Na fa’ai’u i le toese i Tafuna le misa a se ulugali’i talavou i le fa’aiuga o le vaiaso na te’a nei, ina ua aga’i atu Leoleo ma taofia fa’apagota mai i laua i le nofoaga na tula’i mai ai le fa’alavelave, ae auina atu loa i le toese i Tafuna ma taofia ai, ma la tutula’i ai loa i luma o le fa’amasinoga fa’aitumalo i le taeao ananafi.

O le vevesi i le va o le uluga’i na tula’i mai i se fale’aiga i Tafuna, ma i’u ina vili ai loa e tagata sa i ai le Ofisa o Leoleo mo se fesoasoani, ina ua fai fai tetele avauga a le ulugali’i.

E pei ona taua i fa’amaumauga a le fa’amasinoga, e lei leva ona vili e tagata le Ofisa o Leoleo ae vaaia loa le aga’i atu o ali’i ma tama’ita’i Leoleo e tali i le valaau, ae o le taimi fo’i lea na vaaia ai loa le alu i le atoa o le fafine ua sola ese ma Leoleo, ma fai ai loa tuliga.

O loo tu’uaia e le malo le fafine i lona tu’iina lea o se tama’ita’i Leoleo sa i le taimi na maua ai o ia mai a latou tuliga sa faia, ma auina fa’atasi atu ai loa i laua ma lona to’alua i le Ofisa o Leoleo i Tafuna mo su’esu’ega, ma taofia ai loa i le falepuipui.

O loo tu’uaia e le malo le tamaloa i le moliaga mama e tasi o le fa’atupu vevesi i nofoaga faitele, ae o le fafine o loo tu’uaia i moliaga mama e 3, lea e aofia ai le fa’ao’olima i le tulaga tolu, fa’atupu vevesi i nofoaga faitele, atoa ai ma le tete’e atu i Leoleo ao taumafai e pu’e fa’apagota o ia.

O le moliaga o le fa’ao’olima i le tulaga tolu ma le tete’e atu i Leoleo ao taumafai e pu’e fa’apagota ua tu’uaia ai le fafine, na afua mai i le taimi lea na sola ese ai ma Leoleo atoa ai ma lona fa’ao’olima i se tama’ita’i Leoleo e pei ona tu’uaia ai o ia e le malo.

Na teena e le uluga’i tu’uaiga fa’asaga ia te i laua, ma ua tatalaina nei i laua i tua e fa’atali ai le isi iloiloga o le la mataupu lea ua fa’atulaga e faia i le fa’aiuga o le masina lenei, ma ua poloaina i laua e le malo e tausi le filemu ma aua ne’i o la toe solia se tulafono.

O se tasi o mataupu na tula’i mai i se vaega lava o Tafuna i le fa’aiuga o le vaiaso na te’a nei, ua tu’uaia ai e le malo se ali’i i le moliaga o le fa’ao’olima i le tulaga tolu, fa’atupu vevesi i totonu o lona aiga, atoa ai ma lona faia o ni gaioiga e ono lamatia ai le saogalemu o fanau laiti, e mafua mai i le fa’alavelave o loo tu’uaia ai o ia i lona titinaina lea o le ua o lona niece.

Na taua i fa’amaumauga a le fa’amasinoga le ova o le ‘ona a le ali’i o Esekia Vaili i le taimi na tula’i mai ai le fa’alavelave, ma i’u ai loa i lona fa’ao’olima i lona niece ina ua le usita’i o ia i se fa’atonuga sa ia tu’uina atu i ai.

Na teena e le ali’i o Vaili moliaga fa’asaga ia te ia ina ua tula’i i luma o le fa’amasinoga fa’aitumalo i le taeao ananafi, ma ua toe tatalaina nei o ia i tua e aunoa ma se tupe e totogi e fa’atali ai lana iloiloga lona lua lea ua fa’atulaga e faia i le fa’aiuga o le masina nei, i lalo o poloaiga mai le fa’amasinoga e ao ona ia usita’i i ai.

O ni isi o ia poloaiga e aofia ai le fa’asa lea ona ai toe taumafai e fa’afeso’ota’i lona niece na a’afia i lenei mataupu, fa’asa ona ia toe tagofia le ‘ava malosi, a ia avea o ia ma tagatanu’u e tausisi i tulafono a le malo i taimi uma.

O le isi fa’alavelave na tali atu i ai Leoleo i le fa’aiuga o le vaiaso na te’a nei na tula’i mai lea i le afioaga i Fagaalu, ina ua fa’ai’u puta le tafaoga a ni ali’i se to’afa sa faia, i se fiafia o se aso fanau sa fa’atinoina ai i le fale o le ali’i ua molia e le malo.

O le ali’i ua molia e le malo, o ia lea o Jacob Viliamu, lea ua tu’uaia i moliaga mama e tolu o le fa’atupu vevesi i nofoaga faitele, atoa ai ma moliaga e lua o le fa’ao’olima i le tulaga tolu.

O ia moliaga na afua mai ina ua tula’i mai se feeseeseaiga i le va o isi ali’i e to’alua sa latou inupia fa’atasi, ma taumafai ai loa Viliamu e fa’ato’a filemu le vevesi na tula’i mai i le va o ana uo e to’alua, peita’i sa fiu le ua molia e fa’afilemu le mataupu ae ua atili ai lava ona tula’i mai le vevesi, ma ia fa’asaga atu ai loa ma fa’ao’olima i ana uo e to’alua e pei ona taua i fa’amaumauga a le fa’amasinoga, e ala i lona ta tu’i o la foliga.

E taunu’u Leoleo i le fale o le ali’i ua molia ma iloa ai, toe lava o ia o loo i ai i le fale ae ua leai ana uo a latou fiafia fa’atasi, e le’i mana’o fo’i le ua molia e ta’u i Leoleo nofoaga e nonofo ai ana uo, ae ua malie lava o ia na te amoina le mamafa o le fa’afitauli sa tula’i mai.

Na teena e Viliamu tu’uaiga fa’asaga ia te ia i luma o le fa’amasinoga fa’aitumalo i le taeao ananafi, ma ua toe tatala ai o ia i tua e fa’atali ai lana iloiloga lea ua fa’atulaga e faia i le fa’aiuga o le masina nei, ma ua poloaina o ia e le fa’amasinoga e aua ne’i ona toe taumafai e fa’afeso’ota’i ana uo na a’afia i lenei mataupu, poo molimau fo’i a le malo o loo taua o latou igoa i le tagi ua fa’aulu e le malo.