O le fonotaga mulimuli a le Komiti o le Tuuga Fautasi ma Kapeteni o Fautasi uma sa tausinio i  ulua’i tuuga e 2 sa fa’atinoina i le taeao ananafi, ua fa’amautu ai loa Sa e 7 ua lautogia mo le sailiga siamupini o Faigamea o le Tai mo lenei tausaga, lea ua fa’amoemoe e fa’ataunu’uina i le itula e 9:00 i le taeao nei.

O Sa e 7 ua lautogia mo le sailiga siamupini i le taeao nei e aofia ai le Paepaeulupoo II mai Aua, Fuao mai Vatia, Manulele Tausala I mai Nuuuli, Matasaua mai Manu’a, Taema II mai Leone, Iseula o le Moana mai Fagatogo, ma le Fetu o le Afiafi mai Fagaalu.

O Sa e lua ua le manuia le la taumafaiga mo se avanoa i le sailiga siamupini o lenei tausaga, e aofia ai le Fealofani Samoa III mai Fagasa, ma le Aeto I mai Pago Pago, o ni isi o Fautasi sa manatu le to’atele e maua ni o la avanoa i le sailiga siamupini mo le fu’a o lenei tausaga.

Ae tusa ai o fa’amaumauga a le Komiti i taimi o Sa uma e 9 sa tausinio, e televave atu le taimi o le mua ma le tulua o le tuuga lona lua nai lo le taimi o le Sa sa muai le ulua’i tuuga.

E televave atu le taimi a le Paepaeulupoo II i le “35.19.13” ma le Fuao i le taimi e “35.19.35” i le taimi a le Manulele Tausala I sa mua i le ulua’i tuuga i le taimi e “35.24.78”.

Na molimauina e le Samoa News i tapuaiga a afioaga eseese sa tausinio a latou Sa i le aso ananafi le to’a o le tapuaiga i nofoaga eseese sa fa’amautu ai fa’auluuluga o afioaga, ae mo le nofoaga sa tini atu i ai le tuuga, sa molimauina fo’i le pisapisao o le tele o tapuaiga sa i ai, i le fa’amalosi ‘au atu lea i a latou au va’a ina ia fa’amalolosi.

Na fa’afetaia e le afioga i le Lutena Kovana ia Lemanu Peleti Mauga ma le afioga i le Maoputasi ia Mauga Tasi Asuega ali’i va’a uma sa gafa ma le tuuga i le taeao ananafi, i le matagofie o le taulaga sa i ai le tuuga.

“Faamalulu atu i afioaga ua le mafai ona manuia taumafaiga a latou Sa, e ui ua le tini le fa’amoemoe mo lenei tausaga, ae fa’amoemoe e toe taumafai mai i lena tausaga o i luma, ae mo Sa uma ua lautogia mo le tuuga i le aso a taeao, ia fai malu le faiva ma ia fa’amoemoe i le Atua”, o le saunoaga lea a Mauga, lea fo’i na lagolago atu i ai le afioga a Lemanu.

Na molimauina fo’i i le fonotaga le leai o se tulaga sa fa’aletonu i le tapuaiga a ali’i va’a, ona sa molimauina le to’a o le tapuaiga ma taumafai ina ia fa’atino le tuuga i se tulaga lelei ma mama.

O le itula e 8:00 i le taeao nei lea ua fa’amoemoe e amata ai le tuuga mo Sa faapitoa e 4 lea e lei auai i le ulua’i tuuga ananafi, lea e aofia ai le Sa mai le afioaga i Fagatogo, le Sa mai Nuuuli, le Sa o le Sinapioa o loo alo e fanau aoga mai le Aoga Maualuga i Fagaitua, ma le Sa o le God is Great o loo alo e le afioaga i Pago Pago.

O le mae’a ai o le tuuga faapitoa lea, ona sauni atu ai loa lea o Sa e 7 ua lautogia mo le sailiina o le siamupini i le latou tuuga i le itula e 9:00.