Ads by Google Ads by Google

Fa’alautele i nu’u i tua ma Manu’a le tautua a le LBJ

 Sui o le Falema’i o le LBJ i Fagaalu i le taimi na molimau ai i luma o le Komiti So’ofa’atasi o le Paketi a le Fono Faitulafono i le vaiaso nei, le Ta’ita’ifono o le Komiti Fa’afoe ia Filifa’atali Michael Fuiava ma Etenauga Lutu.  [ata AF]
ausage@samoanews.com

O se tasi o suiga tele ua manatu le pulega a le falema’i o le LBJ i Faga’alu e fa’atino i le tausaga tupe fou 2017, ina ia atili ai ona fa’alautele lana tautua i le atunu’u, o le tatala lea i tua o ni isi o ana auaunaga i nu’u i tua atoa ai ma le itumalo o Manu’a.

 

“O le agaga atoa o le pulega a le falema’i, afai e lelei mo tagatanu’u o lo o alala i le taulaga lo latou mauaina o auaunaga eseese mai le falema’i autu i Faga’alu, e tatau fo’i ona lelei mo le mamalu o le atunu’u o lo o alala i nu’u i tua atoa ai ma Manu’a le tatala atu i ai o nei auaunaga”, o le saunoaga lea a le Pulesili a le Falema’i, tofa Taufete’e John Faumuina.

 

O ni isi o auaunaga a le Falema’i lea ua fa’alautele mo le atunu’u, e aofia ai le Fale Talavai lea ua tatala i le lala a le falema’i i Tafuna, ina ia fesoasoani ai i le mamalu o le atunu’u o lo o alala i le itu i sisifo o loo manaomia le faia o talavai, ina ia latalata ma vave mo i latou i soo se taimi e manaomia ai lea auaunaga.

 

“E le o i ai se tupe e fa’aagaga e fa’atupe ai lea auaunaga fou, ae ona o le naunau lava o le falema’i e fa’aleleia atili lana tautua mo le atunu’u, ua matou manatu ai e saili ni isi vaega tupe e fa’atupe ai le tautua fou lea, ae sili loa ona tatala ma amata lenei auaunaga fou ona o lo o to’atele le mamalu o le atunu’u o lo o latou mana’omia”, o le saunoaga lea a Taufete’e.

 

Mo le itumalo o Manu’a, e 5 nofoa mo le talavai o le Fa’amama Toto ua fa’amoemoe le pulega a le falema’i e ave i Manu’a, e amata ai lea auaunaga mo le mamalu o le atunu’u ua a’afia i lenei gasegase.

 

Saunoa Taufete’e i luma o le Komiti So’ofa’atasi e fa’apea, sa i ai le manatu e ave na o nai nofoa se 2 e amata ai lenei auaunaga fou, ae talu ai o lea ua mai isi nofoa fou e fa’aaoga i le nofoaga autu a le vaega Fa’amama Toto i Fagaalu, ua manatu ai loa le pulega a le falema’i e sili pe a ave loa nofoa e 5 lea sa fa’aaoga i le fale tou, e amata ai le tautua a le falema’i mo Manu’a.

 

“O le agaga atoa o le falema’i, ia saili se auala e fesoasoani ai i le mamalu o le itumalo o lo o maua i lenei gasegase, lea ua tuua o latou aiga i le itumalo ae malaga mai ma aumau i Tutuila nei, ona o a latou talavai o lo o faia i vaiaso uma, e le gata fo’i i lena, o ni isi ua tele le tupe e fa’aalu e malaga mai ai i va’alele mo a latou talavai, ma ua mana’omia ai e le falema’i le tu’uina atu o se fesoasoani mo le mamalu o le itumalo i Manu’a”, o le saunoaga lea a Taufete’e.

 

O ni isi o auala o lo o maua ai tupe e fa’atupe ai le paketi a le falema’i mo le tausaga tupe fou, e aofia ai le vaega tupe mai le malo lea ua mae’a ona fa’atulafonoina (subsidy) e $6 miliona i le tausaga atoa, atoa ai ma le tupe o lo o maua mai i le lafoga e 2% o lo o totogi e tagata faigaluega uma i totonu o le atunu’u i le aofaiga e $5 miliona e pei ona valoia e tatau ona maua i le tausaga tupe fou.

 

Na fesili le afioga i le ali’i senatoa ia Magalei Logovi’i pe fia se tupe o lo o maua mai e le falema’i i le lafoga e 2%, ae na saunoa Taufete’e, e le o manino le falema’i pe fia sa’o le tupe o lo o maua mai i le lafoga lea, pau la latou gaioiga e fai pe afai e maua atu se vaega o lea tupe mai le malo, “e na o le fa’afetai i le Atua” ua maua atu se isi vaega tupe e fa’aopoopo i le manaoga o lo o tula’i mai.

 

O se tasi o mataupu sa fesiligia i le taiim o le iloiloga, o le tulaga i le aoina mai o aitalafu a le falema’i, aemaise lava i aitalafu a ni isi o tagata ua tele tausaga o lo o ta’atitia ai pea i fa’amaumauga a le falema’i e le o mafai ona fa’amaopoopo.

 

Na fesili le afioga i le tama’ita’i faipule ia Vui Florence Saulo, pe aisea e fa’atali ai le pulega a le falema’i i le taimi e fa’afou ai ID o tagata mai fafo, ona fa’atoa latou fa’amalosia lea o le aoina o aitalafu, ae le taumafai pea e tulituli tagata o lo o aitalafu i masina ta’itasi, nai lo le fa’atali seia oo i le taimi mulimuli, ona faigata ai loa lea i ni isi o tagata ona totogi a latou pili ona o le maualuga o le aofa’i o lo o i ai.

 

Ae na saunoa Taufete’e e fa’apea, o le tele lava o tagata o lo o aitalafu i le falema’i, o lo o tulituli lava i masina ta’itasi a latou aitalafu, sei vagana ai le isi vaega ua fiu lava e tulituli a latou aitalafu, ma faia ai loa le fa’aiuga e tu’u atu i luma o le fa’amasinoga le tuliloaina o aitalafu a i latou nei.

 

“Ae mo le lautele o tagata o lo o i ai a latou aitalafu i le falema’i, tusa lava pe solasola solo, e maua lava i latou i le taimi e mana’omia ai ni a latou kilia mo le fa’afouina o a latou pepa nofomau, ae o le tulaga lea ua i ai le aoina mai o aitalafu a le falema’i, ua tulaga lelei ma aga’i i luma, o le tele fo’i o aitalafu ua mae’a ona ao mai i totonu, ma ua fesoasoani malosi ai lea tulaga i galuega fa’atino a le falema’i”, o le saunoaga lea a Taufete’e.

 

I le talanoaina ai o tagata mai fafo o lo o aitalafu i le falema’i, na fesiligia ai e le fofoga fetalai ia Savali Talavou Ale le mataupu e fa’atatau i tagata mai fafo o lo o agava’a i pili a tagatanu’u o Amerika Samoa, pe afai e ausia le 10 tausaga talu ona aumau i le teritori.

 

Saunoa Savali e fa’apea, o le tulafono o lo o i ai, e 10 loa tausaga talu ona aumau le tagata i Amerika Samoa, ona agava’a loa lea o ia i le pili o lo o totogi e tagatanu’u a Amerika Samoa, peita’i o le tulafono fou lea ua toe suia nei a le Ofisa o Femalagaaiga, fa’atoa agava’a le tagata mai fafo e alu i le pili a tagatanu’u o Amerika Samoa, pe afai e atoa lona 20 tausaga.

 

Na fa’amanino e le foma’i sili ia Dr. Ioatamo Saleapaga e fa’apea, a atoa loa le 10 tausaga ona agava’a loa lea o le tagata mai fafo ona taua o le tagata nofomau, ma ua agava’a fo’i i pili a tagata Amerika Samoa, ae mo le ofisa o Femalagaaiga, se’iloga e atoa le 20 tausaga fa’atoa agava’a le tagata i le nofomau.