Ads by Google Ads by Google

Fa’aitiitia aofa’i o fanau talavou a’afia i solitulafono eseese

ausage@samoanews.com

Ua fa’aalia i fa’amaumauga a le Ofisa o le Loia Sili a le malo o Amerika Samoa le fa’aitiitia lea o le aofa’i o mataupu tau solitulafono e a’afia ai fanau talavou ua mafai ona faila e le latou Ofisa i luma o le Fa’amasinoga i le tausaga lenei, fa’atusatusa i le 2 tausaga ua mavae lea sa molimauina ai le fa’atupulaia o le aofa’i o fanau talavou sa molia i solitulafono eseese.

 

I se fa’atalatalanoaga a le Samoa News ma le tamaitai loia sili lagolago ia Terrie Bullinger o loo taulimaina mataupu a fanau talavou i luma o le fa’amasinoga, sa ia taua ai le fa’aitiitia o le aofa’i o mataupu tau solitulafono e a’afia ai fanau talavou aemaise lava i fanau aoga ua mafai ona faila i le tausaga lenei 2016, pe a fa’atusatusa i le tausaga e 2015 na te’a nei atoa ai ma le tausaga e 2014 i ona tua atu.

 

O le mafua’aga o le fa’aitiitia o mataupu tau solitulafono e aafia ai fanau talavou ua faila i lenei tausaga, e mafua mai i le tele o polokalame fa’a faufautua ua mafai ona faia e le malo e fesoasoani ai i fanau aoga, aemaise ai o le galulue malosi o le malo e uia isi auala e lagolago ai i polokalame o loo tuu mai e le fa’amasinoga e a’oa’oina ai mafaufau o fanau aoga e fa’amaonia i solitulafono.

 

“O le fa’amisa lava i totonu o aoga atoa ai ma le tagofia o le ‘ava malosi ae lei atoa le 21 tausaga, o ni isi ia o solitulafono o loo toatele fanau talavou atoa ai ma fanau aoga e a’afia ai, ae talu mai polokalame fa’a faufautua o loo ofo atu e le Matagaluega o Auaunaga ma Tautua Lautele a le malo (DHSS), lea o loo aooga ai fanau ma fa’auu mai ai, ina ia fa’atonutonu ai tulaga o le ita ma le tagofia o le ‘ava malosi, ua molimauina ai le fa’aitiitia o mataupu tau solitulafono e a’afia ai fanau aoga ua faila i lenei tausaga”, o le saunoaga lea a Bullinger.

 

Pe tusa ma le 20% lea ua faaitiitia ai le aofa’i o mataupu tau solitulafono e aafia ai fanau aoga ua faila i le tausaga lenei, pe a fa’atusatusa i mataupu sa faila i le tausaga na te’a nei fa’apea ai ma le isi tausaga i ona tua atu.

 

E ese mai i mataupu e a’afia ai fanau talavou ua maitauina le fa’aitiitia, ae oo lava fo’i i mataupu tau solitulafono fa’asaga ia i latou sa ta’usala muamua i isi solitulafono ae ua toe molia foi i isi solitulafono, ua maitauina fo’i le fa’aitiitia i fa’amaumauga a le fa’amasinoga, e pei ona fa’amaonia mai e le Pulesili o le Ofisa Fa’anofovaavaaia, susuga Malcolm Polu.

 

I le avea ai o le susuga a Polu ma Taitai o le Ofisa Faanofovaavaaia mo le 2 tausaga, sa ia taua ai i le Samoa News le fa’aitiitia o mataupu fa’asaga ia i latou e toe molia fa’alua pe sili atu fo’i i isi solitulafono.

 

Ina ua fesiligia le mafua’aga o lea suiga, ae na taua e le susuga Polu e fa’apea, o ni isi o suiga e aofia ai le fa’amalosia e le Ofisa Faanofovaavaaia o tulafono e mataituina ai i latou o loo i lalo o le puipuiga a le Ofisa Faanofovaavaaia ina ia mautinoa e le toe a’afia i latou i ni solitulafono, e pei o le faia lea o suega e iloa ai poo latou tagofia le ‘ava malosi ma fualaau fa’asaina, aemaise ai le fa’amalosia o i latou ina ia auai i aoaoga fa’a faufautua e fesoasoani ai i fa’afitauli o loo a’afia ai i latou e pei o le ita ma le tagofia o le ‘ava malosi.