Fa’alima ona osofa’i Ofisa Voc Rehab i Tafuna housing


O se va’aiga i fa’amalama e lua lea ua fa’aleagaina i osofa’iga, ua mae’a fa’aleleia le fa’amalama sa fa’aaogaina muamua, ae o le isi lea na fa’ato’a fa’aaoga lava i le vaveao o le aso Tofi Mati 30 i le Ofisa o le VocRehab i nofoaga a le malo i Tafuna. [ata: Leua Aiono Frost]

O se va’aiga i le fa’amalama lea ua toe tata’e fo’i i le taeao ananafi e oso mai ai i totonu le ‘au kaleke i le Ofisa o le Voc Rehab i le nofoaga o le malo i Tafuna. [ata: Leua Aiono Frost]

O le masina lenei o Mati sa osofa’ia fa’alima ai le Ofisa o le Vocational Rehabilitation i Tafuna ma e i ai mea ua ave’esea ai, ae le tele na’ua, o fa’amatalaga ia a nisi e galuluega i lea ofisa o le malo, ma ua ma’ea fo’i ona tuuina atu a latou fa’amatalaga i le Ofisa o Leoleo.

 

I lea lava vaifale, lea e aofia ai ma i si ofisa o le malo, ua taua ai le fa’afitu lea ona osofia lenei vaega o Tafuna.

 

Sa amata mai i le aso 16 Mati lea na mua’i osofa’ia ai le Ofisa o le Voc Rehab ae aofia ai ma le ta’avale a lea lava Ofisa, ma ua ave’esea laisene o le taavale, e le’i toe maua.

 

O le aso na soso’o ai, sa toe osofa’ia fo’i ma ua taei ai fa’amalama pito i tua ina ia oso ona oso se tagata i totonu o le Ofisa. Ua le gata i le sagole solo mea i luga o laulau, ae ua matauina, ua latou tuufa’atasia uma ki o ta’avale a lea Ofisa sa eseese mea sa tu’u ai.

 

O ki nei o sipea ki o ta’avale, peita’i, ua foliga mai sa latou tau su’ea fo’i ki ma le ta’avale e fetaui i ai.

 

O se tasi o osofa’iga e lima i le Ofisa lea, o le osofa’iga lea o le ta’avale, ona ave fa’agaoi ai lea ma le masini “power wash” o se oka mo se tasi o sui o lo’o auai i le polokalama a le Voc Rehab Independent Living.

 

I se fa’amatalaga mai a le sui i lea Ofisa, “Ua fa’alima ona osofa’ia le matou Ofisa, ua fa’apea fo’i le aofa’iga o taimi ua faia ai matou fa’amatalaga i leoleo ma  o se mea fou lava lea tulaga.”

 

Ua mae’a le la vaiaso, o fai ripoti a nai tagata faigaluega, ua fesuisuia’i mai fo’i ma ali’i ma tama’ita’i Leoleo e o’o mai e aoina atu fa’amatalaga ma ni mea e avea ma ni fa’amaoniga o le osofa’iga.

 

I le osofa’iga i le aso 20 Mati, ua avea ai le Laptop a le pule mai lona Ofisa ae toe maua mai i totonu o le ta’avale lea fo’i ua foliga mai, ua avea ma ta’avale e tafafao solo ai i latou o lo’o faia nei osofa’iga i le po ona toe o mai lea toe fa’atu le ta’avale i le mea sa i ai.

 

Ina ua fesiligia ni mea ua fa’aleagaina ma le tau o le a toe fa’aleleia ai, ae fa’ailoa mai le tau o le fa’amalama e tasi e $150, ae e lua pea fa’amalama nei ua fa’aleagaina, o lona uiga e $300.

 

O le ta’avale ua tia’i laisene, lea ua toe fai mai isi laisene e lua, o tupe lava fo’i sa toe talosagaina ai. O le masini ma ona fa’aga’au e fa’apipi’i lelei ai, atoa ai ma isi totoga sa i ai i totonu o le ta’avale, lea ua gaoia fa’atasi, e taugata lea masini, ma ua ave ae le’i faia se lipoti o le tau aofa’i o nei mea uma. Peita’i o nisi o meatotino a tagata faigaluega sa i luga o latou kesi ma laulau, ae ua faaleagaina, ua leai se tau talafeagai ma nei mea totino.

 

Na toe osofa’ia fo’i lea lava Ofisa i le aso 27 ma le aso 30 o Mati, ma ua amata ona faitio nai tagata faigaluega, ona o le tuai ona maua atu o se tali maumaututu mai le Ofisa o Leoleo Suesue, i nisi o tau masalomia, pe maua patino fo’i se tasi po’o nisi ua latou faia nei osofa’iga.

 

Ua fa’ailoa mai e leoleo, ua i ai se tino ma foliga o se tasi sa iloa i meapu’eata a le Ofisa i le isi ituala, ae le’i matua maua’a foliga o lea sui i le mea pu’e ata, ae o se fesoasoani tele mo i latou e tausaili ai sui nei e fia maua mai.

 

I se tala mai le Ofisa auto o leoleo i Fagatogo, ua fa’ailoa mai, e to’atolu le isi vaega fou fa’ato’a saisai atu e leoleo suesue ananafi i le aoauli, mo a latou sailiiliga, ma o lo’o faia nei sailiga po’o i latou nei.

 

“Ua amata ona matou fiu e fai fa’amatalaga, ae le mailoa pe maua ai se sa’oga, ae tatau lava fo’i ona faia mea uma e sefe ai le ofisa, peita’i, o ta’avale ua fa’atutu nei i le Public Works, ia sefe mai ai, ae ua ave uma fo’i ki sippen o ta’avale i le fale e matou pule, ua le toe i ai la ni mea e ona manana’o ai le vaega talepe nei. O le uta uma fo’i o mea na talosaga mo tagata o le polokalama i Manu’a, fa’afetai ua mae’a tu’uva’a atu nei i le Motusa i le va’a o le aso Lulu na te’a nei, ae osofa’i ai fo’i ma le Ofisa i le vaveao.”

 

O se tasi lea o fa’amatalaga a nai sui o le Ofisa o le Voc Rehab mo le silafia o lea fa’aletonu ua te’i lava ua oso fa’afuase’i ia Mati o lenei tausaga, ae ua talafeagai lava fo’i ma le Masina e fa’ataua ai sui uma o lo’o latou galulue e fa’ataua lo latou ola fiafia ma le saogalemu fa’atasi ma i tatou uma.

Comment Here