O le aso Gafua o le vaiaso fou, Aperila 10 e pei ona fa’alauiloa aloaia mai e le afioga i le ali’i kovana ia Lolo Matalasi Moliga, o le a aloaia ai loa le fa’aitiitia o itula faigaluega mo se vaega o tagata faigaluega a le malo.

O lea fa’asilasilaga mai le ta’ita’i o le atunu’u, e le gata sa ia fa’alauiloa i se fonotaga fa’apitoa ma lana Kapeneta i le taeao o le aso Lua na te’a nei, ae sa ia toe fa’alauiloa atili mai fo’i i se pepa o fa’amatalaga sa tu’uina mai i le au fa’asalalau a le atunu’u.

“O le taeao o le aso Gafua o le vaiaso fou o le a amata fa’aitiitia ai loa itula ta’itasi mai le aso e tasi i itula faigaluega a ni isi o tagata faigaluega a le malo, ma o lea suiga e le aofia ai foma’i, tausima’i, faiaoga atoa ai ma ni isi o loo galulue i le vaega o aoga”, o se vaega lea o le saunoaga a le ali’i kovana.

E ui i suiga i itula faigaluega e pei ona fa’alauiloa mai e le malo, o le a le avea lea ma auala e suia ai taimi faigaluega a le malo e pei ona masani ai, ae o le a taoto atu lava i le Fa’atonusili mo le fa’atonutonuina o le tulaga o galuega fa’atino a lana aufaigaluega, ina ia mautinoa e fa’aauau pea le tautua mo le atunu’u lautele.

E pei ona saunoa le ali’i kovana, sa leai se agaga ia te ia e fa’atino lea tulaga, ae talu ai o tulaga fa’aletonu e pei ona tula’i mai i le itu tau tupe a le malo, ua mafua ai loa ona manatu le malo e la’a i lea tulaga ina ia mautinoa e fa’aauau pea le tautua a le malo mo ona tagata i tausaga o loo totoe o le nofoaiga, atoa ai ma le fa’aauau pea lea ona i ai avanoa faigaluega mo tagata faigaluega, nai lo le taumafai e aveese mai totogi mai totonu o aiga.

E lua mafua’aga na taua e le ali’i kovana ua mafua ai nei fa’aiuga, e le gata i le tapunia ai o le tautua a le kamupani i’a o le Samoa Tuna Processors (STP) ma fa’aitiitia ai tupe sa maua e le malo mai lafoga totogi a tagata faigaluega ta’ito’atasi, ae o le telegese o le sau i totonu o tupe fesoasoani mai le feterale, e mafua mai i suiga ua faia e le faigamalo fou a le malo o Amerika i le laumua i Uosigitone.

“O nei mataupu uma e le oo i ai so matou malosi, o le mafua’aga lea ua taumafai ai le malo e faia ni gaioiga ina ia tau fa’afetaui ai tulaga fa’afitauli e pei ona tula’i mai”, o se vaega lea o le saunoaga a le ali’i kovana.

O le suiga e pei ona fuafua e le malo mo le fa’aitiitia o itula faigaluega i le 70 itula faigaluega i totonu o le piriota totogi a le malo, o le a fa’aauau pea seia oo atu i le fa’aiuga o le Kuata 3 o le tausaga tupe lenei, ma maua ai loa le avanoa e toe iloilo ai e le malo. O lo o i ai le fuafuaga a le malo i le toe faia lea o se suiga i itula faigaluega a tagata faigaluega o le a fa’aitiitia taimi faigaluega, i le toe fa’aopoopo lea i le 75 itula faigaluega i le piriota totogi i le Kuata 4 o le tausaga tupe lenei 2017.

Na fa’ailoa e Lolo i lana kapeneta e fa’apea, “Na filifilia oe e avea ma ta’ita’i ona o oe le tagata pito sili ona agava’a mo le galuega, o le mea fo’i lea e tatau ai ona e taliaina lu’itau ua tula’i mai, ma ia fai lau galuega e ala i le puleaina o lau matagaluega ina ia mafai ona latou taliaina tulaga faigata e pei ona tula’i mai”, o se vaega lea o le saunoaga a le ali’i kovana.

E pei ona silafia e le atunu’u, sa tula’i mai fo’i le tulaga lenei i le taimi o le nofoaiga a Togiola ma Faoa, lea na fa’aitiitia ai itula faigaluega a tagata faigaluega a le malo i le masina o Fepuari 2011, ina ua tula’i mai fo’i tulaga fa’aletonu i tupe maua a le malo.

O le salalau ai o ripoti e fa’atatau i lenei suiga, na molimauina ai le to’atele o tagata faigaluega a le malo ua latou fa’aalia lagona le fiafia ma le fa’asea i luga o upega o fesootaiga fa’aonaponei, i le mafai e le malo ona fa’aitiitia itula faigaluega i le ta’i 70 itula i totonu o le piriota totogi, ae o lo o fa’aauau pea ona tipi le 2% mai totogi o tagata faigaluega.