Ads by Google Ads by Google

Fa’alauiloa Kovana isi ana tofiga fou mo sui o lana Kapeneta

ausage@samoanews.com

O le vaiaso ua te’a na fa’alauiloa ai e le afioga i le ali’i kovana ni isi o ana tofiga ua mae’a ona faia, mo i latou e avea ma sui o lana Kapeneta fou mo lenei 4 tausaga ua amata, aemaise ai le avea o i latou nei ma Fa’atonusili le tumau o matagaluega ma ofisa eseese o le malo. O ni isi o tofiga fou a le afioga i le ali’i kovana ia Lolo Matalasi Moliga na fa’alauiloa e aofia ai le tofia o le faletua o Evelyn Lili’o Satele e avea ma Fa’atonusili le tumau o le Ofisa o Tagata Matutua i Pago Pago (TAOA), e fa’atali ai le taimi e tu’uina atu ai lona suafa i luma o le Fono Faitulafono mo le fa’amaoniaina.

 

O le faletua ia Evelyn, o ia lea o le faletua o le afioga i le ali’i Fa’amasino Lagolago ia Satele Lili’o Satele, ma ua filifilia o ia e sui tulaga i le tofa a Ale Tifimalae Ale sa ia tauaveina mai lenei tofiga mo le 4 tausaga ua mavae, ae na fa’amavae o ia i le fa’aiuga o le tausaga na te’a nei, ina ua le atoatoa le tulaga o lona soifua maloloina. O le aso 19 o Ianuari na aloaia ai le tauaveina e Evelyn o le tofiga fou e pei ona filifilia ai o ia.

 

O le isi tofiga a le ali’i kovana e aofia ai le filifilia o le tofa a Va’amua Henry Sesepasara e avea ma Fa’atonusili le tumau o le Matagaluega o le Puipuiga o le Vaomatua ma le Gataifale (DMWR), e sui tulaga ai i le Fa’atonusili sa ia tauaveina le nofoa mo le 4 tausaga ua mavae atu ia Dr. Ruth Matagi-Tofiga, lea ua filifilia e le ali’i kovana e avea ma Fa’atonusili le tumau o le Matagaluega o Aoga a le malo mo le isi 4 tausaga o lo o lumana’i nei.

 

O le tofa a Va’amua sa avea muamua fo’i ma Fa’atonusili o le Matagaluega lea ua toe tofia i ai o ia i tausaga ua mavae, sa avea fo’i o ia ma Faipule mo le afioaga i Pago Pago i le maota o sui. O le aso 19 Ianuari na aloaia ai le tauaveina e Va’amua o lenei tofiga, e fa’atali ai le aso e tu’uina atu ai lona suafa i luma o le Fono Faitulafono mo le fa’amaoniaina.

 

O le tofiga mulimuli a le afioga i le ali’i kovana e aofia ai le toe tofia o Ameko Pato e avea ma Fa’atonusili o le Matagaluega o le Puipuiga o le Si’osi’omaga i Amerika Samoa (AS-EPA).Na taua e Lolo lona fiafia ina ua mafai ona toe filifilia Pato e tautua i lana faigamalo mo le lona lua ai lenei o ana nofoaiga. O le tofiga o le Fa’atonusili o le Ofisa o le AS-EPA fa’apea ai ma isi Ofisa tumaoti sa fa’avae i luga o le Poloaiga a le kovana, e le mana’omia le tu’uina atu i luma o le Fono Faitulafono mo le fa’amaoniaina, ae o le taimi lava e tofia ai i latou ua avea ma Fa’atonusili, o le taimi fo’i lea e aloaia ai loa lo latou tauaveina o lea tofiga taua a le malo.

 

O le vaiaso muamua na tatala aloaia ai le ulua’i tauaofiaga a le Fono Faitulafono a Amerika Samoa, mo lana nofoaiga lona 35 lea ua nofoia nei, na tauaao ai e maota e lua ni isi o tofiga e 5 a le ali’i kovana, mo i latou ua ia filifilia e avea ma sui o le Kapeneta mo le isi 4 tausaga o lo o lumana’i nei.O ia tofiga e aofia ai lona toe filifilia o le afioga ia Fuiavailiili Keniseli Lafaele e avea ma Fa’atonusili le tumau o le Matagaluega o Fefa’atauaiga ma Alamanuia a le malo (DOC), ma fa’aauau ai pea lana auaunaga mo le malo mo le nofoaiga fou lenei.Na taua e Lolo i lana tusi i ta’ita’i o le Fono Faitulafono lona fa’atuatuaina o le tautua ma le auaunaga sa fa’atinoina e Fuiavailiili i le 4 tausaga ua mavae atu, aemaise ai lona naunau ina ia toe fa’aauau pea lea auaunaga i le atunu’u i le lumana’i.

 

O le isi tofiga a le ali’i kovana e aofia ai le toe filifilia o le tofa a Taeaoafua Dr. Meki Solomona e avea ma Fa’atonusili le tumau o le Matagaluega o Tautua ma Auaunaga Lautele mo le atunu’u (DHSS), le tofiga sa ia tauaveina mai i le 4 tausaga ua mavae. Na taua e le ali’i kovana i ta’ita’i o le Fono lona fa’anaunauga maualuga o lo o i ai, ina ia toe fa’amaonia le tofa Taeaoafua e avea ma ta’ita’i o lenei Ofisa taua a le malo.

 

O le susuga i le ali’i Loia ia Douglas Fiaui lea ua toe filifilia e avea ma Loia Fautua mo Tagata Lautele a le atunu’u, le auaunaga sa ia fa’atinoina mai i le 4 tausaga ua mavae, fa’atasi ai ma tofiga mo sui tama’ita’i e to’alua, le susuga ia Faleosina Voigt lea ua toe filifilia e avea ma Fa’atonusili le tumau o le Matagaluega o Galuega Lautele a le malo, ma Catherine Saelua lea ua toe filifilia e avea ma Fa’atonusili le tumau o le Ofisa o le Paketi a le malo, o galuega sa la galulue ai fo’i i le 4 tausaga ua mavae.

 

Na taua e Lolo i lana tusi lona talitonuina o le tomai ma le agava’a ua i ai i nei tama’ita’i fa’atonusili le tumau, la te fa’atinoina ai le galuega e tautua ai le atunu’u.