Fa’alauiloa ali’i Kovana ni isi o ana Tofiga mo lana Kapeneta


[ata: archive]
ausage@samoanews.com

O le vaiaso nei na sainia ai e le afioga i le ali’i Kovana ia Lolo Matalasi Moliga, ana poloaiga e fa’amaonia ai ni isi o ana tofiga ua mae’a ona faia mo i latou e avea ma Fa’atonusili le tumau mo ni isi o Ofisa ma Matagaluega a le malo, e fa’atalitali ai le taimi e fa’amaonia ai i latou i luma o le Fono Faitulafono.

 

O ni isi o ia tofiga fou e 6 e aofia ai tofiga tuai e 2 mo le afioga ia Dr. Peter Tinitali e toe avea ma Fa’atonusili le tumau o le Ofisa e Puipuia Aia Tatau o i latou e i ai manaoga fa’apitoa o le tino ma le mafaufau, ma toe fa’aauau ai lana tautua sa ia fa’atinoina i le 4 tausaga ua mavae, fa’apea ai ma le toe filifilia o le afioga a Tamaaiga Maeata’anoa Pili Gaoteote e avea ma Fa’atonusili le tumau o le Ofisa o Paka ma Malaeta’alo a le malo mo le isi 4 tausaga o loo lumana’i nei, ma toe fa’aauau ai lana tautua sa fa’atinoina mai i le 4 tausaga ua mavae.

 

O isi tofiga e 4 a le ali’i kovana, o ni isi ia o ana tofiga fou ua mae’a ona fa’alauiloa mo sui o lana Kapeneta, lea e aofia ai le tofia o le afioga a Tuimavave Tauapa’i Laupola e avea ma Fa’atonusili le tumau o le Ofisa o Fa’amatalaga a le malo, le KVZK-TV.E pei ona silafia, o le tofa a Fagafaga D. Langkilde sa avea ma Fa’atonusili o le Ofisa o Fa’amatalaga a le malo mo le 4 tausaga ua mavae atu, peita’i o lea ua tofia i ai le afioga a Tuimavave.

 

O le isi tofiga fou a le ali’i kovana e aofia ai le filifilia o Eseneiaso Liu e avea ma Fa’atonusili o le Matagaluega o Tagata Faigaluega a le malo mo le isi 4 tausaga, e sui tulaga i le tofa i le Tootoo ia Le’i S. Thompson sa ia tauaveina lea tofiga i le 4 tausaga ua mavae, a o lea ua filifilia e avea ma Komesina fou o le Matagaluega o le Puipuiga o le Saogalemu Lautele.

 

O le tofa a Leseiau T. Laumoli lea ua filifilia nei e avea ma Fa’atonusili o le Ofisa e fa’atautaia Fuafuaga ma Polokalame e taofi ai Solitulafono mo le isi 4 tausaga o loo lumana’i nei.

 

Ma le tofiga mulimuli, lea ua filifilia i ai le tofa ia Paogofie Fiaigoa e avea ma Fa’atonusili le tumau o le Ofisa o Tu ma Aganu’u a Amerika Samoa mo le isi 4 tausaga, e sui tulaga i le tofa Uta Dr. Laloulu Tagoile lagi sa ia tauaveina mai lenei tofiga i le 4 tausaga talu ai, lea ua malolo ona o tulaga i lona soifua maloloina.

 

O le masina lenei o Ianuari na aloia ai le fa’atinoina e i latou ua tofia e le kovana o lenei galuega, o latou tiute fa’atino e fa’atalitali ai le taimi e fa’amaonia ai i latou e le Fono Faitulafono.

 

Ua i ai le fa’amoemoe o Ta’ita’i o le Fono Faitulafono o le toe amataina ai o galuega masani a maota e lua i le taeao o le aso Gafua o le vaiaso fou, pe a toe a’e mai le Fono mai lana malologa e 2 vaiaso sa alo atu i ai, ona amata loa lea ona fa’atulaga taimi ma aso e faia ai iloiloga a Komiti ta’itasi, mo le iloiloina o tofiga a le ali’i kovana ua mae’a ona fa’atinoina.

Comment Here