Fa’alauiloa aloaia le fa’aaoga masini Rapiscan su’e ai uta mai fafo


Se vaaiga i le taimi na su’eina ai container i le masini fou a le malo lea ua fa’aaoga e su’e ai uta ma oloa mai fafo i le vaiaso na te’a nei. [ata AF]

Fa’ailoilo i totonu o le uafu e fa’ailoa atu ai o lo o fa’aaoga le masini e su’e ai uta o oloa mai fafo, ina ia silafia ai e le atunu’u tulaga o le galuega o loo fa’ataunu’uina. [ata AF]
ausage@samoanews.com

O le vaiaso na te’a nei na tu’uina aloaia mai ai e le Teutupe a le malo se fa’asalalauga fa’alaua’itele, e fa’ailoa aloaia atu ai i le atunu’u ae maise lava i le aufai pisinisi, i le alaoai lea o le fa’aaogaina o le masini (Rapiscan) e su’e ai uta o oloa mai fafo i luga o le uafu tele i Fagatogo i le amataga o le masina fou o Aperila

 

E pei ona taua e le Teutupe ia Uelitone Tonumaipe’a i sana tusi i le vaiaso na te’a nei e fa’apea, ina ia tusa ai ma le tulafono sa pasia e le Fono Faitulafono ma sainia e le kovana i le tausaga na te’a nei, ua tu’u atu ai i le Ofisa o Tupe e aofia ai ma le lala o le Ofisa o Tiute le malosi e fa’aaoga ai masini faata e su’e ai oloa uma mai fafo, atoa ai ma le fa’eeina atu o totogi e tusa ai o nei tautua.

 

Na taua e Tonumaipe’a e fa’apea, o le Tulafono 34-19 lea na aloaia lona fa’amalosia i le aso 14 Tesema 2016 o loo taua mai ai tulaga nei e fa’apea, “O le tulafono e fa’ataga ai sui o le Tiute ona o latou su’e ma saili va’a uma, va’alele fa’apea ai ma soo se tagata e ulufale mai i totonu o le teritori, e ala i le fa’aaogaina o le masini o le Rapiscan e sailia ai uta uma e aumaia i totonu o containers, o uta ta’itasi, afiafi fa’apea ai uta o mea faigaluega”.

 

“Ao molimauina ai ni isi o tulaga le ma’alofia e mafua mai i le tuai mai o ni isi o vaega o le masini e fa’atinoina ai le tautua a le Ofisa, atoa ai ma le taumafai ina ia fa’amae’a ni isi o vaega e aofia ai aoaoga mo le saogalemu o le aufaigaluega ma tagata uma, e fiafia le Matagaluega o Tupe faapea ai ma le Ofisa o Tiute e fa’alauiloa aloaia atu i le atunu’u e fa’apea, ua aloaia nei le fa’aaogaina o le masini o le Rapiscan e saili ai uta uma e ulufale mai i le atunu’u i le aso 3 Aperila 2017”, o se vaega lea o le tusi a le Teutupe a le malo.

 

Na toe fa’amanino atili e Tonumaipe’a i lana tusi le fa’aaoga fa’atasi o le masini e su’e ai oloa, ma le tau e totogi e le aufai pisinisi atoa ia ma le atunu’u atoa, mo le fa’aaogaina o lenei masini, le ituaiga o le “M60 container scanner”.

 

“E fai a’u ma sui o le Ofisa o le Tupe faapea ai le vaega o le Tiute a le malo e fa’afetai atu ai i le atunu’u atoa, aemaise ai i latou sa lagolagosua i le taumafaiga o lenei fa’amoemoe, lea ua mafai ai ona fa’atinoina se tasi o la’asaga taua mo le fa’aleleia o tautua ma galuega fa’atino a le malo”, o le saunoaga lea a le Teutupe.

 

Na fa’aiu lana tusi i lona fa’afetaia o le lagolago malosi a le Fa’atonusili ma le aufaigaluega a le Pulega o Uafu ma Malaeva’alele, lea ua mafai ai ona fa’atinoina lenei fa’amoemoe taua a le malo.

 

E pei ona tele ai fesili ma fa’asea a le atunu’u, o le vaiaso na te’a nei na fa’atinoina ai e le Senate ma le Maota o Sui ni iloiloga e fesiligia ai le sui o le malo, i le mafua’aga ua tuai ai ona fa’aaoga masini sa alu ai tupe a le malo e su’e ai oloa mai fafo.

 

Na fa’amanino e le Pule o le Ofisa o Tiute a le malo ia Moetulu’i Fuiava i le vaiaso na te’a nei e fa’apea, talu ai o nai vaega o loo moomia le fa’amae’a aloaia, o le mafua’aga lena ua mafua ai ona tuai laititi le fa’atinoina o lenei fa’amoemoe, peita’i o loo i ai le fa’amoemoe o le masina fou o Aperila e fa’aaoga aloaia ai masini e pei ona fesiligia.

 

O le aso Faraile na te’a nei na molimauina ai e ni isi o le atunu’u atoa ai ma le Samoa News se tasi o fa’ata’ita’iga mo le fa’aaogaina o masini, i luma tonu o le vaega o loo ulufale atu ai ta’avale i totonu o le uafu tele i Fagatogo.

 

O se tasi o tulaga sa atugalu i ai sui o le Fono Faitulafono, o le saogalemu o le atunu’u atoa ai ma tagata faigaluega i luga o le uafu i le taimi e fa’aaoga ai le masini e su’e ai oloa, peita’i na fa’amanino e Moetulu’i e fa’apea, e matua malu puipuia le saogalemu o tagata uma i le taimi e fa’aaoga ai le masini e su’e ai iloa, ua mae’a fo’i ona a’oa’oina le aufaigaluega mo le fa’atinoina o gaioiga uma mo le saogalemu o tagata fegasoloa’i.

Comment Here