Fa’amanino e Utu i le Fono mafua’aga fa’aititia ai le paketia ASPA

Ta’ita’i o le Fono Faitulafono, le Peresetene o le Senate ia Gaoteote Palaie Tofau ma le Fofoga Fetalai o le maota o sui ia Savali Talavou Ale, fa’apea ai le Pulesili o le Ofisa o le ASPA, afioga i le Matua ia Utu Abe Malae.  [ata: AF]
ausage@samoanews.com

Na fa’aaoga e le Pulesili o le Ofisa o le Pulega o le Eletise ma le Suavai (ASPA) le taimi o le iloiloga o le paketi a le Ofisa i le taeao ananafi, e fa’amanino ai i le Komiti Soofaatasi o le Paketi a le Fono Faitulafono mafua’aga tetele e lua ua ala ai ona fa’aitiitia le latou tupe fa’asoasoa mo le tausaga tupe fou 2017, pe a fa’atusatusa i le aofa’i o le latou paketi i le tausaga tupe lenei 2016.

 

E $124.5 miliona le aofa’i o le tupe o lo o fa’atupe ai galuega a le ASPA mo le tausaga tupe lenei 2016, lea o lo o aofia ai ma le totogiina o ana tagata faigaluega e to’a 441, peita’i o tulaga fa’afitauli i tupe maua ua mafua ai ona fa’aitiitia lana paketi mo le tausaga tupe fou 2017 i le aofa’i e $80.5 miliona, e aofia ai ma le totogiina o ana tagata faigaluega e to’a 471.

 

O le eseesega e silia i le $30 miliona e pei ona taua e le afioga i le Matua ia Utu Abe Malae i luma o le Komiti Soofaatasi a le Fono ananafi e fa’apea, o le vaega o lo o fa’aitiitia i le paketi a le ASPA i le suiga e pei ona taua, o lo o mafuli lea i tulaga o galuega fa’a konekarate.

 

“O le tausaga tupe fou lea ua molimauina ai le tele o se fa’aitiitiga i le paketi a le ASPA, ae fuafua fo’i galuega fa’atino ma tupe maua a le Ofisa i tulaga o tupe maua, ae o mafua’aga tetele e lua ua mafua ai ona fa’aitiitia le tupe fa’asoasoa mo le tausaga tupe fou, e le gata ua fa’aitiitia le tau o le suauu mai maketi i fafo o le lalolagi, ae i ai fo’i ni isi o galuega tetele a le Ofisa ua taofia i le taimi nei, e mafua mai i le tuai lea ona maua mai i totonu o tupe mai le feterale lea o lo o fa’amoemoe e toe fa’atumu ai tupe ua mae’a ona fa’aaoga mo galuega.”

 

O galuega tetele a le ASPA sa fa’agasolo ae ua taofia i le taimi nei, o le galuega mo le fausiaina o le nofoaga fou e tu’u i ai afi fou i Satala, atoa ai ma le galuega o lo o fausia i le nofoaga a le ofisa i Tafuna.

 

Ina ua fesiligia e sui o le Komiti Fa’afoe ia Utu e fa’amanino tulaga i galuega tetele sa ia taua i lana molimau, na saunoa ai le afioga i le Matua e fa’apea, o le galuega o lo o fa’agasolo i Tafuna, o lo o faatupeina e le Ofisa o le FEMA a le malo tele, o le Ofisa lea e sui tulaga i le latou Ofisa sa fa’aleagaina e le galulolo o le 2009 i Satala i le aofaiga e tusa ma le $5 miliona, ae o le galuega i Satala mo le nofoaga fou e tu’u i ai afi fou, e tusa ma le $55 miliona le tau aofa’i o lea galuega, o lo o fa’atupeina uma e le feterale.

 

Na ioeina e Utu i luma o le Komiti So’ofa’atasi le i ai o ni fa’afitauli laiti o lo o tula’i mai i le va o le ASPA ma konekarate o lo o fausia galuega, ae o lo o taumafai pea le pulega e feutana’i ma sui o konekarate mo le foiaina o nei fa’afitauli.

 

O le itu taua e pei ona taua e ni isi o sui o le Komiti So’ofa’atasi, o le fa’aitiitia o le paketi a le ASPA, ao lea o lo o si’itia le aofa’i o ana tagata faigaluega.

 

Ina ua fesiligia e le afioga i le Senatoa ia Faletagoa’i Tuiolemotu ia Utu i le mafua’aga ua ala ai ona si’itia tagata faigaluega ae fa’aitiitia le paketi, na saunoa ai Utu e fa’apea, o ni isi o tagata faigaluega mo Manu’a ua toe fa’aopoopo i le taimi nei, ona o lo o galulue i latou i le fa’apipi’iina o masini fou mo ‘solar panel’, e ui o ni isi o tagata faigaluega ua litaea ma ua malolo mai a latou galuega i le tausaga lenei.

 

Na taua e le afioga i le ali’i peresetene o le Senate ia Gaoteote Palaie Tofau lona fiafia tele ina ua manino i le molimau a Utu, o lo o fa’aitiitia le paketi ae o lo o si’itia tagata faigaluega.

 

I le tula’i mai ai o se feeseeseaiga i le va o le Fono Faitulafono ma le ASPA i ni tausaga ua mavae, e mafua mai i le talitonuga a le ASPA, e pulea lava e i latou la latou paketi, na saunoa fa’afetai ai Gaoteote i le afioga i le matua ia Utu, i le fa’aauauina pea lea o lona talitonuina o le galulue fa’atasi ma le Fono, aemaise ai o le tu’uina mai lea o le paketi a le ASPA i luma o le fono e iloilo ai.

 

O ni isi o suiga fou ua fuafua le ASPA e fa’amalosia lona fa’aaogaina i le atunu’u, o le fa’aaogaina lea o masini e maua mai ai le eletise mai le la, ma fa’aitiitia ai le fa’aaogaina o le suau’u.

 

Fesiligia e le afioga i le tama’ita’i faipule ia Vui Florence Saulo ia Utu, pe i ai se a’afiaga i tupe maua a le ASPA pe afai o le a fa’aitiitia le toe fa’aaogaina o le suau’u, ae fa’aaoga masini e maua mai ai le eletise mai le la, ae na saunoa Utu e fa’apea, e leai se a’afiaga o tupe maua a le ASPA i le suiga lea, aua o le taimi lava e fa’aitiitia ai tupe maua a le ASPA, o le taimi fo’i lea e fa’aitiitia ai ana tupe fa’aaoga, lona uiga i se isi fa’aupuga, e o fa’atasi lava le fa’aitiitia o tupe fa’aalu fa’apea ai ma tupe maua, ona paleni lava lea o le tautua a le ASPA.

 

O se tasi o itu taua e pei ona fa’amanino e Utu i luma o le Komiti So’ofa’atasi, o le lelei lea o le malo i le totogiina atu o ana pili fa’apea ai ma ana aitalafu i le ASPA.

Comment Here