Ads by Google Ads by Google

Fa’aitiitia i le $4 miliona tupe Polokalame Fa’apitoa a le Kovana

ausage@samoanews.com

E silia i le $4 miliona lea ua fa’aitiitia ai le vaega tupe ua fa’atulaga mo le Polokalame Faapitoa a le Kovana mo le Paketi o le Tausaga Tupe fou 2018, pe a fa’atusatusa i le aofa’i sa fa’atulaga mo le Paketi o le Tausaga Tupe tuai lenei 2017.

 

E $28.8 miliona le aofa’i o le tupe sa fa’atulaga mo le Polokalame Fa’apitoa o le Tausaga Tupe lenei, a o lea ua fa’aitiitia i le $24.4 miliona mo le Tausaga Tupe fou.

 

O lo o fa’amanino auiliili e le kovana i le Fono mafua’aga taitasi ua ala ai ona manatu le malo e fa’atulaga vaega tupe ta’itasi mo lana Polokalame Fa’apitoa, ina ia manino ai ma malamalama le autu moni o lo o manatu le malo e fa’aaoga i ai vaega tupe ta’itasi nei.

 

Mo se fa’ata’ita’iga o vaega tupe fesoasoani ta’i $100,000 lea ua manatu le malo e tu’uina atu mo le Aufai Faiva ma le Aufai Fa’atoaga a le atunu’u, ona o le agaga lava o le malo ia si’itia tautua mo le aufai fa’atoaga ma le aufai faiva.

 

O le tupe fesoasoani mo le aufai fa’atoaga, na taua e le afioga i le ali’i kovana ia Lolo M. Moliga le agaga atoa o le malo, ina ia fa’amalosia ai loto o le aufai fa’atoaga e toto soo se faatoaga i le eleele, ina ia mafai ai ona tali atu i le fofoga taumafa o le atunu’u.

 

I le vaavaai i le tulaga tau i le tamaoaiga, o le isi autu ua mafua ai ona manatu le malo e fa’aalu lenei vaega tupe, e le gata ina ia unaia ai loto o le aufai fa’atoaga e la’u fua o fa’aeleeleaga e fa’atau i maketi i fafo, ae o se auala fo’i e fa’ateleina ai fua o fa’aeleeleaga e fa’atau ma sapalai solo i totonu lava o le atunu’u.

 

O le a galulue fa’atasi le malo ma le aufai fa’atoaga e fa’atulaga polokalame tonu e agava’a ona fa’atupe i lalo o lenei vaega tupe fesoasoani.

 

Ae mo le aufai faiva a le atunu’u, o le agaga lava fo’i lea e tasi o le malo, e le gata ina ia fesoasoani i le atina’e o faiga faiva, ae fesoasoani ai fo’i i le aufai va’a alia e fa’aleleia atili ai tulaga o fagotaga.

 

O le a galulue fa’atasi fo’i le malo ma le Asosi a le aufai faiva e saili polokalame tatau e talafeagai ona fa’atupe i lalo o lenei vaega tupe fesoasoani..

 

I le atina’e o aoga, na taua ai e le ali’i kovana e fa’apea, o le $500,000 lea ua fa’atulaga mo le fa’aleleia o Fale Taalo a aoga maualuluga, ua faia ma le fa’amoemoe ia lelei nofoaga e faia ai ta’aloga a fanau aoga, ina ia lelei ai le atina’eina o ta’aloga mo le lumana’i o fanau.

 

O le vaega tupe sa pasia i le paketi o le tausaga tupe 2015, na mafai ona fa’afou ai fale taalo i ni isi o aoga maualuluga e pei o le aoga maualuga a Leone, e aofia ai le fa’afouina o vaega uma lava o le fale ina ia lelei vaega e fa’aaoga e fanau aoga.

 

Mo le fa’amatagofieina o le atunu’u, e $100,000 le vaega tupe lea ua fa’aagaga e fa’atupe ai lea auaunaga.

 

Na taua e Lolo e fa’apea, o se tasi o fa’anaunauga o le malo, ia lelei le fa’amatagofieina o le atunu’u i soo se itu, ina ia fesoasoani ai i le atina’e tau turisi lea o lo o taumafai pea e una’i ma fa’amalosi i le taimi nei.

 

O le fa’amatagofieina o le atunu’u atoa, o se vaega pito sili lea ona taua mo le atunu’u atoa, e le gata e fa’atosina mai ai turisi, ae fa’atosina mai ai fo’i tagata faipisinisi e ulufale mai ma fa’atutu a latou pisinisi i le teritori.

 

“O lenei fa’amoemoe, e le na o matagaluega ma ofisa tumaoti a le malo e galulue ai, ae o se polokalame e tatau ona galulue ai le atunu’u atoa e aofia ai nu’u ma itumalo,” o se vaega lea o le saunoaga a le ali’i kovana.

 

O le a fa’aalu lenei vaega tupe e le gata i fa’asalalauga e fa’alauiloa ai Amerika Samoa, ae fa’atupe ai fo’i tulaga gaioiga mo le tamaoaiga.

 

Mo le fa’atauaina o le tautua a tagata matutua, e $500,000 lea ua fa’atulaga e le malo e fesoasoani ai i le auaunaga a le Ofisa o le TAOA i le atunu’u.

 

Saunoa Lolo e fa’apea, talu ai tulaga fa’aletonu i alaga tupe mai le feterale o lo o fa’atupe ai polokalame mo Tama ma Tina matutua, ua manatu ai le malo e tu’u atu lenei fesoasoani ae fa’aleleia atili ai le tautua a le TAOA mo tagata matutua, e fa’atalitali ai le taimi e taunu’u mai ai mai vaega tupe fesoasoani a le malo feterale.