Ads by Google Ads by Google

Fa’ailoga le vaiaso mo fanau a’oga SPEd i Matafao Elementary


O se va’aiga i ali’i faia’oga o le SPEd i Matafao. Fa’afetai mo lo outou onosa’i, e le faigofie ae o le alofa e mafua ai. [ata: Leua Aiono Frost]

O le taeao ananafi na fa’apotopoto le fanau a’oga a Matafao Elementary, ma latou faia’oga ae maise le ‘au faia’oga mo le Polokalama a le SPEd ina ia tatala aloa’ia le vaiaso e fa’ataua ai le fanau o lo’o i ai mana’oga fa’apitoa i le tino ma le mafaufau.

 

O le avanoa mo le fofoga fa’apitoa na tu’uina lea i le faletua, Sui Pule o le a’oga i Matafao Mrs Atalina Coffin, o ia fo’i sa mua’i avea ma faia’oga i le SPEd i le amataga o lona olaga tautua i le Matagaluega o A’oga a le malo.

 

O lenei pule lua o le tatou A’oga, e 15 tausaga o avea ma Faia’oga o le SPEd i le amataga o lana tautua, peita’i, ua suia mai lana auaunaga e avea ai ma Faia’oga i vasega e pei ona masani ai i so’o se a’oga, ae le galo ia te ia lana tautua na amatalia ai lona olaga galue mo le tatou atunu’u, i le polokalama o le SPEd.

 

I le tautalaga fa’apitoa, sa una’ia malosi ai e Coffin le “olaga alofa i lou uso, o lo ua e matauina, o lo’o i ai mana’oga fa’apitoa!”

 

“Fesoasoani ia i latou, aua e le faigofie lava ona soifua i tatou pe afai tatou te ola i le soifuaga ua faigata ona e iloa atu se isi ua leaga lau va’aiga, po’o le savali atu i se isi nofoaga ona ua le mafai o lo’o fa’aletonu ou vae, ae maise ua faigata ona e tautala, aua e le mafai ona e tautala ua e gugu, ma isi lava mea uma, ua tatou matauina i nisi o i latou ua i ai mana’oga fa’apitoa,” se tasi lea o vaega o lana fa’asoa.

 

Ina ia manino atili lenei fe’au mo le mamalu lautele o fanau a’oga, sa ia tima’ia ai i latou uma, “Aua ne’i latou va’aia ni o outou uiga le alolofa mo i latou, ae ia outou ola e fa’afiafia i latou, fa’ailoa ia i latou e tou te alofagia i latou ma fia fesoasoani mo i latou, o a outou uo pele ma uso i la le tino nei.”

 

Ina ia fa’ailoa atili le agaga alofa, sa ia fa’aaogaina ai se tasi o le vasega 8, o le tamaititi o lo’o soifua ma mana’oga fa’apitoa, ae talu mai ona a’oga, e alaala i Mesepa, sa tatau ona aoga i Pavaiai e tulata i lona aiga, peita’i, ua filifili lava lea atali’i, e aoga i Matafao Elementary.

 

“Aisea ua manatu ai pea o ia, e sau pea iinei e aoga ai?” Ina ua fesiligia e i latou o faia’oga le atali’i faapea fo’i ma matua, ae fa’ailoa mai, “Ona ua fiafia lava o ia, e tele ana uo, ua foliga mai o ni uso moni ma ni tuafafine ia te ia i Matafao. Afai e toe suia lana a’oga, e le mautinoa e ia, pe tua ma ni a lagona fa’aalia o nai fanau i lea aoga ia te ia.”

 

“O le ituaiga avanoa lea ua fa’amamafaina i totonu o le tatou a’oga, e le na’o lenei vaiaso ua tatou fa’ataua ai lagona ma olaga o nei fanau ua i ai mana’oga fa’apitoa, ae mo le vaitau atoa o lo’o nofo a’oa’oina ai i latou fa’atasi ma i tatou uma,” o se tala fa’aauau lea a Coffin.

 

“Pe oo ina tu’ua le a’oga e fia oo le nofoa fa’ata’avalevale o lenei atali’i i le ta’avale e molita’i ai o ia i lona aiga. Ua i ai fo’i le tamaititi e sau i le atoa e toso o ia i lana ta’avale. E le tau vala’auina e ia se isi e fesosoani mai. E oo fo’i i le taimi e fia oo ai o ia i le fale’ai mo le mea taumafa i lea aso ma lea aso, ua fiafia ana uo mamae i lana vasega e tulioso mai e ave o ia i le fale’ai. Ua masani tatou fanau a’oga i le ola fa’atasi ma ia i le lotoa nei i Matafao. Ua oso tatau le fanau a’oga i lana vasega, e fesoasoani ia te ia. Ia fa’apena fo’i le aiga moni o lenei atali’i. O le olaga lea ua mafai ai ona manatu o ia, e le suia lana a’oga e a’oa’oina ai, se’ia oo i lenei tausaga e suia ai le a’oga i a’oga maualuluga,” o se tala lea a Coffin ma ona loimata o le misialofa aua o lona toe tausaga lenei ma i latou.

 

O le fa’alauiloaga o fanau fa’apitoa i vasega ta’itasi, na soso’o ai i le latou polokalama fa’apitoa, ma sa latou fiafia e tutula’i mai i luma o le a’oga atoa ina ua tolaulauina o latou suafa, mo le fa’aulaga o i latou uma.

 

Ina ua mae’a sa faia loa le latou sao mo le polokalama fa’apitoa, o le siva matagofie ma sa sa’asa’a fa’atasi ai i latou ma latou faia’oga.

 

Ina ua mae’a sa tolaulauina mea o le fa’atautaia i aso ta’itasi o lenei vaiaso, ma ua faatulaga ai le aso, e laei ai e le fanau laei o so’o se Cartoon lava o fiafia ai o ia. O le aso Lulu ua fa’atulaga e laei ai le ofu lanu moana. Ae o le aso Tofi ua fa’atulaga ai le teuina o potu ta’itasi mo le tauvaga a le fanau, ma le aso Faraile e amatalia ai le latou fa’amoemoe o le talotalosaga e amatalia i le 12:00 e oo atu i le 2:00 i le aoauli.

 

Na taulotoina atoa e le vasega o fanau a’oga le latou manulauti, ia usita’ia i ituaiga a’oa’oga e tatau ona a’otauina ai le fanau i Matafao, ma le fa’atinoga fo’i o a’oa’oga, ia tutusa lelei mo fanau uma, i latou oloo atoatoa le malosi, faapea fo’i ma le fanau ua i ai mana’oga fa’apitoa.