Ads by Google Ads by Google

Fa’amalolo le tumau se ali’i Leoleo sinia ona o ni tu’uaiga fa’asaga ia te ia

ausage@samoanews.com

E 5 aso na fa’amalolo ai e aunoa ma se totogi e le Komesina o Leoleo se tasi o ana Ta’ita’i Leoleo mai le Ofisa o Leoleo i Tafuna, e mafua mai ina ua alia’e tu’uaiga o lona faia o ni uiga e atagia mai ai amioga faafeusuaiga fa’asaga i se tama’ita’i leoleo la te galulue fa’atasi i le Ofisa i Tafuna.

 

O le vaiaso na te’a nei na fa’ataunu’uina ai le fa’asalaga a le ali’i leoleo Ta’ita’i, mai le aso Gafua e oo mai i le aso Faraile, ma ua toe aga’i atu nei o ia i le galuega e pei ona masani ai i aso ta’itasi.

 

O tu’uaiga fa’asaga i le alii Ta’ita’i leoleo na alia’e mai i se fa’alavelave na tula’i mai lava i le ofisa o Leoleo i Tafuna, ina ua ia taumafai e tago atu i le tama’ita’i leoleo na a’afia ao punou lea tama’ita’i leoleo e aumai sana vaiinu mai totonu o le pusa aisa o lo o i totonu o lona ofisa.

 

O le te’i o le tama’ita’i leoleo ina ua tago atu le tagata i le pito i tua o ia, na tu sa’o ai i luga ma faliu i tua e vaai poo ai, ae na te’i ina ua fa’asaga atu i tua ae vaaia le taumafai o le ali’i Taitai leoleo e kisi atu i ona laugutu. Na faliu ese le tama’ita’i leoleo ma alu atu ai laugutu o le Ta’ita’i leoleo ma tau i lona alafau.

 

O lo o tu’uaia fo’i le tago atu o le Taitai leoleo i le auvae o le tama’ita’i leoleo, ma taumafai e fa’a fa’asaga atu o ia ae sogi atu i ai, peita’i na tapuni e le tama’ita’i leoleo lona gutu ao taumafai le Ta’ita’i leoleo e sogi atu ia te ia e fa’aaoga ai lona laulaufaiva.

 

E le i mana’o le tama’ita’i leoleo e talanoa mai i le Samoa News e uiga i lenei mataupu, ina ua fesiligia o ia i le vaiaso na te’a nei. Ae ina ua fesiligia le Ta’ita’i leoleo, sa ia ioe e tuuina mai sana fa’amatalaga i le Samoa News.

 

Na taua e le Ta’ita’i leoleo e fa’apea, e le sa’o tu’uaiga ua faia fa’asaga ia te ia.

 

“O le mea moni lava ia e leai se mea na tupu. O tulaga lava o ta’aloga ma ulaga ae leai lava se mea na tupu. O ta’aloga masani lava, atonu fo’i e te silafia mea faapea i le va o tagata faigaluega, mo ta’aloga lava e tutupu ae le o ni mea moni”, o le saunoaga lea a le Ta’ita’i leoleo i le Samoa News.

 

Ina ua fesiligia le Taitai leoleo, afai e le moni tu’uaiga fa’asaga ia te ia, lona uiga e le talafeagai le faaiuga a le Komesina ua faia fa’asaga ia te ia, na tali le Ta’ita’i leoleo, “o le fa’aiuga lava lena a le Komesina. O le a lava le mea ua oo i ai o le mea lava lena. O le a fo’i le faaiuga a le Komesina ua aumai mo a’u, ou te usita’i fo’i i le tulaga ua taoto ai le finagalo o le Komesina”.

 

Ina ua fesiligia le Komesina o Leoleo, tofa Le’i Sonny Thompson e uiga i lenei mataupu, e lei mafai ona tali mai o ia i le imeli a le Samoa News na avatu faatasi ai fesili e uiga i lenei mataupu, ae sa ia tali mai ina ua fa’afesootai atu o ia i lana telefoni.

 

Na taua e Le’i i luga o le telefoni e fa’apea, o le mataupu e pei ona tu’uaia ai le ali’i Ta’ita’i leoleo, e le o se mataupu e ono tatau ona tusi aga’i i ai ni ripoti, o lo o tele isi mataupu talafeagai e mafai ona suesue ma tusi ai tala a le Samoa News.

 

Na taua e le Ta’ita’i o le Ofisa e Sulufa’i i ai i latou ua sauaina, le faletua ia Ipu Avegalio  i le Samoa News e fa’apea, ua mae’a ona taulima e lona Ofisa le mataupu, i le mae’a ai lea ona latou feiloa’i ma le tama’ita’i leoleo na a’afia ma ona matua, ma ua mae’a fo’i ona ia tuuina atu lenei mataupu i luma o le Loia Sili mo se suesuega.

 

Na taua e Ipu e fa’apea, o ituaiga amioga faapenei e le fa’atagaina i totonu o fale faigaluega ma soo se nofoaga. E le tatau fo’i ona tu’u fa’asa’olotoina i latou e faia nei ituaiga amioaga, ae tatau ona fa’asala ma molia.

 

Sa ia taua fo’i le ofo lona loto e tusa ai o le tali a le Komesina o Leoleo, ma ua atagia mai ai i lana tali le ituaiga tagata e i ai o ia.

 

E to’atele ni isi o leoleo sinia atoa ai ma isi ua tele tausaga o le latou tautua i le Ofisa o Leoleo sa latou fa’ailoa i le Samoa News o latou lagona le fiafia e tusa ai o le fa’aiuga a le Komesina fa’asaga i le Ta’ita’i leoleo o lo o a’afia i lenei mataupu.

 

Na taua e se tasi e fa’apea, afai o lo o falepuipui ma molia tagatanu’u i mataupu faapenei, aisea ua le mafai ai ona molia le Ta’ita’i leoleo.

 

Ae na taua e se tasi e fa’apea, afai e le mafai e le Komesina o Leoleo ona faia se faaiuga sa’o e uiga i lenei mataupu, ua tatau ona ia tula’i ese ma le tofi Komesina.

 

Talu ai ona e leai ni moliaga i le fa’amasinoga i lenei matapu, o le me lea e le o fa’ailoa ai e le Samoa News le suafa o le Taitai leoleo.