Ads by Google Ads by Google

Fa’alauiloa aloaia lisi o sui tauva mo le Palota

ausage@samoanews.com

O le vaiaso na te’a nei ina ua tapunia aloaia le lesitalaina o ni sui e tauva mo le palota a le atunu’u i lenei tausaga, na fa’alauiloa ai e le Komesina o le Ofisa o Palota ia Uiagalelei Dr. Lealofi Uiagalelei, le lisi o suafa o i latou uma ua mae’a ona lesitala mo le palota tele a le atunu’u i le aso 8 Novema 2016, lea o le a sailia ai le tofi Kovana ma le Lutena Kovana, sui Faipule mo le nofoa i le Konekeresi, ma faipule o itumalo eseese mo le maota o sui i le Fono Faitulafono.

 

E pei ona taua i le lisi ua mae’a ona fa’alauiloa, e 3 paga ua sauni nei e tauva mo le sailiina o se ta’ita’i mo le faigamalo i le isi 4 tausaga o lo o lumana’i nei, to’a 5 ua sauni e tausini mo le tofi Faipule i Uosigitone, ma le to’a 62 o le a tausinio mo nofoa e 20 i le maota o sui.

 

O le nofoa e atoa i ai nofoa e 21 i totonu o le maota o sui, o le nofoa lea mo le itumalo o Swains, lea ua fa’amoemoe e filifilia sa latou sui faipule e nofoia le nofoa o le itumalo mo le isi 2 tausaga, i se fonotaga fa’apitoa e saili mai ai so latou sui.

 

Ua atagia mai ai fo’i i le lisi  le leai o se isi e tausinio ma le tofa i le Tau To’oto’o ia Savali Talavou Ale i le nofoa o le Itumalo o Alataua, ma ua mautinoa ai le toe fo’i mai o ia mo le paeaiga lona 35 a le Fono Faitulafono o le a sosoo ai nei.

 

Mo le tofi Kovana ma le Lutena Kovana, ua tula’i mai ai le paga a Tuika Tuika ma Salanoa Iuni Maeva Saveena, lea o le a tausinio fa’atasi ma le paga a Faoa Aitofele Sunia ma Larry Sanitoa, fa’apea ai le paga a Lolo Matalasi Moliga ma Lemanu Peletie Sialega Mauga.

 

Mo le tofi faipule i le laumua i Uosigitone, e tasi le sui tauva fou lea fa’atoa fa’alauiloa aloaia lona suafa, o le susuga lea ia Timothy Jones. O isi sui tauva e aofia ai Vaitinasa Dr. Salu Finau Hunkin, Meleagi Suitonu Chapman, Paepaetele Mapu Jamias, ma le afioga i le Faipule Tama’ita’i o lo o ia nofoia le nofoa o le atunu’u i le taimi nei, le tofa ia Aumua Amata.

 

Mo le maota o sui, ua fa’ailoa i le lisi a le Ofisa o Palota le toe tausinio uma o afioga i Faipule o lo o nofoia nofoa a latou itumalo, se’i vagana ai le afioga i le isi faipule mai le itumalo o Tuala-uta, susuga Larry Sanitoa lea ua le lesitalaina lona suafa i le la paga ma le afioga i le Ali’i Fa’alagia ia Faoa, mo le tofi kovana ma le lutena kovana o le malo.

 

E to’a 8 i sui tauva sa latou nofoia muamua nofoa a o latou Itumalo, ua mae’a ona lesitala, o i latou ia e aofia ai Fiasili Puni E. Haleck, Limutau F.C Limutau, Tuialofi Fa’alae Lauatua’a Tunupopo, Tapumanaia Galu Satele Jr., Galumalemana Bill Satele, Gafatasi Afalava ma Meafaiga T. Faoa.

 

O se tausaga palota ese fo’i lenei mo le maota o sui i le Fono Faitulafono, ua molimauina ai le to’atele o sui tauva tama’ita’i ua tausinio mo nofoa a latou itumalo i le aofaiga e 10, lea e aofia ai ma afioga i Faipule Tama’ita’i e to’alua o lo o nofoia nofoa a laua itumalo i le taim nei, e pei o le afioga ia Vui Florence Vaili Saulo mo le itumalo o Tuala-uta, faapea ai Atalina Asifoa mo le itumalo o Leasina.

 

O isi sui tauva tama’ita’i sa tausinio muamua i palota ua mavae atu, e aofia ai Fiasili Puni E. Haleck, Salota Lutu Schuster, Andra Samoa ma Su’a Lucia Bartley.

 

Ae mo sui tauva tama’ita’i o le ulua’i taimi lenei ua tausinio ai mo le nofoa o le itumalo, e aofia ai Taumanupepe Fa’afetai Maiavatele Seumanu, Va’asa Uluiva Simanu, Saipai Cassens, Barbara Fesilafa’i Pelina Salima, ma Fatima Faumuina Langkilde.

 

O ni isi sa avea ma sui o le Kapeneta i faigamalo ua mavae atu e aofia ai le afioga ia Ufuti Fa’afetai Ieremia, lea sa avea ma Pulesili o le Ofisa o Femalagaaiga a le atunu’u, ma le  afioga a Taeaotui P. Tilei lea sa avea ma Fa’atonusili o le Matagaluega o Galuega Lautele a le malo.

 

O le afioga i le Fa’atonusili o le Ofisa o Aganu’u ma Measina a le malo, ia Uta Dr. Laloulu Tagoilelagi, o le a to’alua i ai sui tauva mo le nofoa o le itumalo o Vaifanua.

 

Ina ia tusa ai ma le vaega o le Tulafono o Palota 6.0302 (a), e mafai e soo se tagata ua mae’a ona lesitala e avea ma tagata palota ona ia fa’auluina se talosaga e fesiligia ai le agava’a o soo se tasi ua mae’a ona fa’alauiloa e avea ma se sui tauva i le palota tele o lo o loma nei.

 

E tatau ona aofia i le tusi ni mafua’aga tatau o lo o fa’avae ai i luga le tusi tete’e, ma ia sainia ai le suafa o le tagata o lo o ia fa’auluina le tete’e, ma tu’uina atu loa le tusi i le Ofisa o le Komesina o Palota, ao le’i tuana’i le aso Tofi, aso 8 Setema 2016 i le itula e 4:00 i le afiafi.

 

O le tuana’i ai o le taimi ma le aso e pei ona taua, poo le mae’a fo’i lea ona iloiloina o talosaga o le a tu’uina atu, ona mafai ai loa lea ona fa’amaonia aloaia sui tauva uma mo le palota, ma lomia ai loa o le lisi o sui tauva mo le paltoa ua aloaia le tausinio mo tofiga eseese a le atunu’u.