Fa’ailoa Kovana suiga mo le tofiaina o sui o Komiti Fa’afoe

ausage@samoanews.com

Ua fa’ailoa e le afioga i le ali’i kovana i lana Kapeneta le i ai lea o ni suiga ua la fuafua ma le afioga a Lemanu Peleti Mauga e faia, mo le tofiaina o totino o Komiti Fa’afoe a Vaega eseese o le malo mo le isi 4 tausaga o loo lumana’i nei.

 

O ni isi o ia suiga e aofia ai le tu’u o le avanoa e filifili mai ai i le atunu’u lautele totino o Komiti Fa’afoe, ina ia mafai ai fo’i ona maua le avanoa e tu’u mai ai le sao o tagatanu’u lautele o le atunu’u i le tautuaina o le malo.

 

“O le taua o suiga e pei ona ma vaavaai i ai ma le lutena kovana, ina ia fa’aauau ai pea taumafaiga a la tatou faigamalo ua mae’a ona fa’ataoto, o le maua lea e tagatanu’u uma o le avanoa e tautua ai i totonu o le faigamalo i soo se vaega ma auaunaga”, o se vaega lea o le saunoaga a le ali’i kovana.

 

“E tele naua tagata lautele o le atunu’u o lo o i ai le tomai ma le agava’a e avea ma sui o Komiti Fa’afoe a vaega eseese o le malo, o se avanoa lelei fo’i lea e fa’asoa mai ai lo latou tomai ma tu’u fa’atasi ai ma le silafia o i latou ua leva ona galulue i le malo, ina ia maua ai e totino o Komiti Fa’afoe metotia ma le tomai eseese e fa’atino ai a latou pito laau mo le tautuaina o le atunu’u”.

 

Ua fautuaina e Lolo ia vaega uma o le malo o loo pulea ma fa’atautaia i latou e Komiti Fa’afoe e pei o le Falema’i o le LBJ, Pulega o le Eletise ma le Suavai (ASPA), Kolisi Tu’ufa’atasi (ASCC), atoa ai ma le Kamupani Telefoni a Amerika Samoa (ASTCA), ina ia amata loa ona fa’ailoa atu le aofa’i o totino o a latou Komiti Fa’afoe o loo i ai, ina ia fa’a faigofie ai ona fuafua a la suiga ma le afioga a Lemanu.

 

Ua fautuaina fo’i e le ali’i kovana ta’ita’i o Ofisa Tumaoti uma a le malo ma a latou Pulega ina ia tu’uina atu ni a latou fautuaga, e fesoasoani ai i auala e filifili mai ai totino o a latou Komiti Fa’afoe.

 

“E ui o le fa’aiuga e faia e maua ma le afioga a Lemanu, ae taua tele fo’i le tu’uina mai o la outou fautuaga i auala e filifili mai ai totino o Komiti Fa’afoe, ina ia mautinoa e le pito tasi le filifiliga o le a fa’ataunu’uina”.

 

I le fa’aiuga o le fonotaga a le Kapeneta, na maua ai le avanoa o sui o Ofisa Tumaoti o le malo, e fa’aleo ai o latou lagona e tusa ai o le va o i latou ma sui o Komiti Fa’afoe o loo latou galulue fa’atasi.

 

Na taua e le Pulesili o le LBJ ia Taufete’e John Faumuina le taua tele o le va feagai ai o le Pulega a le Falema’i ma le Komiti Fa’afoe a le Falema’i, i lo latou galulue fa’atasi lea e saili auala e fa’aleleia atili ai le tautua a le falema’i mo le atunu’u, aemaise ai fa’aiuga ma tulafono e puipuia ai tagata faigaluega mai le fa’atinoina o a latou galuega.

 

Saunoa Taufete’e e fa’apea, o loo i ai ni isi o tulafono ma fa’aiuga ua mae’a ona faia e le Pulega a le LBJ e fesoasoani ai i le fa’amalosia o tulaga tau tupe, peita’i o loo fa’ataoto pea lava lona fa’amalosia i le taimi nei i lalo o le fautuaga a le Komiti Fa’afoe, se’i vagana ua matua mana’omia le fa’amalosia o ia tulafono ma ta’iala ona fa’atoa aloaia loa lea.

 

Na taua e le ali’i kovana le taua tele o le va feagai o le Komiti Fa’afoe ma le Pulega o Ofisa Tumaoti a le malo, ona o i latou e fa’alagolago i ai le manuia o le tautua a le malo i le atunu’u.

Comment Here