Fa’ailoa Fiaui mamafa fa’asalaga fa’asaga i tagata e le totogia salatupe

ausage@samoanews.com

O se tasi o mataupu na mafai ona fa’asoa e le Loia Fautua mo Tagata Lautele, i luma o le Komiti o Mataupu Tau Tulafono a le maota o sui i le vaiaso na te’a nei, o le fa’afitauli o lo o fetaia’i ma tagatanu’u i le fa’asala lea e le fa’amasinoga o i latou i le toese i Tafuna, pe afai e le mafai ona totogi a latou salatupe.

 

Na fa’amanino e le Loia Fautua ia Douglas Fiaui i luma o le komiti e fa’apea, ua to’atele tagatanu’u ua toe poloaina e le fa’amasinoga le taofia i le toese i Tafuna, e mafua mai ina ua fa’amaonia lo latou le totogiina o a latou salatupe sa tu’uina atu e le fa’amasinoga.

 

E pei ona masani ai le fa’amasinoga maualuga i soo se taimi e tuuina atu ai fa’asalaga i soo se tasi e ta’usala i se solitulafono, e i ai tuutuuga poo poloaiga e tu’uina atu e le fa’amasinoga i le tagata ua ta’usala e tatau ona usita’i i ai, ma o ni isi o ia tuutuuga po o poloaiga, o lona totogiina lea o le salatupe ua fa’atulaga atu e le fa’amasinoga.

 

E masani fo’i ona fa’ailoa e le fa’amasinoga i le tagata ua molia, o lona le tausisia o poloaiga e pei o le totogiina o le salatupe, e ono avea lea tulaga ma auala e fa’aleaogaina ai tuutuuga o lana nofovaavaaia, ae poloaina loa o ia na te tuliina masina o lo o totoe o lana fa’asalaga fa’a falepuipui.

 

Na fa’ailoa e Fiaui i luma o le komiti a le maota o sui e fa’apea, ua i ai tagata ua le mafai ona totogi a latou salatupe, ma faila ai loa e le Ofisa Fa’anofovaavaaia se talosaga i le fa’amasinoga mo se poloaiga e fa’aleaogaina ai tuutuuga o lana nofovaavaaia, ma afai ae fa’amaonia e le fa’amasinoga ua le tausisi le tagata molia i tuutuuga o lana nofovaavaaia, e tele le avanoa e mafai ai ona tu’uina atu lea tagata i le falepuipui.

 

“Ae tatau ona silafia e le maota o sui, na mafua ona tula’i le Ofisa Loia Fautua e puipui aia tatau o le to’atele o tagata o le atunu’u, e leai ni tupe a i latou nei e totogi ai ni loia e fautuaina i latou i ala o le tulafono, a o lea e fa’asala e le fa’amasinoga ma toe fa’afo’i i le falepuipui ina ua le mafai ona totogi a latou sala, o se tulaga e matua le talafeagai lava i lo’u taofi”, o le saunoaga lea a Fiaui.

 

“O le tu’uina atu o se tagata i le falepuipui ina ua le mafai ona ia totogi lana salatupe, o se tulaga e matua le talafeagai lava i lo’u manatu, ae o le mea moni lena o lo o tupu pea ma tupu pea i le tele o aso. Tele o taimi matou te taumafai ai e apili fa’aiuga a le fa’amasinoga, ae foliga mai e le talia e le fa’amasinoga la matou fa’afinauga, ae i lo’u talitonuga, e i ai auala e mafai e le fa’amasinoga ona fa’aaoga e fa’asala ai se tasi ua le usita’i i le totogiina o lana salatupe”, o le molimau lea a Fiaui.

 

O auala e pei ona fa’ailoa e Fiaui i luma o le komiti e mafai ona fa’asala ai se tagata ua le mafai ona totogi lana salatupe, o le fa’asala lea i se fa’asalaga fa’a falepuipui e mafai oa oo atu i le 180 aso, nai lo le poloaina o le tagata e tuli atoa le umi o lo o totoe o lana nofovaavaaia e 7 tausaga, i le mae’a ai lea ona tuli e lea tagata o masina e 28 i le toese.

 

“O le tulaga o lo o i ai nei, ua i ai tagata ua loka e le fa’amasinoga ina ua le mafai ona totogi a latou salatupe e na o le ta’i $1,000 pe oo atu fo’i i le $5,000, ae o ituaiga fa’aiuga nei e mafai ona toe fetu’utu’una’i i ai se fa’aiuga a le fa’amasinoga”, o le saunoaga lea a Fiaui, ma ia talosagaina ai le komiti o Mataupu Tau Tulafono a le maota o sui, ina ia silasila toto’a i le tulafono atoa ai tulaga o fa’asalaga, ina ia mautinoa e toe faia se teuteuga i le tulafono o lo o lima ta’ita’iina ai galuega a le fa’amasinoga.

Comment Here