Ads by Google Ads by Google

Fa’amalosia Itumalo Maoputasi puipuiga o fanau mai fualaau fa’asaina


Le Fa’alupega fou mo le itumalo o le Maoputasi, tofa Uso Lelei i le taimi na lulu aao ai ma le afioga i le Maoputasi ia Mauga Tasi Asuega i le mae’a ai o le fono a le itumalo i le aso Faraile na te’a nei. [ata AF]

Le tofa Tuaolo Meto lea sa avea ma Fa’alupega a le Maoputasi. [ata AF]
ausage@samoanews.com

O le fonotaga a le itumalo o le Maoputasi i le aso Faraile o le vaiaso na te’a nei, lea na usuia i le malae o Gagamoe i Pago Pago, na fa’ai’ugafonoina ai ni isi o mataupu ua finagalo ta’ita’i o le Itumalo e tatau ona faia mo le nonofo manuia o ona tagata, aemaise ai o le puipuia o le ola manuia ma le soifua saogalemu o aiga ma tupulaga talavou i totonu o le atunu’u.

 

O ni isi o ia mataupu e aofia ai le fa’amalosia o taumafaiga e tete’e atu i le fa’afitauli o fualaau fa’asaina, tauala mai i le auaunaga a le Vaega a le Maoputasi Coalition, atoa ai ma le taofia lea o le toe fa’aaogaina o le ietoga laititi poo le lalaga e pei ona lauiloa ai i le atunu’u, ina ia fa’a faigofie ai tapenaga a aiga i taimi e tutupu mai ai fa’alavelave i aso fai soo.

 

O le fonotaga fo’i lea na fa’amaonia ai le tofia o le tofa a Uso Lelei mai le afioga i Fagaalu e avea ma Fa’alupega fou a le itumalo, e sui tulaga i le tofa a Tuaolo Meto sa ia tauaveina mai le tofi, na fa’ate’a ese e le afioga i le Maoputasi ia Mauga Tasi Asuega, o ia fo’i lea o le Failautusi o le Ofisa o Mataupu Tau Samoa mai fa’agaioiga a le Itumalo i le taimi o le fonotaga.

 

O sui na auai i le fonotaga e aofia ai sui mai le afioaga i Aua, Leloaloa, Pago Pago, Fagatogo ma Fagaalu.

 

A o le i amataina aloaia le fonotaga, na mua’i saunoa le afioga i le Maoputasi ia Mauga e fa’ailoa i le Itumalo le fa’aiuga a le afioaga o Pago Pago ua i ai, i le fa’ate’aeseina lea o le tofa a Tuaolo Meto mai le afioaga, e le tatau fo’i la ona i ai i le fono a le Itumalo, ma ia fa’atonuina ai loa le tofa a Tuaolo Meto ina ia tula’i ese ma le fono.

 

“A o le i amataina la tatou fonotaga, e fia fa’ailoa atu le mea lenei, lau susuga Meto, e tatau ona e tula’i ese ma le fono a le itumalo, o lea ua fa’atula’i ese fo’i oe ma le afioaga o Pago Pago”, o le saunoaga lea a Mauga na mafua ai ona tali fuaitau mai Meto e fa’apea, “O Tuaolo e le o Meto”.

 

“Meto, afai ua e tula’i ese ma le faiganu’u a Pago Pago, e tatau fo’i la ona e tula’i ese mai le fono a le itumalo”, o le saunoaga lea a Mauga na toe tali fuaitau atu ai fo’i le tofa Tuaolo e fa’apea, “O Tuaolo e le o Meto, ou te le tula’i ese fo’i”.

 

O le mae’a ai ona toe tali fuaitau atu o Tuaolo  Meto i le saunoaga a le afioga i le Maoputasi, na fa’atonuina ai loa e Mauga ia le aumaga ina ia ta’ita’i i fafo ia Meto, ae sa tu’u alalo atu i ai ni isi o Tapa’au o le afioaga i Pago Pago ma fa’aoloolo maau atu ia Mauga, ina ia taoto le mataupu ia Tuaolo Meto se’i mae’a le fonotaga a le itumalo, peita’i sa fa’alogoina loa le saunoaga a Tuaolo Meto ua fa’apea, “Ua lelei Mauga, o le a ou tula’i ese”, o le saunoaga lea a Tuaolo Meto ma ia tula’i ese ai loa ma le maota, fa’atoa amata aloaia ai loa lea o le fonotaga a le Itumalo.

 

TAOFIA LE TOE FA’AAOGAINA O LE IETOGA LALAGA

 

Na taua e le tofa Tuaolo M. Fruean, o ia fo’i lea o lo o tauaveina le isi nofoa e tolu i ai nofoa o le itumalo i totonu o le Senate e fa’apea, o le fuafuaga ina ia taofia le toe fa’aaogaina o le ietoga lalaga i taimi o fa’alavelave, o se tasi lea o mataupu na soalaupule i ai le afioga i Pago Pago, i lalo o se fautuaga mai ia Mauga, ma ua taliaina e le afioga le fautuaga ina ia taofia le toe fa’aaogaina o le lalaga, ae tu’u mai le 2 masina e fa’amae’a lelei ai lalaga o lo o i maota ma laoa o aiga ona fa’atoa fa’amamalu aloaia ai loa lea.

 

O se tasi o mafua’aga na taua e Tuaolo ua mafua ai lenei fautuaga, ua tele ina le fa’amaoni tagata o le atunu’u i le fa’aaogaina o le lalaga i taimi o fa’alavelave, e ui o le ie lenei sa sili fo’i ona taua i taimi o fa’alavelave i aso ua mavae, ona o ie ia sa fai ma mea sulu a fanau, peita’i o le taimi nei, ua tele le tala pepelo o tagata i le fa’aaogaina o le lalaga.

 

“O le mea lea ua maitauina i le tele o fa’alavelave i aso nei, e na o le aumai lava o le lalaga lelei e tasi e taai mai ai le pito i fafo, ae tatala atu totonu e le atoa se 10 lalaga o loo i ai, ae na o le 5 pe 6 fo’i, e le gata fo’i i lea, o le tele o lalaga ua masaesae ma leaga, ma fa’atele ai fua le lapisi i aiga i taimi o fa’alavelave”, o le saunoaga lea a Tuaolo na tau fai lagolagoina uma e sui o isi afioaga o le Itumalo, fa’atasi ai ma le fautuaga lea fo’i ua talia e le Maoputasi, o le amataga o le tausaga fou e amata aloaia ai loa le fa’amamaluina o lenei suiga i totonu o le Itumalo o le Maoputasi.

 

Saunoa atili Tuaolo e fa’apea, e le fa’apea ua mafua ona faia lenei suiga ona o se taumafai e fa’ata’ita’i i isi Itumalo poo le malo fo’i o Samoa, ae ua manatu lava ina ia fai se auala e fesoasoani ai i aiga i taimi o fa’alavelave.

 

FA’AMALOSIA O PUIPUIGA I FUALAAU FA’ASAINA

 

E le gata na fa’afetaia e le Itumalo le tautua a le Vaega o le Maoputasi Coalition o lo o i ai, i le faia lea o aoaoga ma polokalame e fa’alauiloa ai i fanau le leaga o le ‘ava malosi, tapa’a atoa ai ma fualaau fa’asaina, ae ua fautuaina fo’i le tatau lea ona tofu le afioaga o le Itumalo ma le fa’agaioiga e fa’atinoina ai, ina ia mafai ai ona momoli le feau i aiga uma o le itumalo, e a’afia ola o fanau ma tagata uma i fualaau fa’asaina, fa’apea ai le ‘ava malosi ma le tapa’a.

 

Na fa’amanino e le susuga i le Matua ia Pulu Ae Ae Jr, o le isi lea sui o le Maoputasi Coalition le taua o lenei polokalame, o loo fesoasoani ai i fanau mai le a’afia o latou olaga laiti i fualaau fa’asaina.

 

Na fautuaina e le afioga a Mauga sui o le Maoputasi Coalition ina ia saili ni avanoa e fa’agasolo ai a latou polokalame i totonu o Ekalesia ta’itasi i le Itumalo, ina ia maua ai le avanoa e galulue fa’atasi ai ma aiga Ekalesia o loo lava lo latou silafia i tagata tonu o loo i ai le manaoga i le polokalame.

 

Saunoa Tuaolo M. Fruean e fa’apea, o le isi fa’afitauli lea ua maitauina i le taimi nei, soo se nofoaga lava e tele ai fualaau fa’asaina e tele ai fo’i ma a’upega mata’utia, ae sili pe a faia se fa’asalalauga e lapataia ai tagata uma o le atunu’u, ina ia aveese mai laau malosi o loo i o latou aiga, ma tu’u atu i ai se taimi e fa’atapula’a ai lea taumafaiga, ina ia fesoasoani ai i le fa’afitauli ua sosolo fa’aafi.

 

FA’ALUPEGA FOU MO LE MAOPUTASI

 

O le fa’atula’i ese ai o le tofa Tuaolo Meto mai le afioaga i Pago Pago atoa ai ma le Itumalo, na finagalo ai loa le afioga i le Maoputasi ua tatau ona tofia se isi na te fa’aauauina le tofi Fa’alupega.

 

Na lafo e Mauga le fa’aaloalo i le afioga i le Maopu ia Uti Petelo o Leloaloa, peita’i na teena e Uti ona o le tulaga matua ua i ai lona soifua, ae lelei pe a saili se isi o loo talavou ma malosi na te fa’aauauina le tofiga, ma talia ai loa e le tofa Uso le tofiga, ma fa’agasolo ai loa le sainia o le pepa e fa’amaonia ai le filifilia o le tofa a Uso e avea ma Fa’alupega fou o le Itumalo.