulaga o tupe mai le polokalame a le medicare, o tupe e fa’afetaui ai tupe mai fafo (matching fund).

 

Saunoa Vesi e fa’apea, o loo fa’amoemoe le malo o Amerika Samoa o le a fa’aopoopo i luga vaega tupe e maua mai e Amerika Samoa mai tupe fesoasoani mo atina’e tetele o loo tu’uina mai e le malo tele i tausaga ta’itasi, ina ia mafai ai loa ona si’itia le vaega tupe e mafai ai ona fa’aaoga mo tupe fa’afetaui a le malo.

 

I le taimi o le iloiloga a le maota o sui ma King-Young, na taua ai e le afioga i le ali’i faipule ia Faimealelei Anthony Fu’e Allen, o ia fo’i lea o se totino o le komiti fa’afoe a le falema’i o le LBJ lona fa’anaunauga o loo i ai, ina ia mafai ona tatala faitoto’a o le polokalame o le medicare, ma avanoa mai ai alagatupe e tele o loo i ai e fesoasoani ai i le fa’aleleia o le falema’i i LBJ.

 

Na taua e Faimealelei le tele o le manaoga tau tupe o loo tula’i mai i le LBJ i le taimi nei, ao lea lava e avanoa se vaega tele o tupe a le medicare e tatau ona fa’aaoga.