O le vaiaso na te’a nei na fa’alauiloa ai e le afioga i le ali’i kovana ia Lolo Matalasi Moliga ni isi o ana tofiga fou, mo sui e to’alua ua filifilia e avea ma Fa’atonusili le tumau mo ni isi o Ofisa a le malo.

O ia tofiga e aofia ai le tofia o le tofa a Paogofie Fiaigoa e avea ma Fa’atonusili o le Ofisa o Aganu’u a Amerika Samoa, e sui tulaga i le afioga a Uta Dr. Laloulu Tagoilelagi ua fa’amavae, ae o le afioga ia Tapa’au Dr. Dan Aga e avea ma Fa’atonusili o le Matagaluega o Fa’atoaga a le malo, e sui tulaga i le afioga ia Lealao M. Purcell ua fa’amavae ona o tulaga i gasegase o le tino.

I le poloaiga a le ali’i kovana na sainia i le aso 21 Novema 2016 ma tufatufa atu i Faatonusili atoa ai ma Fa’auluuluga o Matagaluega ma Ofisa a le malo, o lo o ia taua ai lona tofia o le tofa a Paogofie e avea ma Faatonusili le tumau o le Ofisa o Tu ma Aganu’u a Amerika Samoa, lea o lo o avea ma Taitaifono o le Ofisa o Tu ma Aganu’u a le atunu’u.

I le tofiga ai e le ali’i kovana o Paogofie na te fa’aauauina lenei tulaga, sa ia taua ai le tu’uina atu atoa lea ia te ia o tiute ma matafaioi sa tauaveina e le sa ia nofoia le nofoa, e aofia ai le fa’atulagaina o polokalame mo le manuia o le tautua a le Ofisa, e aofia ai ma le galulue fa’atasi ma le Matagaluega o Tupulaga Talavou, Tina ma Tama’ita’i i le fa’apolokalameina o le Polokalame o Pesepesega o le Kerisimasi lea e fa’amanatuina i tausaga ta’itasi, lea fo’i ua fuafua e fa’ataunu’uina i le vaiaso lona tolu o le masina fou o Tesema.

“Ou te fia fa’ailoa atu ia outou afioga i Fa’atonusili ma Fa’auluuluga o Matagaluega ma Ofisa Tumaoti a le malo, o le tofiga a Paogofie o le a aloaia ma taualoa lona tauaveina o lea tofiga i le aso 22 Novema”, o se vaega lea o le poloaiga a le ali’i kovana.

Sa ia talosagaina fo’i sui uma o lana Kapeneta ina ia fa’ailoa lo latou lagolago atoa ai ma lo latou sapasapaia o lana tofiga fa’asaga ia Paogofie, e ala i lo latou galulue fa’atasi ma ia i le fa’atinoina o ona tiute tauave.

E pei ona silafia, o le tofa Uta lea sa avea ma Fa’atonusili o le Ofisa o Tu ma Aganu’u a Amerika Samoa, na fa’amavae mai i lenei galuega i le amataga o le masina nei.

E pei ona taua e Uta i sana tusi fa’amavae sa tu’uina atu i le afioga i le ali’i kovana mafua’aga o lona manatu e fa’amavae mai i lenei tofiga, ona o tulaga lava i le le atoatoa lea o le malosi o le tino e fa’atino ai lana tautua.

O se tasi o tiute tele sa tauaveina e Uta a o ia nofoia ai le nofoa o le Fa’atonusili, o le fai lea o ia ma Ta’ita’i Malaga a Amerika Samoa i Guam, i le Fa’aaliga lona 12 o Tu ma Aganu’u a le Pasefika, lea sa fa’agasolo i le va o le masina o Me ma Iuni o le tausaga lenei mo le umi e 2 vaiaso.

I le mae’a ai o sailiga tofi a le atunu’u e ala i le palota na se’i mavae atu nei, lea fo’i sa lei manuia ai taumafaiga a le tofa Uta mo le nofoa o le itumalo o Sua i le maota o sui mo le ulua’i taimi, sa ia taua ai i le Samoa News lona sauni e fa’amavae mai lana galuega, ae taula’i lana silasila i le tulaga o le avea ai o ia ma tagata matua o le a malolo litaea, ona ua matua fo’i le soifua ma ua talafeagai le tatau lea ona fai se malologa mai galuega sa tautua ai i le malo mo le silia i le 30 tausaga.

I tofiga mo le afioga a Tapa’au, sa taua fo’i e Lolo i lana poloaiga sa tu’uina atu i Fa’atonusili ma Fa’auluuluga o Matagaluega ma Ofisa a le malo lona tofiga o lenei tamali’i o le atunu’u, e avea ma Fa’atonusili le tumau o le Matagaluega o Fa’atoaga a le malo.

“I le toesea ai o le Fa’atonusili fa’apea ai ma le Sui Fa’atonusili mai le atunu’u, ua ou tofia ai le afioaga a Tapa’au e avea ma Fa’atonusili le tumau o lenei Ofisa, seia o o i le taimi ou te toe tu’uina atu ai se isi fa’aaliga”, o le saunoaga lea a Lolo i lana poloaiga.

Saunoa le ali’i kovana e fa’apea, o le tofiaina o le afioga a Tapa’au i lenei taimi faivavevave ma le mana’omia o se tasi na te tauaveina lenei tofiga, na fa’avae mai lea i le tulaga matuia ma le ogaoga o lo o a’afia ai tulaga o le saogalemu i fa’atoaga ma taumafa o lo o fa’atau atu e le aufai fa’atoaga a le atunu’u i le polokalame o Meaai Taumafa a Fanau Aoga (School Lunch).

“O le mataupu e fa’atatau i le fa’aaogaina o vailaau, vailaau fa’alelei eleele atoa ai ma isi ituaiga vailaau o lo o fa’aaoga e le aufai fa’atoaga a le atunu’u e tausia ai a latou togalaau’aina ina ia ola lelei, o se tasi lea o mataupu taua e tatau ona matua iloilo ma auiliili lelei ina ia mautinoa, e ausia le tulaga saogalemu e tatau ma moomia mo le atunu’u”, o se vaega lea o le saunoaga a le ali’i kovana.

“E le gata i le tulaga e fa’atatau i le saogalemu, ae o le tulaga fo’i e fa’atatau i le fa’aitiitia pea o tulaga o ituaiga taumafa nei i le atunu’u, o le tulaga taua lea e tatau ai ona matua si’itia i luga le totoina atoa ai ma le atina’eina o fa’atoaga lotoifale i Amerika Samoa. E taua tele le tatau lea ona galulue Amerika Samoa i le atina’eina o fa’atoaga lotoifale, e maua ai taumafa lelei e tua i ai le soifua maloloina o le atunu’u atoa”, o se vaega lea o le saunoaga a le ali’i kovana.

Sa ia taua atili fo’i e fa’apea, o le galulue faipa’aga o le Matagaluega o Fa’atoaga fa’apea ai ma le Vaega o le “Land Grant”, o se tasi lea o itu taua e mautinoa ai le malu puipuia ma le saogalemu o taumafa i totonu o le atunu’u.

I le fa’aiuga o le poloaiga a le ali’i kovana, sa ia talosagaina ai le mamalu o le Kapeneta ina ia fa’ailoa lo latou lagolagoina o lana tofiga fa’asaga ia Tapa’au, e ala i le fa’ailoa o le latou galulue fa’atasi ma ia i soo se itu e moomia ai la latou fesoasoani.

E pei ona silafia, o le afioga i le ali’i Faatonusili ia Lealao sa ia tauaveina lenei nofoa mo le tele o tausaga, o lo o a’afia o ia i gasegase o le tino.