Ads by Google Ads by Google

Fa’ailoa Kruse i se ali’i talavou matuia o le le usita’i poloaiga fa’amasinoga

ausage@samoanews.com

“Afai e fa’aauau pea ona e faia le amio o lou le usita’i i poloaiga a le fa’amasinoga, na pau le fa’aiuga a le fa’amasinoga e tu’u atu ia te oe, o le loka lea o oe i le falepuipui mo se taimi umi, pe afai e te le o a’oa’oina se lesona taua mai avanoa sa tu’uina atu muamua e le fa’amasinoga ia te oe”, o le saunoaga lea a le afioga i le ali’i fa’amasino sili ia Michael Kruse na tu’uina atu i le ali’i o Anthony Sioka, i le taimi na iloilo ai e le fa’amasinoga le mataupu a Sioka i le vaiaso na te’a nei.

 

O Sioka na ta’usala e le fa’amasinoga fa’atasi ma isi ali’i talavou i le moliaga mamafa o le faia o uiga mataga i se teineititi e talavou i lalo o le tulafono i le 2013, ma faanofovaavaaia ai loa o ia mo le 7 tausaga, i lalo o poloaiga e ao ona usita’i i ai.

 

O ni isi o ia poloaiga e aofia ai le fa’asa lea ona ia toe soliina se tulafono a le malo, aua fo’i ne’i ona toe tagofia le ‘ava malosi, ae i le masina o Iuni o le tausaga nei, na ta’usala ai e le fa’amasinoga fa’aitumalo ia Sioka i le moliaga mama o le fa’atupu vevesi i nofoaga faitele, e mafua mai ina ua la vevesi ma se isi ali’i, ma faila ai loa e le Ofisa Faanofovaavaaia sa latou talosaga i le fa’amasinoga maualuga, mo se poloaiga e fa’aleaoga ai le nofovaavaaia a le ua molia, ona o lea ua fa’amaonia lona le usitaia o tuutuuga o lana nofovaavaaia.

 

O le taeao o le aso Faraile na te’a nei na fa’atulaga e tu’uina mai ai le fa’aiuga a le fa’amasinoga maualuga, e tusa ai o le mataupu lea ua fa’amaonia ai le le usita’i o Sioka i tuutuuga o lana nofovaavaaia.

 

Na finau le loia a Sioka ia Karen Shelly i le fa’amasinoga e tu’u se isi avanoa i le ali’i ua molia e toe fa’aleleia ai fa’aletonu ua tutupu i lona olaga, peita’i na fa’atonu e Kruse ia Shelly e valaau Sioka e alu i luga o le nofoa molimau, sei fesiligia e le fa’amasinoga i ni isi o mataupu o loo fia malamalama i ai ali’i fa’amasino.

 

Talu mai le taimi na faanofovaavaaia ai e le fa’amasinoga le ua molia i le 2013, sa auai o ia i aoaoga fa’a faufautua e fa’atatau i le leaga o le ‘ava malosi.

 

Na fesili Kruse ia Sioka pe sa i ai se lesona aoga na ia aoaoina mai le aoga fa’a faufautua sa fa’atasi atu i ai, ae na tali le ua molia, “ioe, sa aoga le aoga ia te a’u, ua ou a’oa’oina ai le leaga o le solitulafono”.

 

“Aisea la ua e toe solitulafono ai pe afai sa e aoaoina se lesona mai le aoga na e fa’atasi atu i ai”, o le fesili lea a Kruse na fiu ai e faatali se tali a Sioka, na mafua ai loa ona toe saunoa le ali’i fa’amasino e fa’apea, “afai e leai sau tali, o lo o nofo mai le Masela a le fa’amasinoga e mafai ona ou fa’atonu e toe ave oe i le falepuipui”.

 

Na taua e Sioka i le fa’amasinoga, o le isi taua o le aoaoga sa fa’atasi atu i ai, ua mafai ai ona ia a’oa’oina le taua o le fa’asao o tupe e fesoasoani ai i lona Tina i le totogiina o le latou rent, ae na soisoi Kruse ma saunoa e fa’apea, “E fa’afefea la ona e fesoasoani i lou Tina i le totogiina o le rent pe afai ae loka nei oe i le toese ma e ‘ai saimini ai”.

 

Na malolo le fa’amasinoga mo ni nai minute a o iloilo e ali’i fa’amasino se fa’aiuga mo Sioka, ae ina ua mae’a la latou talanoaga puupuu, na manatu ai loa le fa’amasinoga, o le a taoto atu le mataupu a le ua molia se’i latou toe iloiloina i se taimi ma vaavaai poo le a tonu se fa’aiuga e tatau ona fai, ae tu’u mai aso e 180 e alu ai fo’i le ua molia ma mafaufau, pe faapefea ona ia tuliina fa’amae’a lana fa’asalaga e 7 tausaga i le toese, pe afai e toe taofia o ia i le falepuipui.

 

O le aso 14 Aperila 2017 lea ua fa’amoemoe le fa’amasinoga e toe valaau ai le mataupu a Sioka.