Fa’alauiloa taumafaiga tete’e atu ai i le gasegase mata’utia AIDS


Fa’ailoilo mai sui o le Soifua Maloloina e pei ona fa’alauiloa i le taeao ananafi, e fa’ataua ai auala e puipui ma tete’e atu ai i le gasegase o le AIDS, a o avea ai le masina lenei o Tesema ma masina e fa’ataua ai puipuiga mo lenei gasegase mata’utia. [ata: AF]

Ni isi o fa’ailoilo mai sui o le Vaega o le Soifua Maloloina sa fa’alauiloa i le taeao ananafi i Utulei, e fa’amanatu mai ai i le atunu’u taumafaiga ina ia tete’e atu i le fa’ama’i o le AIDS, ao avea ai le masina o Tesema ma masina e fa’ataua ai puipuiga mo le tete’e atu i lenei fa’ama’i. [ata AF]
ausage@samoanews.com

I le avea ai o le aso 1 Tesema 2016, o se aso e fa’ataua ai i le lalolagi taumafaiga e tete’e atu ai i le gasegase mata’utia o le ADIS, na molimauina ai i le malae o le Su’iga’ula a le Atuvasa i Utulei i le taeao ananafi le to’atele o le atunu’u na lolofi atu e lagolago i taumafaiga a le Vaega o le Soifua Maloloina, mo le fa’alauiloaina lea o fa’ailoilo ma tusitusiga e lapataia ai le atunu’u ina ia tutu fa’atasi e tete’e atu i le fa’ama’i mata’utia o le AIDS.

 

Na taua e se sui o le Vaega o le Soifua Maloloina sa i ai i le polokalame i Utulei ananafi e fa’apea, o le taua o gaioiga e pei ona faia e le Vaega o le Soifua Maloloina, fa’apea ai Fa’alapotopotoga Tumaoti o lo o lagolago i le puipuia o le soifua maloloina o tagata uma i Amerika Samoa, ua atagia mai ai le tatau lea i le atunu’u ona mataalia ma nofouta i soo se auala e tete’e atu ai i lenei fa’ama’i mata’utia.

 

“Ua tatou silafia uma tulaga mata’utia o le fa’ama’i lenei, peita’i o le talitonuga o le Vaega o le Soifua Maloloina, e leai se isi auala e sili atu ona taua nai lo le puipuia o i tatou uma mai le a’afia i lenei fa’ama’i, e ala i lo tatou taumamao mai auala e a’afia ai tatou i lenei fa’ama’i”, o le saunoaga lea a Mareta Uputaua, o se tasi o sui o le Soifua Maloloina sa auai i lenei polokalame ananafi.

 

O ni isi o fa’ailoilo sa mafai ona fa’alauiloa e le to’atele na auai i le polokalame ananafi, o lo o fa’ailoa mai ai lapataiga i tagata ina ia tausisi i le pa’aga e tasi, taumamao mai le faia o amioga e aafia ai i le gasegase o le AIDS, atoa ai ma le puipuia nai lo le togafitia.

 

O se tasi o pepa sa tusia ai faaupuga nei, “Tete’e i le fa’ama’i o le AIDS”, ae o le isi pepa sa tusia ai fa’aupuga nei, “Taofi le AIDS, puipuia lou aiga ma lou ola”.

 

E pei ona taua i le poloaiga fa’alaua’itele a le afioga i le ali’i kovana ia Lolo Matalasi Moliga, o lo o taua ai le tatau lea i le atunu’u ona tutu fa’atasi e lagolago taumafaiga a le lalolagi e tete’e atu ai i le fa’ama’i mata’utia o le AIDS.

 

O lo o taua i le poloaiga fa’alaua’itele le aofa’i e to’a 36.7 miliona o tagata ua a’afia ma maua i le HIV, to’a 2.1 miliona i latou e le’i leva atu nei ona a’afia, aemaise ai le to’a 1.1 miliona ua maliliu i le fa’ama’i o le AIDS.

 

Na taua e le ali’i kovana e fa’apea, na pau le auala e mafai ai ona tete’e atu le lalolagi ma tagata uma o Amerika Samoa i lenei fa’ama’i, “o le si’ilima fa’atasi e puipui tagata uma mai le HIV”, ina ia mafai ai ona momoli le feau ma ta’u atu i tagata uma, e sili atu le taua o le puipuia nai lo le tau togafitia.

 

“O le mea ou te fa’asilasila atu ai fa’alaua’itele, o le aloaia atoa ai ma le fa’atauaina o lenei aso e le atunu’u a le lalolagi atoa, o le ata vaaia lea o lo tatou taumafai fa’atasi e tete’e ma puipui tagata uma mai le a’afia i lenei fa’ama’i mata’utia”, o le saunoaga lea a le ali’i kovana.

 

O ni isi o polokalame e fa’ataua ai le aso faapitoa e tete’e atu ai i auga o lenei fa’ama’i mata’utia o le AIDS, e aofia ai le sauniga faapitoa e tutu ai moli ga’o ma aloaia ai soifua o i latou ua maliliu, lea ua fa’amoemoe e fa’ataunu’uina i le maota o le malo i Utulei, le Fale Laumei i le itula e 6:00 i le afiafi nei.

Comment Here