Fa’amanatu le 30 tausaga o le tautua a le Hope House i AS


Asia e fanau ma tagata matutua o le Ekalesia Aso Fitu i Pago Pago le Hope House i Tafuna. [ata AF]

Meaalofa mai le Ekalesia Aso Fitu i Pago Pago i taimi o a latou asiasiga i le Hope House i Tafuna. [ata AF]
ausage@samoanews.com

Talu mai le tausaga e 1987 ina ua fa’atoa tatala aloaia le tautua a le Maota o Fa’amoemoega (Hope House) a le Ekalesia Puleaga a Pago Pago i Amerika Samoa, o le masina o Setema o le tausaga nei 2017 lea ua fa’amoemoe e fa’amanatu aloaia ai le atoaga o le 30 tausaga talu ona fa’aauau mai lenei tautua i le atunu’u.

 

I se pepa o fa’amatalaga sa tu’uina mai i le Pule’aga fa’apea ai ma le Komiti Fa’afoe a le Hope House, na taua ai ni isi o tapenaga mo le fa’amanatuina o le 30 tausaga o le latou tautua, aemaise ai le fa’alauiloaina lea o le agaga fa’afetai i Fa’alapotopotoga ma vaega eseese o lo o ofoina atu fesoasoani e pei o taumafa ma tupe e fesoasoani ai i le fa’atinoina o le auaunaga a le Hope House, e aofia ai le foa’i tupe mai le Faletupe a Hawaii lea ua atoa nei le 14 tausaga o fa’aauauina mai pea.

 

I le tauaaoina ai e le Pule’aga ma le Komiti Fa’afoe a le Hope House i se foa’i tupe e $10,000 mai le Faletupe o Hawaii i le aso ananafi, ua atoa ai i lenei fo’ai le tupe e $140,000 ua foa’i atu e le Faletupe o Hawaii mo le Hope House e fesoasoani ai i le latou tautua talu mai le 14 tausaga talu na amata mai ai lenei osigafeagaiga i le va o vaega e lua.

 

E pei ona silafia, pau lea o se nofoaga fa’apenei i totonu o Amerika Samoa o lo o tausia ai Tama ma Tina matutua, fa’apea ai fanau ma soo se tasi e a’afia i gasegase tuga o le tino, e na o le auaunaga a le Maota o Fa’amoemoega i le Fatuoaiga i Tafuna, o se tautua lea a le Ekalesia o le Pule’aga a Samoa Pago Pago i le atunu’u

 

I le tauaaoina ai e le Komiti Fa’afoe ma le Pule’aga a le Hope House o lenei foa’i taua, na taua ai e le Ta’ita’i o le Ekalesia, afioga Peter Brown le agaga fa’afetai ma le loto fa’agae’etia i le tautua a le Faletupe o Hawaii, ona o lenei vaega tupe tele o lo o latou foa’iina atu mo i latou mo le 14 tausaga.

 

“O le fa’aauauina pea o la outou fesoasoani mo le Hope House i nei tausaga e tele, e pei ona outou tu’uina mai ai lenei tupe e fesoasoani ai i la matou tautua ma le tausiaina o Tama ma Tina matutua, fa’apea ai fanau o lo o a’afia i ma’i tuga o le tino, ua mafai ona fa’atinoina ni isi o vaega taua e pei o le toe fa’afouina o lenei maota faapea ai ma le tele o vaega sa moomia le fia fa’aleleia mai le tele o tausaga”, o se vaega lea o le tusi fa’afetai a le afioga a Brown i le Pulega o le Faletupe o Hawaii ma isi pisinisi i le atunu’u.s

 

Sa ia taua fo’i e fa’apea, e ui i le feagai ai o le malo feterale ma lu’itau i le itu tau tupe, ae o lo o maitauina pea le tu’uina atu o le latou tautua e fesoasoani ai i le fa’atinoina o lenei auaunaga taua.

 

O le aso 22 Iuni 1984 na talia ai e Taupou Sa o le Nasareta (Sisters of the Nazareth) se tusi valaaulia mai le afioga Katinale Pio Taofinu’u, ina ia tatala se latou lala e tausia ai tagata matutua i Amerika Samoa nei, ma mafua ai loa ona malaga mai Taupou Sa ma tatala le latou tautua i Amerika Samoa nei i le masina o Ianuari 1987, ae o le aso 1 Mati 1987 na taunu’u ai le ulua’i tagata matua e tausi ma nofo i totonu o le maota.

 

O le aso 10 Aperila 1987 na tatala ai le ulua’i Aoga Amata a le Hope House ae o le aso 12 Aokuso 1987 na ulufale ai le ulua’i tamaititi aoga i totonu o le aoga.

 

E 25 tausaga na galulue punoua’i ai Taupou Sa i le fa’atinoina o lenei tautua mo le atunu’u, ma fa’amuta aloaia ai la latou tautua i le amataga o le tausaga e 2009, ae tu’uina mai loa le tauaveina o lenei auaunaga taua i lalo o le ta’ita’iga a le Ekalesia Pule’aga Samoa Pago Pago seia oo mai i le taimi nei.

 

O le taimi nei, e to’a 12 tagata matutua o loo tausia nei i totonu o le Hope House, fa’atasi ai ma fanau e to’a 5 e a’afia i gasegse tuga o le tino, faapea ai fanau aoga e to’a 84 o loo aoaoina i le Aoga Amata.

 

Ua fa’agasolo i le taimi nei tapenaga a le Hope House mo a latou sailiga tupe e fa’atinoina ai le fa’amanatuina o le latou aso fanau i lenei tausaga, e pei ona i ai le Ta’amilosaga Ta Polo fa’apea ai ma le S’i lea ua fa’atulaga i le masina o Setema, ma fa’atino atu ai ma le sauniga o le Misa Sa e fa’apaiaina ai le faataunu’uina o lenei fa’amoemoe taua.

 

O sui o le Ekalesia na auai i le taliaina o lenei foa’i taua e aofia ai le afioga a Patele Viane Etuale faapea ai sui o le Komiti Fa’afoe.

 

O sui o le Komiti Fa’afoe a le Hope House e aofia le Ta’ita’ifono ia Ta’afano Joe Tavale, ma le Ta’ita’ifono o le Komiti o loo gafa ma le fa’atulagaina polokalame o le Iupeli, susuga Larry Sanitoa.

 

O sui o le Komiti Fa’afoe a le Faletupe o Hawaii na auai e aofia ai Jon Murakami o le Sui Peresetene, o Hobbs  Lowson o le isi sui peresetene i tulaga o fefa’atauaiga, ma EJ Tyler Ozu, o le sui peresetene lea o le lala i Amerika Samoa.

Comment Here