Fa’aleo le agaga fa’afetai o tagata matutua i le malo

ausage@samoanews.com

Na taua e le to’atele o Tama ma Tina matutua o le atunu’u i le Samoa News i le vaiaso na te’a nei, lo latou fa’afetaia o le afioga i le ali’i kovana ia Lolo Matalasi Moliga ma le la faigamalo ma Lemanu Palepoi S. Mauga, ona o le tele o galuega lelei ma fa’amanuiaga ua mafai ona faia mo tagata matutua o le atunu’u.

 

“O se nofoaiga ese lenei talu ona ou i ai i totonu o le polokalame a tagata matutua i le atunu’u, e le gata e maua le avanoa e tautua ai e le kovana ma lona faletua, o le lutena kovana ma le kapeneta tagata matutua, ae ua oo lava foi i polokalame eseese ua latou fa’atula’i ina ia fesoasoani ai i o matou tagata”, o le saunoaga lea a le Tina atua ia Valelia Tuiasosopo, 68 tausaga mai Fagatogo.

 

E pei ona taua e le Tina matua ia Tuiasosopo i lana saunoaga, e le gata i polokalame eseese ma atina’e ua mafai ona faia mo tagata matutua, ae oo lava fo’i i le faia o aoaoga e fa’atatau i le fa’aaogaina o masini faaonapo nei ua agava’a ai fo’i tagata matutua.

 

“E i ai tagata matutua ua fa’auu mai i polokalame e pei o le fa’aaogaina o le masini computer, lea sa fa’atautaia e le Ofisa o Tupulaga Talavou, Tina ma Tama’ita’i, ma o ni isi o Tama ma Tina matutua mai le polokalame a le TAOA na auai atu i ai ma fa’au’u mai ai, o isi polokalame e aofia ai le toe fa’aolaolaina o le tomai i galuega taulima, aemaise ai o atina’e e fesoasoani ai i le toe fa’agaioiina o le mafaufau o le tagata ua matua, o ni isi ia o auala ua mafai ai ona toe penefiti i matou nei o tagata matutua e vaavaai i le matagofie o le olaga ua i ai tupulaga i ona po nei”, o le saunoaga lea a Tuiasosopo.

 

I avanoa faigaluega o lo o fa’aauau pea ona galulue ai Tama ma Tina matutua i le taimi nei, o se tasi lea o polokalame na fa’aleoina ai lo latou agaga fa’afetai i le vaiaso na te’a nei, ona e talitonu i latou, o le isi lea polokalame o lo o fesoaosani malosi ai i le atina’eina o latou aiga i le itu tau tupe.

 

“Faafetai i le malo ona o le polokalame o loo maua ai galuega a tagata matutua, lea sa amata mai i le tele o nofoaiga ua mavae atu, lea lava o lo o fa’aauau mai pea i le taimi nei, ma e ui lava e le o ni galuega tumau, ae o lo o maitauina pea le aoga o lenei polokalame ia i matou”, o le saunoaga lea a le tama matua ia Amituana’i Viiga, 66 tausaga le matua o Tafuna.

 

Na taua e se sui sinia o le Ofisa o Tagata Matutua (TAOA) e faapea, e silia i le to’a 100 tagata matutua o lo o galulue pea i le polokalame lea o lo o fa’atupe mai e le feterale mo le umi e ta’i 4 tausaga.

 

“O le latalata i le fa’aiuga o le tausaga na te’a nei a o avea le tofa Ale Tifimalae ma Fa’atonusili o le TAOA, sa ulufale mai ai ni isi o tama ma tina fou i totonu o le polokalame, ina ua fa’amae’aina le tautua a i latou ua atoa le ta’i 4 tausaga o loo galulue, ma ua i ai fo’i le fa’amoemoe o se taimi o le tausaga nei e atoa i ai le ta’i 4 tausaga o le isi vaega, ona malolo fo’i lea ae aga’i mai le vaega fou mo le amataina o le latou ta’i 4 tausaga”, o le saunoaga lea a se sui sinia o le Ofisa o le TAOA.

 

O galuega o lo o fa’atinoina e tagata matutua e aofia ai le fesoasoani lea i le Ofisa i soo se galuega fa’atino.

 

Sa fautuaina e le kovana i le fonotaga a lana Kapeneta i le vaiaso na te’a nei afioga i Fa’atonusili o Matagaluega eseese a le malo, ina ia silasila toto’a i ni avanoa faigaluega e mafai ona galulue ai Tama ma Tina matutua, e fesoasoani ai i isi fo’i galuega i totonu o le Ofisa.

 

“Aua tatou te manatu mama i le sao o tagata matutua, e aoga fo’i le fa’a faigaluega o i latou i totonu o Ofisa, a tau tulimoe mai le Fa’atonusili lona sui ae o lo o i ai le toeaina ma le olomatua e fa’aata ma fa’afiafia le aufaigaluega”, o le saunoaga malie lea a le ali’i kovana, ae o lo o momoli atu ai le feau i le kapeneta ina ia fa’ataua tagata matutua.

 

O se tasi o vaega sa aga’i i ai le agaga fa’afetai o Tama ma Tina matutua mo le malo, o le avanoa ua mafai ona maua e tatalaina ai le Fale e teu ai galuega taulima o lo o latou galulue ai.

 

Na taua e se tasi o Tama matua e fa’apea, o le isi lea alagatupe o loo maua e i latou i le taimi nei, o tupe e maua mai i galuega taulima o loo latou galulue ai, ma ua mafai ona maua ia fa’amanuiaga ona o le fesoasoani a le malo, e ala i le fa’aaogaina o mea faigaluega, poto ma le tomai aemaise ai o le taimi e fa’atino ai galuega taulima, ma le fa’amoemoe e fa’atau atu ina ia maua ai tupe mo le aiga.

Comment Here