Ads by Google Ads by Google

Fa’ailoa Lolo ma Lemanu galuega tetele ave i ai fa’amuamua malo


Ni isi o vaaiga i le taimi o le sauniga o le fa’auuina o le kovana ma le lutena kovana i le Malaeoletalu i le aso ananafi, i le taimi na tutula’i ai ta’ita’i o malo ma malo valaaulia ao sisi le tagavai o le malo o Amerika fa’apea ai ma le tagavai o Amerika Samoa. [ata AF]

Le taimi na fa’aee ai aao o Ta’ita’i o Ekalesia eseese uma i Amerika Samoa i le Kovana ma le Lutena Kovana, e fa’amanuia ai mo le toe filifilia o i latou e avea ma ta’ita’i o le atunu’u mo le isi 4 tausaga o loo lumana’i nei. [ata AF]
ausage@samoanews.com

O le fa’aauauina o galuega e pei o le atina’eina o le tamaoaiga o le malo, atoa ai ma le fa’aauauina lea o polokalame e fesoasoani ai i le soifua lelei o tagatanu’u o Amerika Samoa, o ni isi ia o galuega tetele na taua e le kovana ma le lutena kovana o le a ave i ai le fa’amuamua a le la faigamalo mo le isi 4 tausaga.

 

Na fa’atumulia le Malaeoletalu i le taeao ananafi i ta’ita’i o le malo, o malo valaaulia, fa’apea ai le atunu’u lautele na lolofi atu e molimauina le sauniga o le fa’auuga o le ali’i kovana ia Lolo Matalasi Moliga, ma le lutena kovana ia Lemanu Palepoi Sialega Mauga, lea ua toe filifilia e le atunu’u e avea ma ta’ita’i mo le isi 4 tausaga o loo lumana’i nei.

 

O ni isi o malo valaaulia sa auai i lenei fa’amoemoe e aofia ai le Ao Mamalu o le malo tuto’atasi o Samoa, afioga Tui Atua Tupua Tamasese Efi, o le afioga i le ali’i Palemia, susuga Tuilaepa Lupesoliai Sailele Malielegaoi, fa’apea ai ma le Minisita o Tupe mai le malo o Tokelau.

 

Sa fa’apea fo’i ona auai Ta’ita’i o le malo, Ta’ita’i fa’aleaganu’u, Ta’ita’i o Ekalesia eseese i Amerika Samoa, atoa ai ma le atunu’u lautele na auai.

 

O le mae’a ai o le vaega muamua o le sauniga lotu mo le fa’auuina o le kovana ma le lutena kovana, e pei o viiga o le Atua na lagiina e le aufaipese a le Manumalo Baptist Church, fa’apea ai ma le tauaaoina e le Komesina o le Ofisa o Palota o le tusi fa’amaonia e aloaia ai le toe filifilia o Lolo ma Lemanu e avea ma ta’ita’i o le malo mo le isi nofoaiga, na sosoo ai loa ma le fa’atautoina o i laua e le afioga i le Fa’amasino Sili ia Michael Kruse, fa’apea ai ma le fa’apaiaina o i latou e Ta’ita’i o Ekalesia eseese uma i le atunu’u.

 

Na fa’amamafa e le ta’ita’i o le sauniga, susuga Rev. Elder Mamoe Eveni i le upu fa’aleagaga mo le sauniga o le fa’auuga, le tatau lea i ta’ita’i ua filifilia nei le fa’ate’a o fatia ua sola, ae tulimata’i se manuia o le malo ma le atunu’u i le lumana’i.

 

Sa ia fa’amamafaina fo’i i lana saunoaga tulaga manuia o se atunu’u pe afai e i ai ni ta’ita’i e fiafia e savavali i le amiotonu a le Atua, ma filifili e fa’aauau galuega lelei mo le atunu’u.

 

O saunoaga fa’apitoa o le sauniga o le fa’auuga na saunoa i ai le afioga i le ali’i kovana ia Lolo, o le lutena kovana ia Lemanu, fa’apea ai ma le Palemia o Samoa, susuga Tuilaepa Lupesoliai Sa’ilele Malielegaoi.

 

Na tomua le saunoaga a le ali’i kovana i lona fa’afetaia lea o le atunu’u ina ua mafai ona toe filifilia i laua ma Lemanu e avea ma ta’ita’i o le malo mo le isi nofoaiga e 4 tausaga ua amataina nei.

 

Sa ia fa’afetaia fo’i ta’ita’i o le malo o Samoa i le auai mai pea i soo se taimi e fa’atinoina ai sauniga fa’apitoa fa’apenei i Amerika Samoa, ma ua iloa mai ai le naunau pea o ta’ita’i o malo e lua fa’atumau lo la tulaga o le aiga ma le uso e tasi.

 

Mo le isi 4 tausaga o loo lumana’i nei, ua valoia e Lolo ma Lemanu ni isi o galuega o le a ave i ai le la fa’amuamua, ina ia mautinoa e aga’i pea i luma le tamaoaiga o le malo fa’apea ai le soifua manuia o tagatanu’u uma i le atunu’u.

 

“O le a ma galulue mo le tu’uina atu o ni isi o tulafono i luma o le Fono Faitulafono, mo le faia i ai o sa latou fa’aiuga ina ia mautinoa e fa’aauau pea polokalame mo le soifua manuia o le atunu’u i le lumana’i, atoa ai ma le fa’amalosia lea o le tamaoaiga o le malo”, o se vaega lea o le saunoaga a Lolo.

 

O ni isi o ia atina’e e aofia ai le fa’aauauina lea o le galuega lea ua fa’aaoga ai le malosi o le la e maua mai ai le eletise (solar system), lea e pei ona fa’aaogaina i Ta’u i Manu’a, atoa ai ma le isi atina’e i Ofu lea ua fa’amoemoe e tatalaina i se taimi o le tausaga nei.

 

“O le fa’anaunauga o i maua ma Lemanu, ia oo atu i le 2020 ua soo atoa Amerika Samoa i le atina’e o le eletise e maua mai i le la”, o le saunoaga lea a Lolo na fa’alogoina ai le tau fai patipati o le aofia.

 

O isi atina’e o le a fa’aauau ona galulue i ai le malo e aofia ai le fa’aleleia o uafu ma malae va’alele, fa’aleleia atili o auala o femalagaaiga, fa’apea ai ma le fa’amalosia o tulaga o a’oa’oga i Amerika Samoa.

 

O le susuga i le ali’i Palemia o le malo o Samoa na saunoa e tali fuaitau i le saunoaga a ta’ita’i o le malo, ma fa’ai’u ai loa le sauniga i le ‘ava fa’atupu na saunia e le itumalo o le Manu’atele.