I le tele ai o masina o tu’u fesili pea ni isi o tagata lotu i se tulaga ua o o i ai le mataupu fa’asaga i le ali’i faifeau sa tausia le Ekalesia Faapotopotoga Kerisiano i Amerika Samoa (EFKAS) i le afioaga i Pago Pago, o le vaiaso na te’a nei na fa’amaonia mai ai e le Failautusi a le Au Toeaiina le mae’a lea ona faia o le fa’aiuga a le Au Toeaiina e fa’amalolo ai le tofi o lea ali’i faifeau mo le umi e 3 tausaga.

“Ua uma ona faia le fa’aiuga i le susuga ia Fa’atauva’a Talamoni e aveese uma ai ona tofi mo le 3 tausaga, o le taimi nei la, e le i tofia se faifeau e vaaia le aulotu i Pago Pago, ae atonu o se taimi o i luma ona vaavaai lea i ai o le Ekalesia”, o le saunoaga lea a Rev. Elder Leatulagi Fa’alevao, o le Failautusi lea a le Komiti a le Au Toeaiina a le Ekalesia EFKAS.

E lei fa’ailoa e Rev. Elder Fa’alevao le mafua’aga na ala ai ona faia le fa’aiuga a le Au Toeaiina e fa’amalolo tofi o le ali’i faifeau, se’i vagana ai lona fa’ailoa i le Samoa News le talia ma le agaga fiafia e le ali’i faifeau o le fa’aiuga.

O le fonotaga a le Au Toeaiina i le masina o Mati o le tausaga nei, na faia ai loa le fa’aiuga e fa’amalolo tofi o le susuga a Fa’atauva’a, i le tuana’i ai lea o se mataupu na alia’e ma i le lotoifale o le Ekalesia lava i Pago Pago, lea e talitonu le Au Toeaiina o se tulaga ua le talafeagai ma le tapula’a maualuga e tatau ona soifua ai le aufaigaluega faifeau a le Ekalesia, aemaise ai le ola fa’akerisiano e tatau ona ausia e le aufaigaluega.

O se tasi o mataupu na fesiligia ai le sui o le Ekalesia Aoao, pe moni ripoti e to’alua ali’i faifeau o lo o vaaia le aulotu i Pago Pago i le taimi nei.

E mafua lea tulaga ona o ni ripoti sa fa’aalia e ni isi o le atunu’u i se maliu se faia i Pago Pago i le aso malolo o Tuugamau na mavae atu nei, lea na taua ai le fa’ateia o le aiga na tula’i mai ai le maliu ina ua fai atu fa’aaloaloga mo le aufaigaluega a le afioaga sa i ai i toe sauniga o si Tina talavou na maliu, ae fa’ailoa ane e to’alua faifeau o le aulotu EFKAS mai Pago Pago o lo o i ai, ma e ui i le fa’ateia o le aiga ina ua latou fa’alogo e to’alua faifeau a le aulotu, ae na fai lava meaalofa tupe mo le aufaigaluega.

Saunoa atili Rev. Elder Fa’alevao i le Samoa News e fa’apea, o lo o fa’atali le Ekalesia i se taimi o i luma ona fa’atoa silasila toto’a lea mo se tasi e tausia le aulotu i Pago Pago.

“E leai se faifeau a Pago Pago i le taimi nei, e le o silafia fo’i e le Ekalesia se tulaga e fa’atatau i ni faifeau se to’alua o lo o tausia le aulotu i le taimi nei”, o le saunoaga lea a Rev. Elder Fa’alevao.

Na fa’amaonia mai e ni isi o sui o le aulotu a Pago Pago i le Samoa News e fa’apea, o faifeau e to’alua sa auai i le maliu e pei ona fesiligia, o le faifeau o lo o tausia le aulotu i le taimi nei fa’atasi ai ma se tasi o ali’i A’oa’o a le aulotu.

E ui i le fa’aiuga a le Ekalesia fa’asaga i le susuga a Fa’atauva’a ma lona aiga, ae na taua e ni isi o tagata aulotu lo latou misia o le ali’i faifeau, ona o le taleni pese atoa ai ma le naunau e atina’e mafutaga a tupulaga talavou.