Fa’amalolo Leoleo e to’afa mai le JDC i le faia o amio le taupulea


Le nofoaga o le falepuipui o tamaiti i Tafuna. [ata AF]
ausage@samoanews.com

E to’afa Leoleo sa galulue i le Falepuipui o Tamaiti i Tafuna (Juvenile Detention Center - JDC) ua fa’amalolo mai a latou galuega, e mafua mai i tu’uaiga na alia’e mai i le fa’aiuga o le tausaga na te’a nei, i lo latou faia lea o amioga le taupulea i totonu o le nofoaga o loo taofia ai fanau.

 

O ni isi o amioga le taupulea o loo taua i le ripoti sa faia e Leoleo e to’afa o loo taua o latou suafa i totonu o le ripoti, e aofia ai le fa’ataga o tamaiti sa loka i le falepuipui e o i tua i o latou aiga i le leva o le po, atoa ai ma le fa’ataga o tamaiti e vili i o latou matua mo ni tupe i le leva o le po.

 

O isi vaega o loo taua i le ripoti e aofia ai le tatala e Leoleo o tama ma teine pagota ae loka i le potu e tasi, ma momoe ai i le po atoa ma le fa’amoemoe ina ia faia ai uiga fa’aleulugali’i, ulaula fa’atasi Leoleo ma pagota i fualaau fa’asaina, fa’apea ai ma le tatala o le pa i le leva o le po ae fa’ataga ai ta’avale a tagata mai tua e ulufale atu i totonu o le falepuipui mo le kilivaina atu o fualaau fa’asaina.

 

Na fa’amaonia mai e se sui Sinia o le Ofisa o Leoleo i le Samoa News i le taeao ananafi, le fa’amalolo o Leoleo e to’afa talu mai le taimi na faila ai le ripoti fa’asaga i lenei mataupu i le masina o Novema 2016.

 

O lenei ripoti na saunia e le Ta’ita’i o le Falepuipui a le fanau ia Mara Brown, ma tauaao atu ai le kopi i le Komesina o Leoleo ua mavae atu, le afioga ia Save Liuato Tuitele, ma e talitonu le Samoa News o loo fa’agasolo i le taimi nei su’esu’ega a le Ofisa o Leoleo e tusa ai o lenei mataupu.

 

O loo taua ai i totonu o le ripoti fa’atalatalanoaga sa faia i fanau sa taofia i totonu o le falepuipui e tusa ai o tu’uaiga, ma o latou fa’amaonia ai gaioiga uma sa faia e Leoleo e pei ona fa’amalolo.

 

O ni isi o tamaiti sa a’afia i gaioiga nei ua mae’a ona tuli a latou fa’asalaga ma ua toe tatala i latou i tua, e pei ona taua i se vaega o le ripoti.

 

I le fa’aiuga o le ripoti, o loo fautuaina malosi ai e Brown le Komesina o Leoleo ua mavae atu, ina ia le gata e fa’amalolo Leoleo o loo tu’uaia mai a latou galuega, a ia faia fo’i se suesuega ina ia mautinoa e molia ai i latou i le tulafono mai gaioiga fa’asolitulafono ua tu’uaia i latou sa latou faia, e aofia ai lo latou fa’ataga o fanau sa taofia i le toese e soli le tulafono.

 

O le vaiaso fou o le a fa’aauau ai atu le vaega lua o lenei ripoti, e aofia ai ma gaioiga ta’itasi o loo taua i le ripoti sa tutupu i totonu o le falepuipui, lea fo’i o loo tu’uaia Leoleo ua fa’amalolo sa latou fa’atinoina.

Comment Here