Ads by Google Ads by Google

Fa’amanatu le aso fiafia mo Tagata fai galuega Taulima atunu’u


Ni isi o fanau aoga i le taimi na fa’aa’oa’o ai i le fa’atinoina o galuega taulima. [ata AF]
ausage@samoanews.com

O le aso Tofi ma le aso Faraile o le vaiaso fou, Oketopa 13 & 14, 2016, o le a fa’ataunu’uina ai se polokalame fa’apitoa mo Tagata gaosi galuega taulima i le atunu’u, e ala i le fa’alauiloa lea o galuega eseese o lo o latou fa’atinoina, e avea ai o se vaega o le polokalame e fa’ataua ai le silia i le 30 tausaga talu ona fa’ataua lenei auaunaga i totonu o le malo o Amerika.

 

Na taua e le susuga Rex Yandall, o le Faatonu lea o Polokalame o Galuega Taulima ma Aganu’u a le Ofisa o le “AS Council on Arts Culture and Humanities” i le Samoa News e fa’apea, o le taua o lenei polokalame, o le a mafai ai ona maua le avanoa o le mamalu o le atunu’u o lo o i ai le taleni i le gaosiina o soo se galuega taulima i le atunu’u, e fa’alauilioa ai taleni i galuega o lo o latou fa’atinoina.

 

O le masina lenei o Oketopa, o lo o fa’atulagaina o le Masina e Fa’ataua ai Tu ma Galuega Taulima, ma fa’amanatu ai le 31 tausaga talu ona fa’avae mai lenei polokalame i totonu o le malo tele, i lalo o le fa’atautaiga a le vaega o le “National Endowment for the Arts” (NEA).

 

“O le vaiaso fou la lea ua fa’atulaga e fa’ataunu’u ai le polokalame ua fa’aigoaina o le “Arts Fiafia”, o se avanoa e fa’alauiloa ai taleni eseese ma agava’a e fa’atinoina ai galuega taulima a soo se tasi o le mamalu o le atunu’u, e valaau fa’aaloalo atu ai i le mamalu o le atunu’u o lo o i ai lenei taleni, ina ia afifio mai e lesitala outou suafa mo lenei polokalame taua”, o le saunoaga lea a Yandall.

 

O le vaiaso nei lea na tatala ai le lesitalaina o suafa o i latou e fia auai i le polokalame o le Arts Fiafia, i le nofoaga autu a le Ofisa o le Arts Council i Fagatogo.

 

“O le a mafai fo’i ona fa’atau ai lava i le taimi o le polokalame galuega taulima sa mafai ona gaosi ma fa’atino e le tagata i totonu o aso e 2 o le polokalame, ina ia maua ai fo’i se seleni e fesoasoani ai i le aiga, ae le fa’atagaina ai i le Arts Fiafia i latou e le o ni tagata e i ai le taleni i le gaosiina o galuega taulima, ae o fa’atau mai galuega taulima sa gaosi e isi tagata ma le fa’amoemoe e fa’atau ai i le taimi o le polokalame”, o le saunoaga lea a Yandall i le Samoa News.

 

Saunoa atili le susuga Yandall, e le o fa’apitoa le polokalame mo tagata faipisinisi, i latou o lo o latou fa’atauina mai galuega taulima mai isi tagata, ona latou toe fa’atau ese atu lea ma le fa’amoemoe e maua ai tupe fa’asili, ae fa’apitoa mo i latou e mafai ona latou gaosia lava e i latou galuega taulima ma toe fa’atau atu i le atunu’u.

 

O ituaiga galuega taulima o lo o mana’omia le fa’atinoina e aofia ai le vaneina o mamanu, lalagaina o galuega taulima, pese, siva fa’aleaganu’u, ma isi lava ituaiga galuega taulima eseese ua silafia e le to’atele.

 

O lo o tatala fo’i le avanoa mo i latou e lelei i le gaosiina o taumafa Samoa, o isi ia vaega o le fa’aaliga mo le Arts Fiafia i le vaiaso fou.